168.am-ը Հայ Յեղափոխական Դաշնակցությունից փորձեց ճշտել՝ արդյո՞ք ՀՅԴ-ն պատրաստվում է արձագանքել Գագիկ Ծառուկյանի համախմբման կոչին, և պատրա՞ստ են արդյոք քննարկումներ սկսել ԲՀԿ-ի հետ և միանալ կառավարության 100 տոկոս կազմի հրաժարականի պահանջին:

Ի պատասխան ՀՅԴ Գերագույն մարմնի ներկայացուցիչ Իշխան Սաղաթելյանն ասաց. «Նախ՝ արձանագրենք, որ ԲՀԿ քաղխորհրդի նիստում Գագիկ Ծառուկյանի՝ երկրում ստեղծված վիճակի և իշխանության ձախողման վերաբերյալ հնչեցրած գնահատականները գրեթե չեն տարբերվում մեր գնահատականներից, որոնք բազմիցս, նախորդող ընթացքում ամրագրվել են ՀՅԴ Հայաստանի Գերագույն մարմնի քաղաքական հայտարարություններում և հրապարակային արժևորումներում: Ինչ վերաբերում է համախմբման կոչին և համագործակցությանը, ապա հարկ է փաստել, որ այն պետք է բխի երկրի առջև ձևավորված սպառնալիքները դիմագրավելու հրամայականից»,- ասաց Սաղաթելյանը:

Նրա փոխանցմամբ՝ ակնհայտ է, որ համագործակցությունն ու համախմբումը պետք է իրականացվի հստակ օրակարգի շուրջ՝ այն քաղաքական ուժերի և անհատների մասնակցությամբ, ում համար ազգային-պետական ուղեգծով առաջնորդվելը հիմնարար սկզբունք և գործելաոճ է:

«Հավատում ենք այդպիսի համագործակցության օրակարգին, որտեղ մեզ միավորողը ոչ թե անձինք, այլ ազգային, ժողովրդավարական, իրավական և անվտանգ Հայաստանի տեսլականն է: Հիշեցնեմ նաև, որ Դաշնակցությունը 4 օր առաջ հանդես է եկել հստակ պահանջով»,- ասաց նա:

Հարցին՝ իսկ ինչո՞վ է պայմանավորում այն, որ երեկվանից իշխանության տարբեր ներկայացուցիչներ իրենց ՖԲ էջերում իրենց խոսքերով հիշեցնում են Ծառուկյանի անցած ուղին, մատնանշում ինչ-ինչ քրեական գործեր, Իշխան Սաղաթելյանն ի պատասխան՝ ասաց.

«Սա իշխանության գործելաոճն է, երբ իր քաղաքական ընդդիմախոսների քաղաքական հարցադրումներին պատասխանում են քրեական գործեր հարուցելու շանտաժով»: