Ուժային կառույցներում Փաշինյանը փոփոխություններ կանի այնքան, մինչեւ դրանք ծառայեն ներքին ռեպրեսիաներին
08 Հունիս 2020Ուժային կառույցներում Նիկոլ Փաշինյանը փոփոխություններ անելու է այնքան ժամանակ, քանի դեռ այդ համակարգերն ամբողջությամբ չեն ծառայում երկրի ներսում ներքին ռեպրեսիաների համար: Այս մասին NEWS.am-ի հետ զրույցում ասաց ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը։
«Կարծում եմ, որ բարձրաստիճան պաշտոնյայի են աշխատանքից ազատում, պետք է լինի պատճառաբանված պարզաբանում, սա շատ կարեւոր է երկրի թափանցիկ կառավարման տեսանկյունից: Սա էլ արդեն որերորդ դեպքն է, երբ աշխատանքից ազատում են բարձրաստիճան պաշտոնյաների, եւ մենք պաշտոնական բացատրություն չենք ստանում: Երկրորդը` ակնհայտ է, որ հատկապես ուժային կառույցներում Նիկոլ Փաշինյանը փոփոխություններ անելու է այնքան ժամանակ, քանի դեռ այդ համակարգերն ամբողջությամբ չեն ծառայում երկրի ներսում ներքին ռեպրեսիաների համար: Այս ամբողջը ես դիտարկում եմ այս տեսանկյունից, եւ սա է այս ամենի տրամաբանությունը»,- ասաց նա:
Անդրադառնալով ԲՀԿ առաջնորդ Գագիկ Ծառուկյանի քաղխորհրդի հրատապ նիստի հայտարարությանը՝ նա ասաց, որ ՀՅԴ-ն այս առումով երկրում ստեղծված իրավիճակի հետ կապված բազմաթիվ անգամ տվել է իրենց գնահատականներն ու արժեւորումները, ներկայացրել է պահանջ, օրակարգ:
«Մենք 7 օր առաջ էլ հանդես ենք եկել հայտարարությամբ, որտեղ ասվում էր, որ ԱԺ-ն պետք է հրատապա հատուկ նիստ գումարի, ստեղծված իրավիճակին ամբողջական գնահատական տա, պատասխանատվության կանչի ձախողված պաշտոնյաներին, եւ համատեղ գտնեն ելքեր այս իրավիճակից համար: Իսկ ինչ վերաբերում է համախմբմանը, համախմբումը պետք է լինի օրակարգի շուրջ, եւ պետք է բխի ժողովրդի շահերից: Ընդհանուր մթնոլորտը բերել է այն իրավիճակին, որ անհապաղ պետք է ձեռնարկել քայլեր ստեղծված իրավիճակից դուրս գալու համար: Շատ բնական է, որ ընդդիմադիր դաշտի մի շարք կուսակցություններ տարբեր դիրքորոշումներ են հայտնել եւ առաջարկներ են ներկայացրել ստեղծված իրավիճակից դուրս գալու նպատակով: Այս իրավիճակում դա շատ բնական է, չխոսել իրավիճակից եւ նայել, թե ինչպես է երկիրը գլորվում անդունդը, սա է հանցագործություն»,- ասաց նա:
ՀՅԴ Հայաստանի Գերագույն մարմնի ներկայացուցիչը անդրադառնալով համագործակցության հնարավորություններին, ասաց որ իրենց համար կարեւոր է` ինչ հարցերի շուրջ եւ ինչ օրակարգով կլինի համագործակցությունը:
Իշխան Սաղաթելյանը տեսնում է արտահերթ ընտրությունների հնարավորություն եւ գտնում է, որ Հայաստանում իշխանությունները պետք է ձեւավորվեն ընտրությունների միջոցով:
«Կա երկրում կառավարման ճգնաժամ, իշխանությունը ընդունակ չէ լուծել երկրի առջեւ ծառացած խնդիրները: Մենք այս մասին մենք խոսել ենք դեռեւս մեկ տարի առաջ, իշխանություններին դեղին քարտ ենք ցույց տվել ու ասել ենք` լրջացեք, կենտրոնացեք մեր երկրի առջեւ ծառացած խնդիրների լուծման վրա»,- հավելեց նա:
