«Այս տարվա կանխատեսումներն այն են, որ մենք տնտեսական անկում ունենալու ենք 5-10 տոկոսի շրջանակներում։ Կառավարությունը կարծում եմ կփորձի մեղմել ի հաշիվ գյուղատնտեսական արտադրանքի թվերի ավանդական նկարչությամբ, քանի որ այս թվերը հնարավոր չի վերահսկել և որոշակի ճշգրտումներ իրականացնել։ Այստեղ նրանք հնարավորինս ցույց կտան, որ գյուղոլորտը որոշակի դինամիկա ունի, բայց ի հաշիվ առևտրի, ի հաշիվ շինարարության և ծառայության ոլորտների՝ անկումը բավականին մեծ կլինի»,-մեկնաբանեց Սուրեն Պարսյանը։

Նա նաև ընդգծեց, որ տնտեսական անկման մեծ լինելու հիմքերից մեկն այս տարվա կիսամյակային տվյալներն են․ «Այս տարվա հունվար-հունիս ամիսների կտրվածքով ունենք 4,9 տոկոս տնտեսական անկում, որն աննախադեպ է վերջին տասներկու տարիների համար։ Եթե այս միտումները շարունակվեն հաջորդ ամիսների ընթացքում մենք 6-7 տոկոս անկում կունենանք»։

Թեպետ տնտեսագետը նշեց է, որ այս ճգնաժամը բոլոր երկրներին է բնորոշ և բոլոր երկրները տուժելու են, այնուամենայնիվ շեշտեց, որ խնդիրն այն է, որ Հայաստանը հնարավորինս մեղմի այս ճգնաժամի ազդեցությունը տնտեսության, ազգաբնակչության վրա, և ամենակարևորն այն է, որ այս վնասն արդարացի բաշխվի տնտեսության մեջ։

«Մասնավորապես վնասը չպետք է ընկնի փոքր և միջին բիզնեսի վրա, կամ ազգաբնակչության վրա։ Խոշորը ևս պետք է խոշոր կորուստներ ունենա, և այստեղ է կառավարության անելիքը՝ չպետք է ամբողջ աջակցության ծրագրերը կամ օրենսդրական նախագծերը ուղղված լինեն միայն խոշոր բիզնեսին փրկելուն և անտեսվի փոքր և միջին բիզնեսը»,-ասաց Պարսյանը։

Նրա կարծիքով եթե կառավարությունը ուզում է իրավիճակը փրկի՝ առաջինը պետք է ներդնի ամբողջ համահայկական ներուժը այս հարցում, և այստեղ ընդդիմության իշխանության հարց չպետք է լինի, որպեսզի լուծումներ գտնվեն։

«Ես վստահ եմ, որ կառավարությունում նստած ֆինանսիստները, որոնք նախորդ կառավարությունից եկած մարդիկ են որևէ նոր բան չեն առաջարկելու՝ նույն ավանդական լուծումներով են գնալու ՝ այսինքն ավելացնել պետական պարտքը, ֆինանսավորել պետական ծրագրեր, փող դնել ճանապարհաշինության մեջ։ Եվ այդքանով կսահմանափակվի իրենց ծարգրերն ու գաղափարները»,-մատնանշեց տնտեսագետը։

Սուրեն Պարսյանը վստահ է, որ ավանդական լուծումներով շարժվելու դեպքում ինչպես նախկինում, այնպես էլ հիմա բավականին ցածր կլինի ազդեցությունը, և արդյունքում դարձյալ տնտեսությունն ու մեր ազգաբնակչությունը մեծ կորուստներ կկրեն։․ «Եթե կտրուկ քայլերի չգնանք, մոտակա մեկ տարին այս տենդենցը շարունակվելու է, և այս վնասի վերականգնումը կտևի երկուսից-երեք տարի, և սա ավելի երկարաժամկետ ծարգրերի ու մոտեցումների անհրաժեշտություն ունի»։