Այս առումով մեծ է անոր ներդրումը ուսանողական, երիտասարդական եւ պատանեկան դաստիարակչական ծրագիրներու մշակման եւ ընդհանրապէս մեր երիտասարդական միաւորներու գաղափարներուն շուրջ համախմբման աշխատանքներուն մէջ:

Վարանդ Փափազեան անդամ եղած է նաեւ ՀՅԴ Լիբանանի Կեդրոնական կոմիտէին: 7 դեկտեմբեր 1988-ին հիւսիսային Հայաստանը պատուհասած երկրաշարժէն անմիջապէս ետք ան մեծ դերակատարութիւն ունեցած է աղէտեալներուն համար Լիբանանէն մատուցուած օժանդակութիւններուն կազմակերպման աշխատանքին մէջ: Անսալով ՀՅ Դաշնակցութեան «Դէպի երկիր» կարգախօսին` Վարանդ Փափազեանը, իբրեւ կուսակցական գործիչ, 1989-էն սկսեալ լայնածաւալ աշխատանք կը կատարէ Հայաստանի մէջ կուսակցական կառոյցներու ձեւաւորման, նորագիրներու անդամարշաւի եւ ի վերջոյ 1990-ին հայրենի հողին վրայ ՀՅԴ-ի վերընձիւղման ուղղութեամբ: Այս իմաստով ալ անուրանալի կը մնայ ազգային զարթօնքի եւ վերանկախացման առաջին տարիներուն Վարանդ Փափազեանի դերակատարութիւնը հայրենիքի մէջ Դաշնակցութեան կայացման աշխատանքին մէջ:

Միաժամանակ, անմոռանալի կը մնայ Վարանդ Փափազեանի նուիրումն ու նպաստը Արցախեան ազատագրական պայքարին եւ Արցախի մէջ ՀՅԴ-ի կազմակերպական կառոյցի կայացման աշխատանքներուն մէջ: Այս փուլին ան եղած է խորհրդական Արցախի Հանրապետութեան Գերագոյն խորհուրդի առաջին նախագահ Արթուր Մկրտչեանի եւ ապա Գերագոյն խորհուրդի նախագահի պաշտօնակատար Գէորգի Պետրոսեանի:

Երկու փուլով` 1980-ականներու երկրորդ կէսին եւ 1990-ականներու երկրորդ կէսին, ան ստանձնեց ՀՅԴ Լիբանանի Կեդրոնական կոմիտէի պաշտօնաթերթ «Ազդակ» օրաթերթի տնօրէնի պատասխանատու պաշտօնը: Դաշնակցական գաղափարական աւանդներէն սնած` Վարանդ Փափազեանի գրիչին կը պատկանին նախ «Ազդակ շաբաթօրեակ-Դրօշակ»-ի եւ ապա ՀՅԴ պաշտօնաթերթ «Դրօշակ»-ի մէջ լոյս տեսած գաղափարաբանական բնոյթի յօդուածներ: 1993-ին Երեւանի մէջ լոյս կը տեսնէ իր «Հայ ազգային ռազմավարութիւնը» խորագրեալ գիրքը:

Վարանդ Փափազեանի մահով, Դաշնակցութեան ընտանիքը կը կորսնցնէ կազմակերպական, դաստիարակչական, հրապարակագրական մարզերուն մէջ յատուկ աւանդ ներդրած գաղափարական գործիչ մը:

aztagdaily.com