Աղէտալի էր 2020 տարին:

Առանց խղճահարութեան եւ զղջումի կը բաժնուինք` 365 օրերը դարձեալ չտեսնելու հաւատքով:

Դառն եղաւ անցնող տարուան փորձառութիւնը: Արցախէն Հայաստան, սփիւռք, եւ հոս` Լիբանան:

Հարուած ստացաւ համայն հայութիւնը Արցախի մէջ եւ Հայաստանի: Ոչ ոք մեր կողքին կանգնեցաւ, ոչ մէկ ուժ յայտարարողական մակարդակէ անդին գործնական զօրակցութիւն ցուցաբերեց մեր հայրենիքին եւ հայութեան դէմ թուրքեւազրպէյճանական ցեղասպանական յարձակումին դէմ դնելու ճիգերուն:

Հայրենի ղեկավարութիւնը ժողովրդավարական նորօրեայ ըմբռնողութեամբ միանձնեայ մոլեգնութեամբ, թեթեւութեամբ դիմագրաւելով պատերազմը, անհեռանկար անձնատուութեամբ թշնամիին յանձնեց հայ երիտասարդներու արեամբ ազատագրուած Արցախը:

Պարտութեան մղուեցաւ հայութիւնը:

Նուազագոյնը` կասկածելի մեքենայութեամբ փորձուեցաւ տապարահար դարձնել համայն հայութեան երազը:

Վտանգուեցաւ նաե՛ւ Հայաստանը իր սահմաններով:

Մանաւա՛նդ վտանգուեցաւ իր գոյութիւնը, ապագան:

***

Տագնապահար է Լիբանանը:

Աննախընթաց տնտեսական, ելեւմտական, քաղաքական եւ ընկերային տագնապ, քաղաքական միահեծան ղեկավարութեան անշնորհք վերաբերմունք, դրամատնային ընտրանիի եւ դրամատիրական ցեցերու շահագործում, համայնքային շահադէտ դրսեւորում, օրինակներ են միայն անցած եւ շարունակուող տագնապի երեսներուն:

«Քորոնա» ժահրը եկաւ յաւելեալ ծանրութիւն բեռցնելու քաղաքացիին ուսերուն:

Եւ չուշացաւ երրորդը` նաւահանգիստի պայթում-ոճիրը: Նոյն անհոգութեան, անտարբերութեան, անպատասխանատու վերաբերմունքի հետեւանք աղէտ, որ հարուածեց համայն Լիբանանը եւ իւրաքանչիւր լիբանանցի:

Պէյրութն ու շրջակայքը վերածուեցան դժոխքի:

Ու դժոխքի վերածուեցաւ նաեւ լիբանանցիին կեանքը:

Դարձեալ համատարած սարսափ, հիասթափութիւն եւ յուսալքում:

***

Այս ընդհանուր յուսաբեկումի մթնոլորտին մէջ կը դիմաւորենք Նոր տարին:

Հայու խիզախութեամբ, աննկուն կամքով, վերականգնելու վճռականութեամբ պիտի դիմաւորենք, պարտաւո՛ր ենք դիմաւորելու Նոր տարին:

Հայո՛ւ Նոր տարին:

Այլ ընտրանք չունինք:

Երբ որոշած ենք ապրիլ, գոյատեւել, պարտութիւնն ու անձնատուութիւնը ճզմել, նախ պարտինք մեր հոգիներէն դուրս շպրտել պարտուողականութեան որեւէ տուայտանք, տկարութիւն:

Չենք կրնար չապրիլ:

Չենք կրնար հոգիներու պարտութիւն դրսեւորել:

Բռնցքուելու պահն է:

Անհատներ կրնան պարտուիլ, նոյնիսկ պարտութեան առաջնորդել բանակներ:

Հայու կամքը, նահատակներու արիւնը, խիզախ մարտնչումն ու երկաթեայ բազուկը կը վերադարձնեն յաղթանակը:

2021-ը պէտք է ըլլայ յաղթանակի կերտման ճանապարհի առաջին փուլը:

Թէ՛ Լիբանանի մէջ, թէ՛ Հայաստանի:

Ցաւը մեր սրտին, կը դիմաւորենք Նոր տարին, ցաւը վերածելով զրահի եւ ուժի` կերտելու մեր ապագան, մեր բոլորի ապագան:

Մոմ եւ խունկ մեր նահատակներու յիշատակին:

Պատիւ հայութեան ամուր կամքի շէնքին խճաքար մը աւելցնող իւրաքանչիւր հայուն:

2021-ը թող ըլլայ հայութեան վերընձիւղման տարին:

Հայ մարդուն արիւնն ու քրտինքը գետին պիտի չմնան:

Իրաւունք չունինք ընկրկելու:

Յ. ԲԱԳՐԱՏՈՒՆԻ

aztagdaily.com