Տպավորություն է, որ իրենց սեւ գործն արել են, հիմա մեզ ինչ-որ քննարկումների են տանո՞ւմ․ Հայրենիքի փրկության շարժման երթից հետո, Բաղրամյան պողոտայում լրագրողների հետ զրույցում նշեց ՀՅԴ ԳՄ ներկայացուցիչ Իշխան Սաղաթելյանը՝ անդրադառնալով ՀՀ նախագահի հայտարարությանը, որը կլոր սեղանի շուրջ է հրավիրել վարչապետին, Շարժման ներկայացուցիչներին ու ԱԺ խմբակցությունների ղեկավարներին՝ քննարկելու ստեղծված իրավիճակից ելքերը:

«Մենք հանդիպումների առումով կոմպլեքսներ չունենք, խնդիրն այն է, թե ինչից պետք է խոսենք: Եթե կլինի օրակարգը, կլինի ինչի մասին… եթե Արմեն Սարգսյանը հրավիրել է Նիկոլին, որ քննարկենք իր հեռացման ճանապարհային քարտեզը այդ օրակարգով կարելի է խոսել»,-ասաց նա:

Անդրդառնալով Նիկոլ Փաշինյանի՝ ԶՈւ ԳՇ կատարած այցին, Սաղաթելյանն ասաց, որ եթե պաշտոնից ելնելով՝ Փաշինյանը հայտնվել է ԳՇ-ում, դա չի նշանակում որ ԶՈւ-ն իրեն ամբողջությամբ ընդունել է:

«Իմ տեղեկություններով՝ ԳՇ-ում իր ճակատին շատ ճիշտ և ուղիղ խոսքեր են ասել: Նա գնացել է ԳՇ՝ կադրեր ստանալու, որ իր դեմ զինվորականները ոտքի են կանգնում: Իմ տպավորությամբ ՝ԶՈւ-ն նաև հայտարարությամբ ցույց տվեց, որ մերժում է այդ մարդուն, և վերահաստատել է՝ պետք է հեռանա: Ես չունեմ տպավարոթյուն, թե Նիկոլը բանակը «կոտրեց», հիմա անցնելու է հաջորդ քայլին: Այս պայքարի մեջ լինելու են կոտրվողներ, հանձնվողներ, ճանապարհից շեղվողներ, ես ու իմ կուսակցությունն այդ թվին չենք պատկանում»,-ասաց Սաղաթելյանը՝ տեսակետ հայտնելով, թե Փաշինյանը կորցնում է աջակցությունը:

«Նիկոլն ուժեղանալու որևէ ռեսուրս չունի, նա կորցնում է իշխանությունը: Նա խաբել է ոչ միայն քաղաքացիներին, զնիվորականներին, մտավորականներին, այլև քաղաքական կուսակցություններին: Եթե հիմա մարդիկ գալիս են իրենց սխալն ուղղելու, ես դա դրական եմ գնահատում»,-ասաց նա:

Ինչ վերաբերում է նրան, որ երկխոսության կոչով հանդես է եկել նաեւ ՀՀ առաջին նախագահ Լեւոն Տեր-Պետրոսյանը, նա ասաց. «Հիմա էլի հրեշտակի թեւեր սկսեց հագնել Նիկոլի գաղափարական հայրը, անձ, որը տարիներ շարունակ քարոզում էր, որ պետք է տանք, որ լավ ապրենք»:

https://youtu.be/qxjD_ekA7hA