Լիբանանի ահագնացող տագնապը լուծման ճանապարհի սեմը կրցաւ թեւակոխել վերջապէս: Հիմքով քաղաքակա՞ն, թէ՞ աշխարհաքաղաքական, տագնապը, արտաքին որոշողներու ու ներքին գործադրողներու պարտադրանքով վերաճեցաւ տնտեսականի, ապա ընկերայինի, ի վերջոյ յանգելու համար պետութեան կառոյցներու գրեթէ ամբողջական ամլացումին: Լիբանանեան թղթոսկիի գահավէժ արժեզրկումը, պետական նպաստներու ցամքումը յառաջացուցին համատարած աղքատութիւն եւ երկրի տնտեսական կեանքի կասեցում:

Պէյրութի նաւահանգիստի պայթումին յաջորդած կառավարութեան հրաժարականէն տասներեք ամիս ետք, վարչապետ Նեժիպ Միքաթի, Հանրապետութեան նախագահին հետ համաձայնելով կրցաւ կազմել քսանչորս նախարարներէ բաղկացած կառավարական դահլիճ մը: Բացի վարչապետէն, դահլիճի անդամները արտախորհրդարանական անձնաւորութիւններ են, սկզբունքով մասնագէտներ իրենց ստանձնած նախարարութիւններուն վերապահուած բնագաւառներուն:

Կառավարութեան մաս կը կազմէ նաեւ Զահլէի շրջանէն պրն. Ճորճ Պուչիքեանը: Հայ նախարարին վստահուած է երկրին ճարտարարուեստը, Հայաստանի մէջ պիտի ըսէին արդիւնաբերութիւնը: Այն ճարտարարուեստը, որ տակաւ չքանալու վրայ է, քանի որ ի՜նչ ճարտարարուեստ` ելեկտրականութեան եւ տարբեր ուժանիւթերու բացակայութեան:

Նոր կառավարութեան կը սպասէ լուծելի հարցերու ծաւալուն օրակարգ մը: Քաղաքական մարզին մէջ եթէ յաջողին առաջնորդուիլ միայն Լիբանանի գերակայ շահերով, եթէ մոռացութեան տան լիբանանեան քաղաքական բեմի անձնաւորուած, յաճախ անիմաստ ու անհասկնալի հակադրութիւնները, եթէ դուրս գան համայնքային իրաւունքներու սին նախապաշարումներէն, հանրապետութեան նախագահը, վարչապետը եւ քսաներեք նախարարները պիտի սկզբնաւորեն վերականգնումի գործընթաց մը, որուն ստիպողական պահանջը ունի Լիբանանի տագնապահար ու արդէն տանջահար քաղաքացին:

Կը թուի, որ ցարդ գործող ու երկիրը կառավարող անձնակազմը մատնուած է անելի, իր իսկ ստեղծած անելին: Անձնակազմին փոփոխութիւնը անհրաժեշտ է, սակայն չի կրնար սահմանափակուիլ անձերու փոփոխութեամբ, ինչպէս եղած է մօտաւոր անցեալին: Քաղաքացիական գիտակցութեան հիմնական վերանայում մը անհրաժեշտ է, ընտանեկան-աւատապետական ղեկավարման սպառած դրութենէն դուրս գալու վճռական շրջադարձ մը հրամայական է, կազմաւորելու համար քաղաքականօրէն պատրաստուած լիբանանեան քաղաքացիական հասարակութիւն մը, որ կրնայ հիմը դնել արդիական պետութեան մը:

Նման հանգուցալուծում նախանշուած էր Թաֆէի համաձայնագրով: Թաէֆի համաձայնագրի կէտերու ընտրովի ու կամայական գործադրութիւնը արգելակեց նախատեսուած ցանկալի լուծումը: Ժամանակը եկած է լծուելու պետութիւնը նոր հիմքերով վերակառուցելու աշխատանքին:

Կառավարութեան կեանքը կարճատեւ է: Ինը ամիս ետք, մայիս 2022-ին պէտք է կազմակերպուին երեսփոխանական ընտրութիւններ: Երեսփոխանական ընտրութիւնները պէտք է դառնան փոփոխութեան համար բացառիկ առիթ մը, նորոգութեան դարպաս մը: Այդ անհրաժեշտ փոփոխութիւնը կարելի դարձնելու առաքելութիւնը պէտք է դառնայ նոր կառավարութեան առաջնահերթ պարտականութիւններէն գլխաւորը:

ՏԻԳՐԱՆ ՃԻՆՊԱՇԵԱՆ

aztagdaily.com