Կառավարության երեկվա նիստում ձեր քաղաքական առաջնորդը շատ մանրամասն նկարագրեց իրավիճակը Արցախում, նշեց սպառնալիքների մասին, խոսեց Արցախի հայաթափման, էթնիկ զտման մասին և, ըստ էության, շատ ուղիղ ասաց, որ երկիրը կանգնած է պատերազմական իրավիճակի առջև: Դրանից ժամեր հետո խոսվեց արտահերթ նիստի մասին, և շատ տրամաբանական էր, որ այդ նիստը պետք է լիներ երկրի անվտանգության, մեր երկրի պաշտպանության ու հնչած խնդիրների վերաբերյալ: Բայց ի՞նչ ենք այսօր քննարկում, ու այդ ֆոնին քաղաքական մեծամասնությունն ինչո՞վ է հանդես գալիս` ՏԻՄ օրենքում փոփոխություններ և լրացում կատարելով: Մեր երկրի առաջնային մանդատով օժտված խորհրդարանը, երկրի բարձրագույն օրենսդիր մարմինն արտահերթ նիստ է հրավիրում Վանաձորի քաղաքապետարանը նվաճելու համար։ Այս մասին այսօր, ՀՀ Ազգային ժողովի արտահերթ նիստին, ԱԺ ամբիոնից հայտարարեց ՀՅԴ Հայաստանի ԳՄ ներկայացուցիչ, ԱԺ փոխնախագահ Իշխան Սաղաթելյանը:

Ազգային ժողովը «Քաղաքացիական պայմանագիր» խմբակցության 33 պատգամավորների նախաձեռնությամբ այսօր՝ ապրիլի 1-ին, արտահերթ նիստ է հրավիրել, որի օրակարգում մեկ հարց է՝ «Տեղական ինքնակառավարման մասին» օրենքում փոփոխությունների նախագիծը, որով առաջարկվում է այն համայնքներում, որտեղ ինչ-ինչ պատճառներով համայնքապետեր չեն ընտրվում, հնարավորություն տալ վարչապետին՝ ժամանակավոր պաշտոնակատարներ նշանակել։

Նախագիծը համարվել է հրատապ, ինչը նշանակում է, որ 24 ժամով երկրորդ ընթերցման է դրվելու:

«Թշնամական զորքերը ներխուժել են Փարուխ, գրավել են ռազմավարական նշանակություն ունեցող բարձունքներ, և ի՞նչով ենք մենք զբաղված այս պահին խորհրդարանում: Ուզում եմ հասկանալ` ի՞նչ ուղերձ ենք տալիս մեր ժողովրդին: Հիմա Ստեփանակերտում, Կարմիր Շուկայում, Խրամորթում ապրող արցախցին, հայ մարդը ի՞նչ է մտածում այս խորհրդարանի ու քաղաքական մեծամասնության մասին:

Ես ձեզ ընդհանրապես կարող եմ շատ լուսավոր և գործնական առաջարկ անել. եկեք, փոխեք Սահմանադրությունը, մեկ է արդեն մեծամասնություն եք, ինչ ուզեք, կանեք, մեկ է, արդեն կարծես թե սահմանադրական մեծամասնություն եք, փոխեք ու Սահամանդրության այն կետը, որով ասվում է, որ ՀՀ-ում ՏԻՄ ընտրությունները պետք է ձևավորվեն ընտրությունների միջոցով, փոխեք ու ասեք` «սրանից հետո, բոլոր գյուղապետերը, քաղաքապետերը, համայնքի ղեկավարները, չմոռանաք նաև Երևանի քաղաքապետին, նշանակում է ՔՊ-ն»: Փակեք այդ հարցը: «Ժողովրդավարության բաստիոն» Հայաստանում դա լավ արձագանք կգտնի ու միջազգային գործընկերները կողջունեն», – հեգնեց Սաղաթելյանը:

«Այս խորհրդարանն ադեկվատ չի երկրում ստեղծված իրավիճակին ու մարտահրավերներին:

Ինձ մոտ տպավորություն է, որ դուք երկրի պաշտպանությունն ու անվտանգությունը պաշտպանելու ձեր առաջնային գլխավոր պատասխանատվությունը թողած, մտածում եք ձեր իշխանությունը ամրապնդելու մասին, հավանական կորուստների դեպքում, կարողանաք պահել ձեր իշխանությունը:

Այս խորհրդարանը պետք է գումարեր արտահերթ նիստ` քննարկեր պատերազմական իրավիճակում պետական բյուջեի ծախսերը վերանայելու հարցը, ամբողջն ուղղեր երկրի պաշտպանությանը, պետք է գումարեր նիստ` քննարկելու երկրում ռազմաքաղաքական օպերատիվ հարցերով կառավարման շտաբ ստեղծելու և երկրի իրավիճակից դուրս բերելու համար, որովհետև դուք փաստել եք, որ անկարող եք մեր երկրի պաշտպանությունը կազմակերպել: Հետևաբար, այս խորհրդարանը հեռու է այս երկրի իրական վտանգները գիտակցելուն, քննարկելուց և ելքեր փնտրելուց:

Ես ՀՀ քաղաքացիների կոչ եմ անում դուրս գալ փողոց, ամսի 5-ին` ժամը 18:30-ին Ազատության հրապարակում մենք միասին քննարկենք, ինչպես պահենք Արցախը, ինչպես պաշտպանենք Հայաստանը, հանուն Հայաստանի ու Արցախի անվտանգության քայլեր և գործողություններ ձեռնարկենք», – եզրափակեց դաշնակացական գործիչը: