«Դիմադրություն» շարժման խաղաղ անհնազանդության ակցիաները շարունակվում են․ շրջափակվեց ՀՀ արտգործնախարարության շենքը
24 Մայիս 2022
«Դիմադրություն» շարժման մասնակիցներն այսօր, մայիսի 24-ի վաղ առավոտյան հավաքվել էին Ֆրանսիայի հրապարակում, որտեղից մեկնարկեց երթ Երեւանի փողոցներով:
Անցնելով մայրաքաղաքի փողոցներով, երթը հասավ ՀՀ արտաքին գործերի նախարարության շենքին, որտեղ նրանց սպասում էին պատ կազմած ոստիկանները:
ՀՅԴ ԳՄ ներկայացուցիչ Իշխան Սաղաթելյանը հայտարարեց, որ ԱԳՆ չի առաջնորդվում Հայաստանի ժողովրդի շահերով, ուստի պետք է շրջափակել շենքի մուտքերը, որից հետո երթի մասնակիցները ճեղքելով ոստիկանական պատը մոտեցան ԱԳՆ-ի շենքի մուտքին եւ սկսեցին վանկարկել՝ «Նիկո՛լ դավաճան»: Նա հրահանգեց որեւէ այլ գործողություն չանել, միայն արգելափակել մուտքերը:
Ակցիայի մասնակիցները վայրկյանների ընթացքում ճեղքեցին ոստիկանական պատն ու շրջափակեցին նախարարության շենքի մուտքերը։
Իշխան Սաղաթելյանը Արտգործնախարարությունում աշխատող բազմաթիվ պատրաստված դիվանագետներին կոչ արեց տարանջատվել Նիկոլից, չկրել այն դավաճանության պատասխանատվությունը, որն ինքը ստանձնել է։
«Այս շրջափակումով ցույց ենք տալիս, որ այս շենքի յուրաքանչյուր աշխատանք հակապետական է, դեմ է մեր շահերին։ Կրկին կոչ եմ անում մեր հայրենակիցներին՝ գալ, միանալ մեզ, միասնաբար արգելափակելու նախարարությունների շենքերը՝ այդ թվում Կրթության նախարարության շենքը, որը տարիներ առաջ սկսեց նաև պայքարը մեր եկեղեցու, մշակույթի, մեր ազգային արժեքների նկատմամբ։ Սրանք բոլորն այսօր ծառայում են թշնամուն և մենք մեր վրդովմունքն ենք արտահայտում»,-հայտարարեց Իշխան Սաղաթելյանը։
Ակցիայի մասնակիցները Արցախի դրոշներ փակցրեցին շրջափակված Արտգործնախարարության շենքի վրա։
«Հայաստանի նորագույն պատմության մեջ առաջին անգամ Հայաստանի թիվ մեկ պաշտոնյան Արցախի մասին, Արցախի ինքնորոշման մասին ոչ մի բառ չի ասում»,- հայտարարեց «Հայաստան» խմբակցության պատգամավոր Արամ Վարդևանյանը՝ անդրադառնալով բրյուսելյան հայտարարությանը։
«Հայաստանի իշխանությունը պետք է լինի այնպիսին, որ պաշտպանի Արցախի շահը։ Ստացվում է, որ մեր նորագույն պատմության մեջ առաջին անգամ արդեն Հայաստանի իշխանությունից պետք է պահանջենք նաև Հայաստանը պաշտպանել։ Բրյուսելյան «համաձայնությամբ» արդեն Հայաստանի սահմաններն էլ են խնդիր ունենում»,- ասաց Վարդևանյանը։
Մեր պայքարը հանուն Հայաստանի, հանուն Արցախի է ու մեր պայքարում հետքայլ չկա»,- ասաց նա։
Ցուցարարները շարունակում են շրջափակված պահել Արտգործնախարարության շենքը․ Նրանք պարբերաբար վանկարկում են՝ «Նիկոլ, դավաճան», «Առանց թուրքի Հայաստան»։
ԱԺ ընդդիմադիր պատգամավորները պատրաստվում են մտնել Արտաքին գործերի նախարարության շենք։
«Կա առաջարկություն, որ ԱԺ ընդդիմադիր պատգամավորները բարձրանան ԱԳՆ, ժողովրդի անունից պաշտոնյաներին փոխանցելու, որ իրենք երկիրը հերթական անգամ աճուրդի հանելու իրավունք և մանդատ չունեն, որ Արցախը չի կարող լինել Ադրբեջանի կազմում»,- հայտարարեց Իշխան Սաղաթելյանը։
ԱԳՆ շենքի դիմաց, մի պահ իրավիճակը լարվեց: Հրմշտոց սկսվեց, կարմիր բերետավորները սկսեցին ուժով հետ հրել ցուցարարներին: Ոստիկանների թիվը բավական մեծ է: Ցուցարարները սկսեցին վանկարկել՝ «Նիկոլ դավաճան», «առանց թուրքի Հայաստան»։ Պատգամավորների կոչով ցուցարարները մի փոքր հետ գնացին, իրավիճակը հանդարտվեց։
Չնայած ոստիկանների Աժ ընդդիմադիր պատգամավորների մուտքը ԱԳՆ խոչընդոտելու փորձերին, ժողովրդի ճնշման ներքո՝ նրանց հաջողվեց մտնել ՀՀ արտգործնախարարության շենք փոխանցելու շարժման ուղերձը։
ԱԺ ընդդիմադիր խմբակցությունների պատգամավորներին ընդունեց արտաքին գործերի նախարարի տեղակալ Մնացական Սաֆարյանը։
Նրանց հորդորին, որպեսզի փոխնախարարը պաշտոնապես հայտարարի, որ Արցախը երբեք Ադրբեջանի կազմում չի լինելու՝ փոոխնախարարը չարձագանքեց։
«Ես լսեցի ձեր մեսիջները և կարծիքները»,- ասաց Մնացական Սաֆարյանը։
«Դիմադրություն» շարժման մասնակիցները բացեցին արտաքին գործերի նախարարության շենքի վաղ առավոտից փակված մուտքերը եւ քայլերթով վերադարձան Ֆրանսիայի հրապարակ։
Այսօր ևս մեկ անգամ փաստեցինք՝ երբ միասին ենք, պինդ ենք, երբ մեր առջև խնդիր ենք դնում, այդ խնդիրը լուծելի է․ Ֆրանսիայի հրապարակում հայտարարեց Իշխան Սաղաթելյանը։
«Մի բան հստակ է՝ այն պետական կառույցները, որոնք չեն սպասարկում Հայաստանի Հանրապետության և հայ ժողովրդի շահերը, դրանց գործունեությունը պետք է արգելափակել, խոչընդոտել և դրանով ցույց տալ ժողովրդի կամքը և հասնել ամբողջական երկիշխանության»,-ասաց նա։
Նաեւ նշեց, որ երեկոյան ժամը 19։00 Սասունցի Դավթի արձանի մոտից կմեկնարկի հանրահավաքը, որից հետո երթով կշարժվեն Ֆրանսիայի հրապարակ։
Նշենք, որ ավելի վաղ, նախքան երթը Իշխան Սաղաթելյանը տեղեկացրել էր․ Այս պահին դավաճանի հրահանգով ոստիկանությունը խուզարկություններ է իրականացնում Տավուշի,Կոտայքի, Գեղարքունիքի մարզերի՝ ՀՅԴ անդամներից շատերի բնակարաններում:
«Չե՛ք մարսելու:
Չի՛ ստացվելու:
Ե՛վ հրահանգ տվողները, և՛ կատարողները պատասխան են տալու:
Կեցցե՛ հայկական «ժողովրդավարությունը»:
Հ.Գ.
Կես ժամից հանդիպում ենք Ֆրանսիայի հրապարակում:
https://youtu.be/1UfSxMlvfZM






















