Ֆրանսիայի հրապարակում այսօր երեկոյան տեղի ունեցավ քաղաքացիների հետ աշխատանքային զրույց քննարկում։ «Դիմադրություն» շարժման անդամներն ամփոփեցին այսօր տեղի ունեցած իրադարձությունները։

ՀՅԴ Հայաստանի ԳՄ ներկայացուցիչ, ԱԺ փոխնախագահ Իշխան Սաղաթելյանն անդրադարձավ Կառավարության 3-րդ մասնաշենքի մոտ ոստիկանների թույլ տված ապօրինություններին և «Դիմադրություն» շարժման պահանջին։

Յուրաքանչյուր հայ մարդ պետք է կողմնորոշվի՝ կա՛մ ժողովրդի հետ է, կա՛մ ժողովրդի դեմ, իսկ ով դեմ է՝ պետք է պատասխան տա, թե ինչու՝ նշեց նա։

«Շենքի դռները բացելու ցանկություն ունեցել ենք ու դրա համար պայքարել ենք, ու հա էլ պայքարելու ենք, որովհետև պատգամավորի դեմ դուռը փակելը ապօրինություն է»,-ասաց Իշխան Սաղաթելյանը։

Նրա համոզմամբ, փորձում են մարդկանց վախեցնել, որ հետ կանգնեն պայքարից, բայց ի պատիվ ժողովրդի վստահեցրեց, որ չի ստացվելու, չեն կարողանալու։

Դուրս եկեք, որ հայ մնաք, որ վաղը մյուս օրը ձեր թոռներին բացատրություն ունենաք տալու՝ ասաց Սաղաթելյանը։

ԱԺ «Պատիվ ունեմ» խմբակցության պատգամավոր Հայկ Մամիջանյանը նշեց, թե որն էր, մասնավորապես, կառավարության 3-րդ մասնաշենքի մոտ ոստիկանների ագրեսիվ ու բռնի գործողությունների և նրանց Նիկոլ Փաշինյանի կողմից այդպիսի հրաման իջեցնելու պատճառը։

«Փաշինյանը սարսափած էր, որ իր թիմի որոշ անդամներ չեն ունենա այն լկտիությունը, այն ակնհայտ հակահայկականությունը, որ տեսախցիկի առաջ ընդունեն, որ իրենք կողմ են, որ Հայաստանը թրքացվի։ Դրա համար միակ լուծումը շփումը թույլ չտալն էր։

Վստահաբար արձանագրենք, որ Փաշինյանը նույնիսկ իր նեղ քաղաքական թիմի վրա վստահ չէ»,- ասաց Հայկ Մամիջանյանը։

Խոսք ասացին նաեւ պատգամավորներ Արամ Վարդեւանյանը, Աննա Մկրտչյանը, Գեղամ Մանուկյանը։

Պատգամավորների ելույթներն ընդմիջվում էին այսօր Կառավարության 3-րդ մասնաշենքի մոտ ցուցարարների ու ոստիկանների միջեւ տեղի ունեցած բախման տեսանյութերով։

Վերջում Իշխան Սաղաթելյանը, բարձրանալով բեմ, հանդես եկավ օրվա իրադարձությունների եւ վաղվա անելիքների մասին ամփոփիչ խոսքով․

ՀՀ-ում գտնվող դեսպանատները, միջազգային կազմակերպություններն իրենց երկակի ստանդարտներով, իրենց լռությամբ օգնում են, որ այս խեղկատակներն ուժ կիրառեն քաղաքացիների նկատմամբ։ Բայց վստահեցնում եմ՝ որևէ պարագայում որևէ ուժ, որևէ միջոց մեր պայքարը չի կասեցնելու։

«Ոստիկանության բռնություններով, նման միջոցներով որևէ արդյունքի չեն հասնելու, խելագարի իշխանությունը պահպանել չեն կարողանալու, որովհետև հայ մարդը ոտքի է կանգնել ու գնալու է մինչև վերջ»,- ասաց Սաղաթելյանը։

Հաղթանակի հասնելու համար պայքարի դուրս եկածները, նրա խոսքով, այս ամենի միջով անցնում են ու անցնելու են։

Նիկո՛լ, ինչ սադրանք էլ անես, թույլ չենք տալու․ Երևանում արյուն չպիտի թափվի։ Ինչքան արյուն թափել ես, հերիք է։

Քեզ պետք է հեռացնենք անարյուն, ու դու պետք է գնաս»,- ասաց Իշխան Սաղաթելյանը։

Վաղը առավոտյան 11-ից կվերսկսեն անհնազանդության ակցիաները, ժամը 19։00-ին տեղի կունենա հանրահավաք։

Մանրամասները՝ տեսանյութում

https://youtu.be/KKbEywl2rlU