Երեքշաբթի, 31 Մայիս 2022-ի առաւօտեան ժամը 11:00-ին, Թեմիս Կաթողիկոսական Փոխանորդ՝ Գերշ. Տ. Խորէն Արք. Տողրամաճեանը Ազգային Առաջնորդարանի մէջ ընդունեց Արցախի Հանրապետութեան Ազգային Ժողովի նախագահ Պրն. Արթիւր Թովմասեանն ու անոր ընկերակցող պատուիրակութիւնը՝ Արցախի Հանրապետութեան Ազգային ժողովի ՀՅԴ խմբակցութեան ղեկավար եւ ՀՅԴ Արցախի Կեդրոնական կոմիտէի ներկայացուցիչ՝ Պրն. Արթուր Մոսիեանը, Արցախի արտաքին գործերու փոխնախարար՝ Տիկին Արմինէ Ալեքսանեանն ու Ազգային Ժողովի խորհրդատու անդամ՝ Պրն. Կարէն Վանեան: Անոնց կ՛ընկերակցէին նաեւ Կիպրոսի Հայ Դատի ատենապետ՝ Պրն. Յակոբ Գազանճեան ու անդամներ:

Սրբազան Հայրը բարի գալուստ մաղթելէ ետք յայտնեց, թէ Կիպրոսի Հայ գաղութը միշտ Արցախի դատին ու ժողովուրդին հետ եղած է: Ան ամփոփ տեղեկութիւններ փոխանցեց Ազգային Առաջնորդարանի ու անոր հովանիին ներքեւ գործող Ժողովներու եւ մարմիններու մասին: Հանդիպման ընթացքին Ազգային Ժողովի նախագահն ու պատուիրակութիւնը Սրբազան Հօր ներկայացուցին Արցախի պարզած ներկայ կացութիւնն ու իրենց տեսակէտները։

Նոյն օրը, երեկոյեան ժամը 18:30-ին, Ազգային Առաջնորդարանի «Վ. Իւթիւճեան» սրահէն ներս Արցախի պատուիրակութիւնը հանդիպում մը ունեցաւ Թեմիս Երեսփոխանական ու Ազգային Ժողովներու ատենապետներուն ու անդամներուն հետ: Հերթաբար խօսք առին Սրբազան Հայրը, Արցախի Ազգային Ժողովի նախագահն ու Երեսփոխանական Ժողովի ատենապետը: Ապա ներկաներուն հարցումներուն պատասխանեցին պատուիրակութեան բոլոր անդամները անդրադառնալով Արցախի ներկայ իրավիճակին, ժողովուրդի դիմագրաւած դժուարութեանց եւ հակառակ բոլոր տեսակի խոչընդոտներուն ազերիներուն կողմէ, անոնց ապրելու, գոյատեւելու եւ արարելու կամքին:

ԴԻՒԱՆ ԱԶԳԱՅԻՆ ԱՌԱՋՆՈՐԴԱՐԱՆԻ