«Առանց Նիկոլ Հայաստան»․ «Դիմադրություն» շարժման հանրահավաքը եւ բազմամարդ երթը
09 Հունիս 2022
Ֆրանսիայի հրապարակում այսօր, հունիսի 9-ին մեկնարկեց «Դիմադրություն» շարժման հանրահավաքը։
Ելույթներ ունեցան արցախյան 44-օրյա պատերազմի մասնակից, բժիշկ Հայկազ Հարությունյանը, մտավորական Լեւոն Գալստյանը, ամերիկաբնակ, քաղաքագետ Ռոբերտ Մարգարյանը, ՀՀ ԱԺ «Հայաստան» խմբակցության պատգամավոր Արամ Վարդեւանյանը, «Պատիվ ունեմ» խմբակցության պատգամավոր Հայկ Մամիջանյանը:
Տասնյակ հազարավոր կմ հեռավորությունից եկել եմ՝ ձեր կողքին լինելու։ Ձեր հետ միասին քայլում եմ Երևանի փողոցներում ու իմ ձայնը միացնում եմ ձեր ձայնին՝ պահանջելով այս ապիկար իշխանությունների հեռացումը, պահանջելով առանց Նիկլոլի, առանց թուրքի Հայաստան. իր ելույթում ասաց Ռոբերտ Մարգարյանը։
«Ինձ ոչ ոք չի խնդրել գալ, մասնակից դառնալ այս շարժմանը, ինձ թելադրել է իմ խիղճը, իմ դատողությունը։ Ես այստեղ չէի լինի, եթե դուք հրապարակ դուրս եկած լինեիք սոցիալ- տնտեսական խնդրի պատճառով։ Ես այստեղ եմ, որովհետև վտանգված է հայրենիքը: Իսկ այդ հայրենիքը միայն ձերը չէ, այդ հայրենիքը նաև իմն է, ինչպես նաև բոլոր սփյուռքահայերինը, ովքեր ապրում են աշխարհի տարբեր կետերում։ Նրանցից յուրաքանչյուրը հայ ժողովրդի մասնիկն է և ունի հայ ժողովրդի քաղաքացիություն։ Մեզ համար հայրենիքն սկսվում է Արցախով, հասնում այստեղ, շարունակվում մինչև Արևմտյան Հայաստան։ Ով փորձի դրանից մեկ մասնիկը խլել, տալ ուրիշին, նրան դեմ ենք կանգնելու Սփյուռքում։ Սփյուռքն ունի իր կարմիր գծերը, և որևէ մեկն իրավունք չունի հատել դրանք»,- ասաց Ռոբերտ Մարգարյանը»,- ասաց նա։
Ցուցադրվեց ամփոփիչ տեսահոլովակ՝ «Դիմադրություն» շարժման կազմակերպած նախորդ երկու օրերի կարեւոր գործողություններից։
«Մենք այսօր առավոտյան գնացինք ԱԳՆ եւ 3 ուղերձ փոխանցեցինք ՌԴ ԱԳՆ նախարար Սերգեյ Լավրովին .
1․ Հայ ժողովուրդը մերժում է Նիկոլի՝ Արցախի կարգավիճակի հարցում նշաձողն իջեցնելու քաղաքականությունը,
2․ Հայ ժողովուրդը չի ընդունելու որևէ լուծում, որով Արցախը կարող է լինել Ադրբեջանի կազմում,
3․ Օրվա իշխանությունները չեն ներկայացնում հայ ժողովրդի հավաքական դիրքրոշումը, մանդատ չունեն հայ ժողովրդից և նրանց հետ որևէ պայմանավորվածություն առոչինչ է»,- հայտարարեց ՀՅԴ ԳՄ ներկայացուցիչ Իշխան Սաղաթելյանը:
Իշխան Սաղաթելյանն արձագանքեց ՀՀ ԱԳ նախարար Արարատ Միրզոյանի այն հայտարարությանը, թե Հայաստանում քաղաքական ճգնաժամ չկա.
«Ելնեն օդ, իջնեն ցած, միջազգային գործընկերներին փորձեն համոզել, ցույցերց հեռու պահել, որ մեր ձայնը տեղ չհասնի, ինչ ուզում է՝ անեն․ ճգնաժամն առկա է, և այդ ճգնաժամը Հայաստանում չի վերանալու այնքան ժամանակ, քանի դեռ թուրք-ադրբեջանական ազդեցության գործակալները՝ «Ալֆայից» մինչև «Օմեգա», չեն հեռացվել այս իշխանությունից»,- ասաց նա։
Սաղաթելյանը հիշեցրեց, որ ՔՊ-ն նախաընտրական ծրագրով ժողովրդին խոստացել է․ Արցախի ինքնորոշման իրավունքի և կարգավիճակի՝ դեօկուպացիա մասին, սակայն հակառակն են արել՝ իջեցնելով Արցախի կարգավիճակի նշաձողը։
Նա նաև նշեց, որ վերջին հարցումների արդյունքով, ժողովրդի 90 տոկոսը դեմ է, որպեսզի Արցախը լինի Ադրբեջանի կազմում։
«Այս մարդիկ չեն ասել, որ տարածաշրջանում խաղաղության դարաշրջան բացելու գինը հայրենազրկումն է։ Ովքեր ասում են, որ ժողովրդի կողմից են ընտրվել, հիմա ես ասում եմ, որ ժողովրդի կողմից մերժվել են»,- ասաց նա։
Այնուհետեւ Իշխան Սաղաթելյանն առաջարկեց երթ իրականացնել Երեւանի կենտրոնական փողոցներով։ Երթը կանցնի Սայաթ–Նովա, Աբովյան, Նալբանդյան փողոցներով, ապա շարժման մասնակիցները կվերադառնան Ֆրանսիայի հրապարակ եւ կքննարկեն վաղվա անելիքները։
«Անցնելու ենք նաեւ այն հյուրանոցի մոտով, որտեղ գիշերում է Ռուսաստանի արտգործնախարար Սերգել Լավրովը, մեր ուժը ցույց տանք, մեր կամքը ցույց տանք, մեր պահանջները կրկին հնչեցնենք»,– ասաց նա։
«Նիկո՛լ, դավաճան» վակարկումներով երթի մասնակիցները մի պահ կանգ առան այն հյուրանոցի առջեւ, որտեղ իջեւանել է երկօրյա այցով Հայաստան ժամանած ՌԴ ԱԳ նախարար Սերգեյ Լավրովը։
Նրանք կանգ առան նաեւ «Մարիոթ» հյուրանոցի մոտ. երթի մասնակիցները միացրին հեռախոսի լույսերը, բռունցքները պարզած միաձայն գոչեցին՝ «Միություն, Պայքար, Հաղթանակ», «Նիկոլ, դավաճան»։
Երթը շարունակեց ընթացքը։ Քայլերթի մասնակիցներին քաղաքացիները ողջունում էին իրենց պատշգամբներից և լուսամուտներից։
Ողջ Երթի ընթացքում հնչում էին հաղթական պայքարին միանալու կոչեր, հայրենասիրական երգեր։
«Դիմադրություն» շարժման բազմամարդ երթը վերադարձավ Ֆրանսիայի հրապարակ, որտեղ հանրահավաքը շարունակվեց։
Եզրափակիչ խոսքով ելույթ ունեցավ Իշխան Սաղաթելյանը․ «Այսօրվա մեր հնչեցրած պահանջները վաղը նույնպես հնչեցնենք, ձևակերպենք, որովհետև դա շատ կարևոր է։ Մենք միասին պայմանավորվել ենք, որ Հայաստան ժամանող ցանկացած պատվիրակության մեր ձայնը պետք է լսելի դարձնենք»,– ասաց նա։
Իշխան Սաղաթելյանը նաև նշեց, որ աշխատանքային քննարկումների մեջ են, որպեսզի շարժմանը նոր թափ հաղորդեն և պայքարը վերջնական և հաղթական ավարտին հասցնեն, առաջիկայում հանդես կգան անելիքների մասին մանրամասն ծրագրային դրույթներով։
«Վաղը՝ առավոտյան ժամը 09.00-ին, կհավաքվենք Ֆրանսիայի հրապարակում, ապա մեր բողոքը կփոխանցենք ՀԱՊԿ արտգործնախարարների խորհրդի հերթական նիստի մասնակիցներին»,-ասաց նա:
https://youtu.be/9GbpEaI_6wI






























