ՀՅԴ Բյուրոյի քաղաքական ներկայացուցիչ, ԱԺ «Հայաստան» խմբակցության պատգամավոր Արմեն Ռուստամյանը Sputnik Արմենիայի եթերում անդրադարձել է Հայաստան–Ադրբեջան սահմանին ԵԱՀԿ դիտորդական առաքելության տեղակայման հարցին և խոսել այդ ֆոնին ստեղծվող մարտահրավերներից։

Վատ չէ, որ սահմանին դիտորդներ լինեն և իրականում ճշտեն, թե որ կողմն է խախտում հրադադարը, բայց դիտորդների գալուց առաջ նախ պետք է հասնել նրան, որ Ադրբեջանն իր զորքերը դուրս բերի Հայաստանի տարածքից։ Եթե չեն պահանջում, որ հստակեցվի` ինչ սահմանների մասին է խոսքը, ի՞նչն են դիտարկելու։ Sputnik Արմենիայի հետ զրույցում խոսելով Հայաստանում ԵԱՀԿ դիտորդական առաքելության տեղակայման մասին` նման կարծիք հայտնեց ԱԺ «Հայաստան» խմբակցության պատգամավոր Արմեն Ռուստամյանը։

Նրա խոսքով` գլխավոր հարցը չլուծելու դեպքում կարող է անուղղակիորեն լեգիտիմացվի ՀՀ տարածքում ադրբեջանական զինուժի գտնվելը։

Նշենք, որ ՀՀ ԱԳ նախարար Արարատ Միրզոյանը հոկտեմբերի 18-ին կայացած ասուլիսում հայտարարեց` Հայաստանը դիմել է ԵԱՀԿ-ին` Հայաստան–Ադրբեջան սահմանին դիտորդական առաքելության տեղակայման հարցով։

««Հայաստան» խմբակցության համար անընդունելի է արտաքին քաղաքականության ոլորտում ՀՀ իշխանության գործելաոճը։ Այն համակարգված չէ, այլ տարերային բնույթ է կրում։ Պահի տակ կայացվում են որոշումներ, որոնք չեն համադրվում այլ կողմերի որոշումների հետ»,–ասաց Ռուստամյանը։

Պատգամավորի կարծիքով` անհրաժեշտ է իրականացնել հայեցակարգային, հստակ և սկզբունքային քաղաքականություն, որպեսզի հայկական կողմի տեսակետները հասկանալի լինեն բոլոր կողմերի, առաջին հերթին` մեր ռազմավարական գործընկերների համար։

Կա ԵԱՀԿ Մինսկի խմբի համանախագահության ձևաչափը, որի վերականգման մասին վաղուց խոսվում է։ Հասկանալի է, որ համանախագահող երկրների միջև խնդիրներ են առաջացել, բայց ոչ ոք չի խանգարում, որ նրանց հետ տարվի այնպիսի աշխատանք, որպեսզի նրանք եթե ոչ համատեղ, գոնե առանձին հայտարարեն նույն բանը։

«Մյուս կողմից ունենք անվտանգության այլ համակարգեր։ Լավ, թե վատ` գոյություն ունի ՀԱՊԿ–ը, որտեղից նույնպես հայտարարում են դիտորդական առաքելություն ուղարկելու պատրաստակամության մասին։ Հետևաբար քայլերը պետք է այնպես համադրվեն, որ ունքը սարքելու տեղը, աչքը չհանվի։ Հայաստանից ադրբեջանական զինուժի դուրսբերումը կիրականացվի ՀԱՊԿ-ի, ԵՄ-ի, թե որևէ այլ կազմակերպության միջոցով, այդտեղ խնդիր չկա, բայց հիմնահարցը չլուծած` մյուս հարցերի մեջ մտնելը նշանակում է ինչ-որ խառնաշփոթ առաջացնել, որի պարագայում հայտնի չէ, թե դրա հետևանքները մեզ ինչ օգուտ են բերելու»,– նշեց մեր զրուցակիցը։

ԱՄՆ–Եվրոպա–Ռուսաստան եռանկյունու մեջ կան տարաբնույթ խնդիրներ, ուստի այդ ֆոնին հայկական կողմը, Ռուստամյանի դիտարկմամբ, պետք է իր հարցը ձևակերպի այնպես, որ Հայաստանի կենսական շահերը պաշտպանելու տրամաբանությամբ համագործակցենք որևէ մեկի հետ, և այդ ժամանակ մեկին մյուսով փոխարինելու խնդիր չի առաջանա։ Մեկը պետք է փոխլրացնի այն, ինչը մյուսը չի կարողանում անել։

Հիշեցնենք, որ արդեն Հայաստանում է ԵՄ առաքելության դիտորդական խմբին սպասարկող տեխնիկական անձնակազմը։ Սահմանին ԵՄ քաղաքացիական դիտորդական առաքելության տեղակայման որոշումն ընդունվել է հոկտեմբերի 6-ին Պրահայում տեղի ունեցած Փաշինյան–Մակրոն–Միշել–Ալիև քառակողմ հանդիպման ժամանակ։

Պաշտոնական հայտարարության համաձայն` առաքելության նպատակն է աջակցել տարածաշրջանում խաղաղության և անվտանգության վերականգնմանը, վստահության ամրապնդմանը և երկու պետությունների միջև միջազգային սահմանի սահմանազատմանը։