Ակնհայտ է, որ ողջ ծավալով բանակցություններ են տեղի ունենում, ակնհայտ է, որ Ալիեւը սպառնալիքի տակ փորձում է օր առաջ ձեռք բերած առավելությունն ամրագրել կապիտուլյացիայի տեսքով, եւ ակնհայտ է, որ օրվա իշխանությունը իրավիճակին համապատասխան քայլեր չի իրականացնում: Այս մասին այսօր՝ նոյեմբերի 9-ին, լրագրողների հետ զրույցում ասաց ՀՅԴ Հայաստանի ԳՄ ներկայացուցիչ, ԱԺ «Հայաստան» դաշինքի պատգամավոր Իշխան Սաղաթելյանը։

«Օրվա իշխանությունը մեր երկիրը փորձում է բերել, հասցնել անդառնալիության կետի, որը հետո դժվար է շտկել, եթե այս իշխանությունները հեռացած լինեին երկու տարի առաջ, ապա այսօր այն իրավիճակը, որ կա, չէինք ունենա»,-ասաց նա:

Հարցին, թե կա՞ վերջնական որոշում ԱԺ վերադառնալու մասին, Իշխան Սաղաթելյանն ասաց, որ վերջնական որոշման մասին խոսք չկա, կան տարբեր քննարկումներ․ «Մեր նախկին հայտարարությունը, որ ընդդիմությունը խորհրդարանում պետք է լինի իր օրակարգով, այս պահի դրությամբ որևէ բան չի փոխվել, կան տարբեր տիպի քննարկումներ, եթե լինի որոշում, ընդդիմությունն այդ մասին կհայտնի»։

Իշխան Սաղաթելյանն ասաց, որ չի ցանկանում անձնավորել, թե ով է դեմ, ով՝ կողմ, ինքը դեմ է խորհրդարան գնալուն, բայց կարևոր է ընդհանուր դիրքորոշումը, և անձնավորված դիրքորոշումները երկրորդական են․ «Մենք ասել ենք, որ եթե գնանք խորհրդարան, ապա գնալու ենք առնվազն մեր օրակարգով, Հայաստանի ու Արցախի անվտանգությանը վերաբերող օրակարգերով կգնանք, որովհետև երկրի առաջնային խնդիրը դա է: Եթե լինեն որոշումներ, դրանց մասին դուք տեղյակ կլինեք»,-ասաց նա:

Ակնհայտ է, որ նոյեմբերի 9-ի փաստաթղթով միջանցք չկա, բայց գրեթե ակնհայտ է, որ կա բանավոր պայմանավորվածություն. ասաց Իշխան Սաղաթելյանը։

«Իմ մոտ տպավորություն է, որ այո, Նիկոլը այդ ժամանակ բանավոր խոստումը տվել է եւ հիմա դա են ուզում: Ադրբեջանն անընդհատ ասում է՝ ունենք պայմանավորվածություն: Մենք դրա համար ենք ասում, որ էս մարդու գնալով այդ հարցն էլ է լուծվում, ինքն իր հետ տանում է բոլոր պայմանավորվածությունները»,-ասաց նա:

Անդրադառնալով Ալիեւի նախօրեին արած հայտարարություններին, ընդդիմադիր պատգամավորը նկատեց, որ Ալիեւը լկտիացել է, շարունակում է սպառնալ հայ ժողովրդին, Հայաստանին, որովհետեւ իշխանության ղեկին թրքահպատակ իշխանություն է:

Վերջին 4 տարիների ընթացքում, իսկ վերջին երկու տարիներին ավելի շատ մեծ ծավալներով Հայաստանի ողջ իրավական համակարգը իմ, իմ հարազատների, ընտանիքի նկատմամբ արել է՝ ինչ կարողացել է. ասաց Իշխան Սաղաթելյանը՝ անդրադառնալով տարիներ առաջ Բժշկական համալսարանից առանձնապես խոշոր չափի գույքի հափշտակության գործին, որով անցնում են բուհի նախկին ռեկտորը, նաեւ շոշափվում է իր հոր անունը:

«Իմ հարազատների շրջապատում չկան մարդիկ, որ հանցաքննված չեն, երկու ամիս առաջ խուզարկություն են արել, հորս էլ են հարցաքննության կանչել, եղբորս ու հորեղբորս տղայի վրա մեկ այլ դրվագով, իբր ցույցերի ժամանակ մարդ ծեծելու համար գործ են հարուցել: Քթները մտցրել են իմ ընտանիք, արել են ինչ կարողացել են; Ձեզ վստահեցնում եմ՝ իրենց բոլոր փորձերը՝ ինձջնից ստեղծել թալանչու կերպար, չի ստացվելու, դա անհնար է»,-ասաց Սաղաթելյանը:

Անդրադառնալով կոնկրետ այդ գործին՝ նա ասաց. «Այդ գործը ծայրից ծայր շինծու է: Այն մարդիկ, որոնց մասին խոսվում է, որեւէ մեղք չունեն այս ամենի հետ: Օրինակ, Արմեն Աշոտյանն իմ ընկերն է, այդ մասին ես հայտարարել եմ 2018-ի հուլիսի 2-ին հրապարակային: Արմեն Աշոտյանի մեղքն այս պատմության մեջ այն է, որ մենք ուսանողական տարիների ընկերներ ենք: Այս ընթացքում փորձում են շատ անմեղ մարդկանց ստիպել, ճնշել, որ ինչ-որ կեղծ ցուցմունքներ տան: Ինձ հրավիրել են այդ գործով 2 տարի առաջ:

Այս գործը 4 տարվա է, այս գործը քննել են ԱԱԾ երկու պետեր, հետո գնացվել է ՀՔԾ, հետո քննչական, հետո վերադարձել է ինչ-որ հիմնարկ: Ամեն կերպ ստիպում են, որ մի բան գտեք, մի բան արեք, էդ խեղճերն էլ ինչ կարողանում, անում են, բայց չի ստացվում: Փորձում են շեղել, ճնշել՝ չհասկանալով, որ դրա ժամանակը վաղուց անցել է: Այդ մեթոդներով չեն կարող խոսել մեզ հետ: Արա, ո՞վ են սրանք: Ուղղակի չեմ ուզում շեղվեմ, էդ հարցերից խոսեմ, որ խոսեմ, հատ-հատ բոլորին տրաքացնելու եմ, ասելու եմ՝ ով ով է, ինչ են ուզում սարքել ու չի ստացվում»,-ասաց նա: