Այսօր՝ նոյեմբերի 17-ին «Հայաստան» խմբակցության պատգամավորներ Գեղամ Մանուկյանը եւ Թադեւոս Ավետիսյանը հանդես եկան մամուլի ասուլիսով։

Նրանք ամփոփեցին շաբաթվա կարևորագույն իրադարձությունները և պատասխանեցին լրագրողների հարցերին:

«Վերջին շրջանում ավելի վառ արտահայտված են դարձել, հատկապես իշխանական պատգամավորների, տարբեր պաշտոնյաների կողմից լրատվամիջոցների, լրագրողների նկատմամբ անհարգալից վերաբերմունքը։ Վերջին մի քանի օրերին առավել խայտառակ դրսևորում եղավ, երբ լրագրողներին այլևս սպառնում են սահման ուղարկել՝ ենթադրելով, որ դա համակենտրոնացման ճամբար է»,- ասաց Գեղամ Մանուկյանը։

Նրա խոսքով, անհանգստացնող է նաև այն փաստը, որ այս ամենին տարիների շարունակ Հայաստանում խոսքի ազատության, մամուլի իրավունքի պաշտպանության գործում անուրանալի ներդրում ունեցած ՀԿ-ների կողմից որոշակի կրավորական դրսևորում կա:

«Ես որպես լրատվական ոլորտի նախկին աշխատող բոլորին կոչ եմ անում՝ ձեր իրավունքներին մինչև վերջ տեր կանգնեք։ Սա պետք է կասեցվի, հակառակ դեպքում մենք վաղը կտեսնենք շատ ավելի խայտառակ դրսևորումներ»,- ասաց պատգամավորը։

ՀՅԴ-ական գործիչն անդրադարձավ նաև «Հայաստան» խմբակցության` քառօրյային մասնակցելուն, նշելով, որ այս լիագումար նիստին մասնակցելը պայմանավորված էր նրանով, որ այն կարևոր հարցերը որոնք ունեին, որոնք տեղավորվում էին իրենց օրակարգում, այդ հարցերի շուրջ մասնակցեցին քննարկումներին և բարձրաձայնեցին իրենց տեսակետը։

Խոսելով ՔՊ-ի կողից ներկայացված 2 նախագծերին` պատգամավորը նշեց․

«Այդքան գովերգած նախագծերը լոկ փոքր դետալներ են։ 2 տարի է իշխանությունը խոսում է ԶՈՒ բարեփոխումների ռազմավարության մասին։ 2022 թվականի փետրվարին Սուրեն Պապիկյանը հայտարարեց, որ ռազմավարությունը պատրաստ է, բայց արդեն հասել ենք նոյեմբեր ամիս, դեռ գլոբալ ռազմավարությունը ներկայաացված չէ. և փոքր դետալներով փորձում են տպավորություն ստեղծել, որ արմատական բարեփոխումներ են իրականանում։ Իրականում այս նախագիծը փոխարինելու է «Ես եմ» ծրագրին, որը իշխանությունն իր հիմնավորումներում նշում է, որ չի հաջողել, նշանակում է, որ այս իշխանությունը՝ իր նշանակած Պաշտպանության նախարարներով, զինվորական վերնախավով տապալել է այդ ծրագիրը և նոր ծրագիր է առաջ բերում, որն ինքնին խնդրահարույց է»։

Նրա խոսքով՝ այդ պատճառով է, որ «Հայաստան» խմբակցությունը ձեռնպահ քվեարկեց 2 ծրագրերին, բայց հարցը մնում է օդում կախված։

Թադեւոս Ավետիսյանը իր խոսքում նշեց, որ հանրության համար ավելի պարզ լեզվով պետք է մի քանի դիտակումներ անել։ Աշխատանքի և սոցիալական հարցերի նախարարը ֆինանսների նախարարի հետ միասին մշակել է պետական բյուջեի նախագիծ, որով առաջարկում են բարձրացնել նախարարների աշխատավարձերը հաջորդ տարի 142 000 դրամով, վարչապետի աշխատավարձը բարձրացնել 200,000 դրամով, իսկ աշխատող աղքատի աշխատավարձը՝ 7000 դրամով:

«Այս թիվը ինքնին խոսուն է, էլ կարիք չկա գնահատելու, մյուս բաները, որ խոսում են, դրանք փաթեթավորումն է, որի մեջ բացելու դեպքում կտեսնենք, որ վարչապետն իր աշխատավարձը բարձրացրել է 25 տոկոսով, աշխատող աղքատի աշխատավարձը 10 տոկոսով։ Մենք խոսում ենք թվերի մասին, բայց դրանք ոչինչ չեն ասում։ Աղքատների գնողունակությունը հարաբերականորեն ավելի արագ է նվազում, որովհետև իրենց եկամուները չեն հերիքում նվազագույն կարիքները հոգալու համար։ Մյուս հանգամքը՝ խոսում են տնտեսության ակտիվությունից և հույսը դրել են, որ ռուս-ուկրանինական պատերազմի հետևանքով ձևավորված այս տնտեսական միջավայրի օգուտները դեռ կշարունակվեն հաջորդ տարի։ Դա ժամանակավոր արտաքին գործոն է, որի հետ իրենք կապ չունեն, բայց որի միջոցով մեր տնտեսությունը աճում է։ Այդ ակտիվության հենքի վրա իրենք պլանավորում են հաջորդ տարվա բյուջեն»։

Պատգամավորը նշեց, որ հիմա շատ է խոսվում ժողովրդագրական խնդիրների մասին, և այդ խնդիրները գնալով խորանում են, հատկապես՝ ծնելիության մակարդակը, արտագաղթի տեմպերը։ Դրանք որևէ կերպ չեն բարելավել, դրա փոխարեն բերել են որոշակի ծրագրեր, որոնք չունեն սոցիալական ազդեցության հստակ գնահատումներ, և փաստացի այդ ծրագրերի նպատակայնությունը դիտարկելու դեպքում, ցուցանիշները չեն լավանում, այլ՝ գնալով վատանում են։

«Մյուս մտահոգիչ փաստը գյուղատնտեսությունն է։ Իրական ծավալները հետևողականորեն նվազում են։ Պատճառներից մեկն էլ հենց սա է, որ առաջին անհրաժեշտության ապրանքների գինը էապես բարձր է, քան՝ միջին գնաճը։ Սննդամթերքը մեկ ու կես անգամ ավելի շատ է թանկանում, քան՝ միջին գնաճը, որ մեր երկրում ունենք։ Մենք գնում ենք աշխարհին հակառակ ճանապարհով, մեր երկրում 2018թ․ից հետո այս պահի դրությամբ, պարենային ապրանքների ապահովվածության գործակիցը 65 տոկոսից նվազել է մինչև 47 տոկոս։ Մեր երկիրը մինչև 2018 թ․ պարենային զամբյուղի մեջ գտնվող ապրանքների մասով ունեցել է ներքին ապահովվածություն 65 տոկոս, մեզ մնացել էր 35 տոկոս ապահովվածություն, որպեսզի ամբողջական կարողանանք ապահովվել այդ զամբյուղը։ Հիմա իջել է, որը լուրջ խնդիր է»,- ասաց նա։

ՀՅԴ-ական գործիչը շեշտում է, որ դրանք խնդիրներ են, բայց դրանց կողքին կա ահագնացող գնաճի բոլոր գործոնները, կանխատեսվում է, որ դա լինելու է նաև հաջորդ տարի, այնպես որ այն բյուջեն, որը բերել են այսօրվա իշխանությունները, դա խոսում է հետևյալի մասին, որ ամեն հաջորդ օր մեր քաղաքացիները, աշխատող աղքատները, միայնակ կեսաթոշակառուները, միայնակ մայրերը ավելի վատ են ապրելու քան դրա նախորդ օրը։

«Սրանք խնդիրներ են, որոնք ուղիղ հակասում են մեր երկրի սահմանադրական պահանջներին, մեր երկրի տնտեսական կյանքի հիմքը պետք է լինի սոցիալականը։ Մի երկու ցուցանիշ բարձրացնելով նվեր չեն անում մեր հասարակությանը, դա պետության պոզիտիվ դրական պարտավորությունն է, և ցանկացած կառավարություն պետք է դա կյանքի կոչի»,- ասաց նա։

Մանրամասները՝ տեսանյութում