Հեռուստատեսության եւ ռադիոյի հանձնաժողովը 2022 թվականի դեկտեմբերի 2-ին կայացած նիստում որոշեց հանրային մուլտիպլեքսում սլոթի օգտագործման լիցենզավորման հանրապետական սփռման իրավունք տալ 4 հեռուստաընկերության։

ՀՌՀ նախագահ Տիգրան Հակոբյանն իր խոսքում նշել էր, որ հաշվի են առնվել հեռուստաընկերությունների ֆինանսական եւ տեխնիկական բաղադրիչները։ Այսպիսով «Երկիր մեդիա» հեռուստաընկերությունը դատական հայց է ներկայացրել Հեռուստատեսության եւ ռադիոյի հանձնաժողովի դեմ, որպեսզի նախկինում 5 ազատ սլոթը, որը Հ2-ի ներկայացրած դատական հայցից հետո դարձել է 4, վերականգնվի: Դատարանը մեկ սլոթի մրցույթը չեղարկել է` հետագայում այն առանձին վիճարկելու համար:

«Երկիր մեդիա» հեռուստաընկերության տնօրեն Բագրատ Եսայանը «Հրապարակի» հետ զրույցում ասաց, որ վաղը «Երկիր մեդիա» հեռուստաընկերության եթեր հեռարձակման վերջին օրն է, սակայն եթե անջատեն հեռուստաալիքը, ապա այդ սլոթը կմնա ազատ, ՀՌՀ-ն այն չի համարում օգտագործման ենթակա:

Եսայանի խոսքով` հունվարի 21-ից «Երկիր մեդիայի» հեռուստադիտողները կարող են իրենց հետեւել միայն կաբելային TV-ների միջոցով, իսկ ահա «Երկիր մեդիայի» ներկայացրած հայցի վերաբերյալ դատարանը հունվարի 19-ին պետք է վճիռ կայացներ` հայցը բավարարեր կամ մերժեր, սակայն այդպես էլ որեւէ վճիռ դեռեւս չի կայացրել` նիստը հետաձգվել է: «Հրապարակը» զրուցել է Բագրատ Եսայանի հետ:

– Ինչո՞ւ է դատարանը ձգձգում վճիռը հրապարակելու պրոցեսը: Ի վերջո, մի քանի ժամից «Երկիր մեդիան» այլեւս եթերում չի լինի:

– Դատարանը հունվարի 19-ին պետք է որոշում կայացներ` ընդունե՞լ հայցը, թե՞ ոչ, սակայն դեռեւս պատասխան չկա: Դատական հայցը ՀՌՀ-ի դեմ է: Մենք դիմել էինք ՀՌՀ-ին, որպեսզի իր նախորդ որոշումը, որը կայացվել էր 2022-ի օգոստոսին, վերանայի: Դատարանը որոշում էր կայացրել չեղյալ համարել հինգ սլոթի արդյունքները, հեռուստաընկերությունները դիմել էին ՀՌՀ-ին` եթերը չանջատելու խնդրանքով, նկատի ունենալով քաղաքացու տեղեկություն ստանալու իրավունքը: ՀՌՀ-ն TV-ների այդ դիմումը բավարարել էր: ՀՌՀ-ի որոշումը հետեւյալն էր` մինչեւ հինգ սլոթների ամփոփումը դատարանի որոշմամբ լիցենզիայից զրկված հինգ հեռուստաընկերություններին թույլատրել եթեր հեռարձակելու իրավունք, սակայն 2022-ի դեկտեմբերին մրցույթ հայտարարվեց չորս հեռուստաընկերության համար, հինգերորդ սլոթը մնաց մրցույթից դուրս, քանի որ կիրառվել էր արգելանք: Փաստացի հինգերորդ սլոթն արգելանքի տակ է այսօր, եւ այն, մեր կարծիքով, կարող է օգտագործել «Երկիր մեդիան»: Մենք դիմել էինք, որպեսզի հանձնաժողովը մեր եթերը չանջատի, քանի որ սլոթն ազատ է, սակայն մեզ մերժել են: Դիմել ենք դատարան:

– Այսինքն` կա ազատ սլոթ, սակայն ՀՌՀ-ի քմահաճությամբ այն չի տրամադրվում «Երկիր մեդիային»: Արգելանքի պատճառը ո՞րն է:

– Այո, սլոթն ազատ է, դրանով ոչինչ չի հեռարձակվելու:

– Ըստ Ձեզ` ինչո՞ւ է Տիգրան Հակոբյանի ղեկավարած ՀՌՀ-ն նման որոշում կայացրել: Սա քաղաքակա՞ն քայլ է:

– Հինգերորդ սլոթն արգելանքի տակ է հայտնվել: Սլոթն ազատ է մնալու այնքան ժամանակ, մինչեւ նոր մրցույթ հայտարարվի:

– Փաստորեն, ՀՌՀ-ն նախընտրեց «Կիսաբաց լուսամուտներ» հեռարձակող, հնդկական սերիալներ ցուցադրող TV-ներին, սակայն ոչ «Երկիր մեդիային»: Հատկանշական է, որ ՀՌՀ անդամների շարքերում կան, այսպես կոչված, մտավորականներ: Օրինակ, գրող, մշակույթի նախկին նախարար Հակոբ Մովսեսը, ով զօրուգիշեր պայքարում էր աղավաղված խոսքի եւ անճաշակության դեմ, այսօր փաստացի նախընտրում է վերոնշյալ ցածրորակ պրոյեկտները, սակայն ոչ ձեզ: Ինչո՞ւ:

– Բնականաբար, պատճառը քաղաքական է: Որոշումն ամբողջությամբ տեղավորվում է այս իշխանությունների քաղաքական մոտեցումներում: Ես այլ բան չեմ կարող ասել:

– Ե՞րբ կանջատվի հեռուստաալիքը:

– Հունվարի 21-ին: Մեր հեռուստադիտողները կարող են հետեւել մեզ կաբելային ցանցերի միջոցով: Եթեր վերադառնալու պայքարը շարունակվելու է:

Հայկ Գևորգյան