Աբսուրդ է այն, որ քննարկվելու է Սեյրան Օհանյանի հարցը ու ներկայացվել է մի միջնորդություն, որին ինքը փաստորեն իրավունք չունի ծանոթանալու։ Այս մասին այսօր՝ փետրվարի 2-ին, լրագրողների հետ ճեպազրույցի ժամանակ, անդրադառնալով Գլխավոր դատախազի կողմից Սեյրան Օհանյանին անձեռնմխելիությունից զրկելու վերաբերյալ ԱԺ նախագահին ուղարկված միջնորդությանը, ասաց ՀՅԴ ԳՄ անդամ, «Հայաստան» խմբակցության քարտուղար Արծվիկ Մինասյանը։

«Թե ինչու է գաղտնի, այդ որոշումը կայացնողը քննչական մարմիններն են ու ԱԱԾ-ն։ Սա հերթական, մամուլում շատ հայտնի դեպքերից մեկն է, որտեղ նորից փորձ է արվում մեղք բարդել հաղթած բանակի գեներալի, նախկին պաշտպանության նախարարի վրա։ Սա ակնհայտ, ոչ միայն իրավական առումով անգրագիտություն է, նաև քաղաքական առումով ուղղորդված քայլ։ Եթե այս գործի միայն քրեաիրավական մասը նայենք, ապա մեղադրանքը չի բավարարում նույնիսկ նվազագույն պահանջներին: Ներկայացված է ձեւակերպում, որ ապացույցների ամբողջական, համակողմանի, փոխլրացնող ձեւակերպումներով, որով իբր հաստատված է համարվել Սեյրան Օհանյանի կողմից հանցագործության կատարումը: Այն էլ ոչ ավել, ոչ պակաս, հանցակիցների հսկայական կազմով: Մեղադրում են, որ իբր «Դողագգործ» ընկերության մի շարք անշարժ գույքեր հափշտակության միջոցով այլ անձի սեփականությունը դարձնելու նպատակով ձեռնարկել է ապօրինի գործողություններ: Այդ գույքերը, որոնց մասին խոսվում է, որոնց արժեքը 1,3 մլր դրամ է, որը ձեռք է բերել ՊՆ-ն՝ հետագայում8,5 մլրդ դրամով վաճառելու մասնավոր անձին, երբ մեղադրանքը կարդու ես աբսուրդ է»,- ասաց Մինասյանը։

Խոսելով «Հայաստան» խմբակցության պատգամավոր Արմեն Չարչյանի դեմ հարուցված քրեական վարույթից, Մինասյանը այն ևս իրավական առումով անգրագիտություն որակեց՝ համարելով հստակ քաղաքական ուղղորդում ունեցող գործ։

«Այն կապված է՝ «Հաց բերողի» գործի հետ, որ իբր թե կեղծ բժշկական եզրակացություն է տվել։ Արմեն Չարչյանը եղել է փորձագետներից մեկը, շարժվել է կարգավորումների համաձայն և քննիչի տված հանձնարարականների շրջանակներում։ Այդ գործին, որ ծանոթանում ես, որևէ մեկը չկա, միայն Չարչյանն է, ամբողջ գործի մեջ նա այն սև կերպարն է, որի եզրակացությունը իբր պատճառ է դարձել նման ծանր հետևանքի»,- ասաց Արծվիկ Մինասյանը։

Այն, որ Նիկոլ Փաշինյանը հենց սկզբից ասպարեզ է նետում մի թեզ ու բոլորով սկսում են այդ թեզը պաշտպանել, սա կասկած է հարուցում. նշեց Արծվիկ Մինասյանը՝ անդրադառնալով Ազատ գյուղում գտնվող զինվորների կացարանի ողբերգական հրդեհին, որին զոհ գնաց 15 զինվոր:

«Քննությունը չավարտված, գոնե ակտիվ փուլ չմտած, ո՞նց են իրենց իրավունք վերապահում նման մեղադրանքներ հնչեցնելու:

15 զինվոր մի գիշերվա մեջ մոխրացնել ու սրա համար գլուխ չխոնարհել, ներողություն չխնդրել, սրա համար գլուխները պատով չտալ, ելել անընդհատ հիմար թեզեր մեջտեղ բերել, սա խոսում է այն մասին, որ էս մարդկանց համար ոչ միայն օրինականությունն է ոչ մի բան, այլև մարդկային արժեք, կյանք, հայրենիք»,-ասաց նա:

Հարցին, թե ինչո՞վ են պայմանավորված դեպքի վերաբերյալ հնչող հայտարարություններում առկա հակասությունները, ընդդիմադիր պատգամավորը պատասխանեց. Հավանաբար որոշ անձանց կաշիները փրկելու անմոռաց ձգտումով: Ի՞նչ է նշանակում Սուրեն Պապիկյանի կամ Նիկոլ Փաշինյանի պահվածքը, որ մի անգամ դեպքի վայր չեն այցելում, ընտանիքներին չեն այցելում: Ի՞նչ բարոյական ու քաղաքական իրավունք ունեն սրանք անընդհատ ինչ-որ մարդկանց մեղադրել»:

Նա նշեց, որ ընդդիմադիր գործիչները փորձ արել են այցելել դեպքի վայր, բայց իրենց մուտքն արգելել են: «Ի դեպ, հիմա էլ մեր պաշտպանության հանձնաժողովի անդամները ցանկություն ունեն զորակոչային շրջափուլում գնալ, ծանոթանալ, օգնել, օժանդակել, մերժումներ ենք ստանում: ՊՆ-ն մերժում է»,-ասաց Մինասյանը:

Մանրամասները՝ տեսանյութում