Երևանում այսօր մեկնարկել է ՀՅԴ Երիտասարդականի Համաշխարհային համագումարը: Մինչ ելույթները համագումարի մասնակիցները հոտնկայս ունկնդրեցին Հայաստանի, Արցախի օրհներգները, ՀՅԴ քայլերգը, ապա մեկ րոպե լռությամբ հարգեցին հայրենիքի պաշտպանության գործում, բոլոր ժամանակներում ազգային ազատագրական պայքարում զոհվածների հիշատակը։

Համագումարի նպատակն է քննարկել ու հստակեցնել առաջիկա չորս տարիների գործունեությունը։

«Այս համագումարը տեղի է ունենում հայ ժողովրդի համար ճակատագրական շրջանում։ Այսօրվա մարտահրավերներն ու վտանգները լի են պետականակործան ու ազգակործան հետևանքներով։ ՀՅԴ երիտասարդական միությունն իր աշխույժ գործունեությամբ պետք է կարողանա դիմակայել այս վտանգներին և հակառակ տիրող աննպաստ պայմաններին հանձնառու է հզոր, ժողովրդավար, ընկերվար ու նմանատաիպ այլ արժեքներ կրող պետություն կերտել։ Հավատում ենք, որ հայրենիքի շուրջ ստեղծված անվտանգային ծանր իրավիճակը հաղթահարելու համար մեր իրականությունից պետք է արմատախիլ անել հարմարվողականությունն ու պարտվողական մոտեցումները»,-իր ելույթում ասաց ՀՅԴ Բյուրոյի անդամ Հովսեփ Տեր-Գևորգյանը, ավելացնելով, որ ՀՅԴ երիտասարդական միությունը պետք է շարունակի դիմակայել ու ընդդիմանալ Հայաստանի ներկա իշխանությանը։

Նա հիշեցրեց, որ վերջին ամիսներին իշխանությունը արգելել է դաշնակցական գործիչների, երիտասարդների մուտքը Հայաստան։

«Նիկոլ Փաշինյանի վարչախումբն իր հակադաշնակցական մոլուցքով փորձեց դարձյալ հարվածել հայկական հիմնական երիտասարդական կազմակերպությանը, որը պայքարում է թուրքի, ազերիի նկրտումների դեմ։

«Այո, մենք խանգարում ենք այս իշխանությունների քաղաքականությանը, արգելք ենք, որ Հայաստանը դառնա թրքական վիլայեթ, և մեր պայքարը չպետք է կանգ առնի։ Եվ ոչինչ չի կարող մեզ շեղել մեր նպատակներից»,-ասաց Տեր-Գևորգյանը։

Իր խոսքում նա ցավով փաստեց, որ համագումարին չեն մասնակցում շրջափակված Արցախում գտտնվող իրենց ընկերները։

«Այս խորհրդաժողովը պետք է տեղի ունենար Արցախում»,-ասաց նա՝ նշելով, որ դրանով պետք է ցույց տային՝ արցախցու կողքին են, պետք է ծանոթանային իրավիճակին ու մշակեին օժանդակության ծրագրեր։

Դաշնակցական գործիչն ընդգծեց՝ Արցախը Հայաստանի զրահաբաճկոնն է, ու պատրանք է այն միտքը, թե կարելի է առանց Արցախի խաղաղ ու հանգիստ ապրել Հայաստանի տարածքում։

«Արցախում նոր ցեղասպանությունը կանխելու և մեզ պատկանող հավելյալ տարածքներ չկորցնելու, գրավված Շուշին ու Հադրութն ազատագրելու համար նորօրյա ազատագրական պայքարի կենսավորումը հրամայական է։ Երբ հայկական պետությունը հրաժարվել է այս պատասխանատվությունից, հանձնառու հայ երիտասարդությունը պետք է ստանձնի այս առաքելությունը և պարտադրի հայ ժողովրդին ինքնապաշտպանության ու արժանապատվության հաստատման օրակարգը»,-ասաց նա։

Համագումարը համախմբում է 40-ից ավելի ՀՅԴ երիտասարդական, ուսանողական և պատանեկան միությունների վարչությունների ներկայացուցիչներին` քննարկելու և համադրելու առաջիկա քառամյակի գործունեությունն ու աշխատանքները: Այն կշարունակվի մինչև փետրվարի 10-ը։ Համագումարի շրջանակում միջոցառումներ տեղի կունենան նաև Սյունիքում։

ՀՅԴ Երիտասարդականի Համաշխարհային համագումարի բացման պաշտոնական արարողությանը ելույթներ ունեցան ՀՅԴ Բյուրոյի Երիտասարդական գրասենյակի պատասխանատու Արշակ Մեսրոբյանը, ՀՅԴ անդամ, «Հայաստան» խմբակցության պատգամավոր Արգիշտի Գևորգյանը, ՀՅԴ երիտասարդական կառույցի անդամ Գոռ Սարգսյանը, ՀՅԴ «Նիկոլ Աղբալյան» ուսանողական միության վարչության ներկայացուցիչ, «Արցախի համար» նախաձեռնության անդամ, 44-օրյա պաետրազմի մասնակից, բժիշկ Հայկազ Հարությունյանը:

Համագումարի բացմանը տեսաուղերձ հղեց ՀՅԴ Արցախի Երիտասարդական միությունը։

«Արդեն իսկ 56 օր է,ինչ Արցախը պաշարված է թշնամու կողմից, ինչի պատճառով էլ ցավոք չկարողացանք հյուրընկալել մեր կողմից այդքան սպասված համաժողովին, որը պատերազմից հետո Արցախում կայանալիք ամենամեծ համագումարը պետք է լիներ՝ Արցախի, Հայաստանի և Սփյուռքի երիտասարդների մասնակցությամբ։

Աշխարհում տեղի ունեցող փոփոխություններն ակնթաթային են, թշնամու քայլերն անսպասելի․ այսօր մենք՝ արցախցիներս կրելով այդ զրկանքները պայքարում ենք առաջին հերթին ՀՀ ինքնիշխանության պահպանման, սփյուռքահայության ինքնության պահպանման համար․ այսօր մեր պայքարը հայ ազգի գոյության համար է․ ինչպես միշտ, այնպես էլ այս օրերին ականատատես ենք լինում համամարդկային արժեքներ քարոզող երկրների ու ժողովուրդների՝ մեզ ուղղված սիրալիր ու սրտամաշ խոսքերին, որոնք մեզ համար ոչ այլ ինչ են, քան՝ ոչինչ․․․»