Ադրբեջանի կողմից Հակարիի կամուրջը փակելն ու անցակետի տեղադրումը Նոյեմբերի 9-ի Եռակողմ հայտարարության համապատասխան կետերը չպահպանելու քաղաքականության շարունակությունն է: Այս մասին ապրիլի 24-ին Ստեփանակերտի հուշահամալիրում ասաց ՀՅԴ Բյուրոյի անդամ, Արցախի Հանրապետության Ազգային ժողովի ՀՅԴ խմբակցության պատգամավոր Դավիթ Իշխանյանը:

«Պետք է ասեմ, որ սպասելի էր: Կարծում եմ, քաղաքական գործիչները և պետական այրերը պետք է կանխատեսեին: Սա, բնականաբար, 2020 թվականի սեպտեմբերի 27-ի քաղաքական վարքագծի շարունակությունն է, երբ Ադրբեջանը Թուրքիայի գործակիցը լինելով, պատերազմ սանձազերծեց: Ադրբեջանն ամեն ինչ անում է չակերտյալ խաղաղության պայմանագիրը ստորագրելու Հայաստանի հետ՝ դրանով Արցախյան հարցին վերջակետ դնելու միտումով: Կարծում եմ, երեկվա քայլը Արցախի հիմնահարցը վերջնականապես մոռացության տալու ակտ էր, որը չպետք է աննկատ մնա ոչ միայն մեր իշխանությունների, այլև տարածաշրջանում շահագրգիռ դերակատարների կողմից»,-հավելեց Դ. Իշխանյանը:

Անդրադառնալով Հայոց ցեղասպանության զոհերի հիշատակի օրվա խորհրդին՝ նա նշել է, որ Թուրքիայում 100 տարվա ընթացքում բազմաթիվ իշխանություններ են փոխվել, բայց թուրքական քաղաքականությունը մնացել է նույնը: «Թուրքական քաղաքականությունը, որդեգրելով պանթյուրքիզմի և թուրանական պետության ռազմավարությունը, ոչ մի խոչընդոտի առջև կանգ չի առնում: Ինչպես 108 տարի առաջ, այնպես էլ վերջին 30 տարիների ընթացքում թուրքական պետությունն իրականացնում է ագրեսիվ քաղաքականություն ոչ միայն տարածաշրջանում, այլև աշխարհաքաղաքական առումով:

Թուրքական քաղաքականության առաջին զոհերից մեկը, ինչպես 20-րդ, այնպես էլ 21-րդ դարասկզբին, հայ ժողովուրդն է: Անշուշտ, եթե 100 տարվա ընթացքում թուրքական քաղաքականությունը չի կարողացել իր նպատակին հասնել, նշանակում է, որ խոչընդոտներ եղել են: Այդ շրջանակում պետք է դիտարկել նաև Արևմուտք-Արևելք, Հյուսիս-Հարավ ընդհանուր շահերն ու հակասությունները: Խոսքը Արևմուտքի և Ռուսաստանի, Ռուսաստանի և Պարսկաստանի մասին է:

Թուրքական քաղաքականությանը խոչընդոտելը պետք է համընկնի հայկական քաղաքականության շահերին: Սա կարևոր է, որպեսզի մենք ճիշտ ընկալենք, թե ինչպիսի զարգացումներ կարող են լինել»,-ասել է պատգամավորը՝ շեշտելով, որ ըստ այդմ պետք է իրատեսական կանխատեսումները կատարել և ունեցած սահմանափակ հնարավորություններով ճիշտ ռազմավարություն մշակել:

Դավիթ Իշխանյանը կարևորել է օրվա իշխանությունների ընդհանուր քաղաքականությունը, այն տեսանկյունից, թե ինչպիսի սկզբունքների վրա է ձևավորվում: «Պիտի անդրադառնամ նաև պահանջատիրությանը, ինչը կարևոր սկզբունք է: Պատահական չէ, որ տասնամյակներ շարունակ խոսում էինք պահանջատիրության մասին: Ցավոք, ցեղասպանության ճանաչման գործընթացին զուգահեռ չէինք խոսում հատուցման մասին: Բայց վերջին տասնամյակներում հատուցման պահանջները դարձրել ենք առօրյա խնդիր: Կարծում եմ, ճանաչումը և հատուցումն այն կարևոր բաղադրիչներն են, որոնք պետք է ընդունել որպես ընդհանուր քաղաքական ուղղություն»,-մանրամասնեց Արցախի Հանրապետության ԱԺ պատգամավորը՝ հավելելով, որ Հայաստանի Հանրապետությունը և իր իշխանությունները, պարտավոր են տեր կանգնել հայության շահերին, իրավունքներին:

Գայանե Գևորգյան