ՀՀ ԱԺ «Պատիվ ունեմ» խմբակցության քարտուղար Տիգրան Աբրահամյանը, «Հայաստան» խմբակցության պատգամավորներ Արթուր Խաչատրյանն ու Քրիստինե Վարդանյանն ապրիլի 25-ին ընդունել են Եվրոպական խորհրդարանում Հայաստանի հետ բարեկամության խմբի նախագահ, կիպրոսցի պատգամավոր, խորհրդարանի ԵԺԿ քաղաքական խմբի անդամ Լուկաս Ֆուրլասին եւ նրա գլխավորած պատվիրակությանը:

Քննարկվել են Հայաստանի անվտանգությանը եւ Լեռնային Ղարաբաղում տիրող իրավիճակին վերաբերող հարցեր:

Խոսելով Արցախի Հանրապետությունում ստեղծված իրավիճակի մասին` «Հայաստան» խմբակցության պատգամավոր Արթուր Խաչատրյանը նշել է, որ Ադրբեջանը շարունակում է իր ցեղասպան քաղաքականությունը` ձգտելով հայաթափել Արցախը: Պատգամավորը նշել է, որ առանց արցախյան հակամարտության արդարացի լուծման հնարավոր չէ տարածաշրջանում երկարատեւ խաղաղություն հաստատել: Նա նաեւ հավելել է, որ Հայաստանը Եվրոպական խորհրդարանից գործուն քայլեր է ակնկալում. մասնավորապես, որպեսզի կառույցը ճնշում գործադրի ԵՄ գործադիր մարմինների վրա, որ նրանք հարկադրեն Ադրբեջանին կատարել Արդարադատության միջազգային դատարանի վճիռը:

«Պատիվ ունեմ» խմբակցության քարտուղար Տիգրան Աբրահամյանը հյուրերի ուշադրությունն է հրավիրել Արցախի շրջափակմանը: Ըստ պատգամավորի` դա քաղաքական խնդիր է, որի հետեւանքով հումանիտար խոր ճգնաժամ է առաջացել: Խորհրդարանականը հայտնել է նաեւ, որ Ադրբեջանն ուզում է էթնիկ զտում իրականացնել Արցախում:

Եվրոպական խորհրդարանում Հայաստանի հետ բարեկամության խմբի նախագահ Լուկաս Ֆուրլասը տեղեկացրել է, որ այցի ընթացքում եղել է Սյունիքի մարզում, արձանագրել ադրբեջանական առաջխաղացումները: Այդ համատեքստում Եվրոպական խորհրդարանի պատգամավորը վստահեցրել է հայ գործընկերներին` ՀՀ-ում ստեղծված իրավիճակի ու խնդիրների մասին զեկույց է պատրաստելու եւ ներկայացնելու է ինչպես Եվրոպական խորհրդարանին, այնպես էլ Եվրահանձնաժողովին: