«Այն, որ Հայաստանի Հանրապետության ղեկին գտնվում է հակահայ, դավաճան իշխանություն, կարծում եմ, երեկվանից հետո արդեն բոլորի համար պիտի պարզ լինի։ Սա պիտի պարզ լինի արդեն ՀՀ այն քաղաքացիների համար, որոնք մինչև հիմա կասկածում էին։ Ակնհայտ է պարզապես, որ խոսքը միայն Արցախի մասին չէ։ Այն, ինչի մասին խոսում է Նիկոլ Փաշինյանը, ակնհայտ է, որ դրանից հետո Հայաստանի պետականության գոյությունը լինելու է հարցականի տակ». Ազգային ժողովում լրագրողների հետ ճեպազրույցի ժամանակ հայտարարեց ՀՅԴ Հայաստանի ԳՄ ներկայացուցիչ, «Հայաստան» խմբակցության պատգամավոր Իշխան Սաղաթելյանը։

«Մի բան պիտի շատ հստակ լինի։ Արցախն ու Հայաստանը Նիկոլ Փաշինյանինն ու ՔՊ-ինը չեն։ Այո, նորից եմ ասում, որ պայքար լինելու է։ Պիտի քննարկենք՝ որտեղ են եղել մեր բացթողումները, ինչ պիտի անեինք, որ չենք արել անցած տարի այս ժամանակահատվածում։ Շտկելով նախորդ երկու փորձերի ժամանակ մեր բացթողումները՝ ունենալ ավելի համապարփակ ծրագիր: Սա է հիմա խնդիրը: Այս պահին շատ հասկանալի պատճառներով դետալների մասին չեմ խոսելու: Այն տպավորությունը, թե այս իշխանությունը մարսելու է նոր կապիտուլյացիայի փաստաթուղթը, ես ձեզ վստահեցնում եմ, որ չի մարսելու: Առնվազն մենք, ինչ հնարավոր է, անելու ենք դրա համար: Կան բազմաթիվ ազգային ուժեր, որոնք ներգրավվելու են այդ գործընթացին: Մենք որևէ ամբիցիա չունենք, ցանկացած արդյունավետ գործընթացում պատրաստ ենք և՛ լինել թիվ մեկ պատասխանատուն, և շարքային զինվոր: Մեր գլխավոր նպատակը մեր հայրենիքն է ու այս թրքահպատակ իշխանության հեռացումը: Այս իշխանությունների դեմ ցանկացած գործընթաց, գործողություն լեգիտիմ է, քանի որ իրենք լեգիտիմ չեն», – նշեց նա:

ՀՅԴ-ն պատրաստ է ներգրավվել ցանկացած արդյունավետ պրոցեսի մեջ՝ թիվ մեկ պատասխանատվությունը ստանձնելով՝ շարքային զինվորի կարգավիճակով։ Մենք որևէ ամբիցիա չունենք, մեր գլխավոր խնդիրը մեր հայրենիքն է։ Այս իշխանությունների դեմ ցանկացած գործողություն լեգիտիմ է։ Իրենք չեն արտահայտում հայ ժողովրդի կամքը։ Ցանկացած գործողություն այս իշխանություններից ազատվելու լեգիտիմ է։ Դա կլինի անհնազանդություն, դա կլինի ապստամբություն»,- հավելեց նա։

«Եթե հիշում եք, վերջին 3 տարիներին, անցած տարի հենց այս օրերին այս վտանգների մասին մենք բարձրաձայնել ենք: Ըստ էության, Նիկոլ Փաշինյանը վերջին օրերին հրապարակել է Արցախը և Հայաստանը հանձնելու ճանապարհը և ժամանակացույցը: Ինձ թվում է, մայիսի 25-ին Մոսկվայում հանդես կգան եռակողմ ինչ-որ հայտարարությամբ, որից հետո այդ ամեն ինչը կշարունակվի Քիշնևում, այնուհետև Բրյուսելում կփորձի պայմանավորվել կապիտուլյացիայի նոր պայմանագրի շուրջ: Հոկտեմբերի հանդիպման մասին ևս հայտարարվել է, կփորձեն ունենալ ամբողջական կապիտուլյացիայի պայմանագիր, այնուհետև այն կվավերացնեն: Ըստ էության՝ ՀՀ բոլոր քաղաքական ուժերը, հայ ժողովուրդը, մտահոգ քաղաքացիները ունեն ընդամենը 5-6 ամիս երկիրը հանձնելու գործընթացը կասեցնելու համար», – շեշտեց Սաղաթելյանը:

Անդրադառնալով ընդդիմության գործողություններին՝ նա ասաց որ չեն համակերպվելու ստեղծված իրավիճակի հետ և պայքարելու են մինչև վերջին շունչը:

«Այն բոլոր խոսակցությունները, թե ընդդիմությունը հեռացել է իր օրակարգից, պայքարը դադարեցրել է, ես ձեզ վստահեցնում եմ, որ այդպես չի լինելու»,-ասաց Իշխան Սաղաթելյանը և պնդեց, որ նախորդ տարվա պայքարը հետաձգել է Փաշինյանի այսօրվա սկսած գործընթացները, իսկ առաջիկայում Հայաստանում և Սփյուռքում համախմբելու են ժողովրդին և դուրս են գալու պայքարի:

Փաշինյանի խոսքերը ՀՀ պետականության գոյությունը դնում է վտանգի տակ»,-ասաց նա: