Արցախի Ազգային ժողովի նախագահի պաշտոնում Դավիթ Իշխանյանի նշանակումը քաղաքական ուղղության փոփոխության, ինքնորոշման եւ արցախահայության իրավունքների վերաբերյալ հստակեցման եւ լայնածավալ աշխատանքի փորձ է ոչ միայն Արցախում, այլեւ Հայաստանում եւ աշխարհում. NEWS.am-ի հետ զրույցում ասաց ՀՅԴ Հայաստանի ԳՄ անդամ, «Հայաստան» խմբակցության պատգամավոր Գեղամ Մանուկյանը։

«Դաշնակցությունն Արցախում իշխանություն չի ստացել, ուղղակի Դավիթ Իշխանյանն ընտրվել է Արցախի խորհրդարանի նախագահ։ Հայաստան-Արցախ-Սփյուռք եռամիասնությունը երկար ժամանակ չէր գործում, եւ հիմա կենսական անհրաժեշտություն է դա վերականգնելը, որի մեջ Դաշնակցության դերը լինելու է վճռական։ Մենք միշտ ենք ասել՝ էական չէ, թե քանի պատգամավոր ունենք Հայաստանի եւ Արցախի խորհրդրաններում, Դաշնակցության խոսքը շատ ավելի տարողունակ է»,- նշեց Մանուկյանը։

Մանուկյանի խոսքով՝ Արցախի նախագահ Արայիկ Հարությանի աջակցությունն Իշխանյանի ընտրության հարցում որեւէ կերպ չի փոխել Դաշնակցության վերաբերմունքը Հարությունյանի նկատմամբ։

«Ինքը պետք է պարզաբանումներ տա մի շարք հարցերի վերաբերյալ՝ սկսած ընտրությունների օրը ՔՊ-ի նախընտրական շտաբում լինելուց՝ ավարտած Հայաստանի իշխանության դավաճանական քաղաքականությանը գնահատական չտալուց։ Արայիկ Հարությանը պետք է օդի մեջ արտահայտությունները մի կողմ դնի եւ ճիչ հնչեցնի՝ Հայաստանի իշխանությունն օր օրի բարդացնում է Հայաստանի վիճակը։ Բայց այստեղ աջակցությունը լոկ Արայիկ Հարությանինը չի եղել, եղել է խմբակցություններին»,- ընգծեց Մանուկյանը։

Նա նշեց, որ իրեն չի հետաքրքում, թե ինչու է Սամվել Բաբայանի «Միասնական հայրենիք» խմբակցությունը դեմ քվեարկել Իշխանյանի թեկնածությանը․ «Նրա աղմկահարույց հայտարարությունները անզեն աչքով տեսանելի են դարձնում համագործակցությունն այս իշխանության հետ»։

Հարցին, թե եղել են մարդիկ Դաշնակցությունում, որոնք դեմ են եղել Իշխանյանի թեկնածությանը, Մանուկյանը պատասխանեց․ «Դաշնակցությունում լինում են քննարումներ, մտքի բախումներ, հետո բյուրեղացում եւ որոշման ընդունում, որը պարտադիր է ամբողջ Դաշնակցության համար»։