Այս իշխանությունների քաղաքական կրեդոն մեկն է՝ իրենք որեւէ բանում մեղավոր չեն եւ ժամանակի ու տարածության մեջ մեղավորներ փնտրելը. հոկտեմբերի 3-ին, Աժ-ում լրագրողների հետ զրույցում նշեց ՀՅԴ անդամ, «Հայաստան» խմբակցության պատգամավոր Արթուր Խաչատրյանը:

«Ասում են՝ Արցախում տեղի ունեցավ իշխանափոխություն եւ դրա համար Ադրբեջանը հարձակվեց: Ոչ, Ադրբեջանը հարձակվեց Արցախի Հանրապետության վրա, որովհետեւ դեռեւս անցյալ տարի այս օրերին Փաշինյանը ի լուր աշխարհի հայտարարեց, որ ճանաչում է Ադրբեջանի գերիշխանությունը Արցախի Հանրապետության նկատմամբ՝ չունենալով դրա որեւէ իրավունք: Դա թե Հայաստանի օրենսդրությունն է արգելում, իսկ Արցախի օրենսդրությունը նման լիազորությունը ՀՀ վարչապետին չի տալիս: Նա դա կրկնեց այս տարվա մայիսին Բրյուսելում: Հիշեցնեմ, որ այդ հայտարարությունից հետո Ադրբեջանը շրջափակեց Արցախը, հետո դա վերածվեց պաշարման:

Դուք ՀՀ իշխանության վարքագիծը նայեք, երբ Ադրբեջանը հարձակում գործեց Արցախի դեմ: ՀՀ ՊՆ-ն ցինիկաբար հայտարարություն էր տարածում, թե մեր սահմաններին ամեն ինչ լավ է, իսկ Փաշինյանը հայտարարում է, որ այս փորձությունների միջով մենք անցնում ենք հանուն Հայաստանի: Հայաստանը Պիղատոսի նման իր ձեռքերը լվաց, փակեց դռներն ու պատուհանները, աչքերն ու ականջները, որպեսզի չտեսնի, թե ինչպես ադրբեջանցիներն ու թուրքերը կոտորում հայերին Արցախի Հանրապետությունում»,- հայտարարեց ընդդիմադիր պատգամավորը:

Հարցին, թե ինչու Ադրբեջանի հարձակումը տեղի ունեցավ այն ժամանակ, երբ Արայիկ Հարությունյանը հրաժարական տվեց Արցախի նախագահի պաշտոնից, նա պատասխանեց. «Արայիկ Հարությունյանը բազմաթիվ անգամ ցանկանում էր հրաժարական տալ, ինքն արդեն որեւէ ղեկավարում չէր իրականացնում Արցախում: Նախագահը ճգնաժամի այդ պայմաններում գնում վրանում նստացույցի է մասնակցում: Արցախի նախագահը եւ ԱԺ նախգահը կամավոր հրաժարական տվեցին, եւ Արցախի ժողովուրդը, օգտվելով իր իրավունքներից, նոր իշխանություն ձեւավորեց: Ինչո՞ւմ է խնդիրը: ՔՊ-ականներն ուղղակի մարդկանց ենթագիտակցության վրա ազդում են, որ ցանկացած փոփոխություն Հայաստնում կբերի պատերազմի Ադրբեջանի հետ: Այսինքն նա ասում է՝ կամ ես կլինեմ վարչապետ, կամ Հայաստանը չի լինի: Սրանով նա ասում է, որ պատրաստ է Հայաստանը դարձնել խամաճիկային երկիր, լինի մարիոնետային կառավարություն, որովհետեւ միայն այս պայմաններում Ադրբեջանը հարձակում չի սկսի: Ինչի՞ սկսի, եթե Հայաստանը բոլոր պահանջների առաջ ընկրկում է»:

Խոսելով ՔՊ-ի կողմից ԱԺ-ում Հռոմի ստատուտի վավերացման մասին, ասաց՝ Հայաստանի կողմից դա թշնամական քայլ է Ռուսաստանի դեմ:

«Դա թշնամական քայլ է։ Թշնամական է նաև Կիև գնալը (նկատի ունի վարչապետի տիկին Աննա Հակոբյանի՝ Կիեւում կանանց համաժողովի մասնակցելը և հանդիպելը Զելենկսու հետ- խմբ.), քաղաքական տարբեր հայտարարությունները… Ցավոք սրտի, դրա հետևանքը մենք ենք կրելու, ժողովուրդը։ Արդեն բողոքներ կան, որ սահմանին բեռնատարների տարանցման հետ կապված խնդիրներ կան»,– նշեց Խաչատրյանը։

Նա շեշտեց, որ Ռուսաստանը կոշտ է արձագանքում Հռոմի ստատուտի վավերացմանը, քանի որ Հայաստանի իշխանություններն այդ հարցը որոշեցին օրակարգ բերել, երբ միջազգային քրեական դատարանը ՌԴ նախագահ Վլադիմիր Պուտինին ձերբակալելու օրդեր ստորագրեց։

Արթուր խաչատրյանը նկատեց, որ Հռոմի ստատուտի վավերացումը կհակասի Հայաստանի Սահմանադրությանը:

Դիտարկմանը, որ ստատուտի վավերացումը Ադրբեջանի ռազմական գործողությունների դեմ պայքարելու գործիք է համարվում, ընդդիմադիր պատգամավորն ասաց. «Դուք կարծում եք, որ այն դեպքում, երբ Փաշինյանն Ալիևին կառուցողական է համարում, Ադրբեջանի հետ էլ խաղաղության օրակարգ է փորձում ստեղծել, ՀՀ իշխանությունները ստատուտի վավերացումից հետո Ալիեւին դատի են տալո՞ւ: Կատա՞կ եք անում։ Ուղղակի ծիծաղելի է»։

Նա ընդգծեց` Հայաստանն արտաքին քաղաքականության վեկտորի փոփոխության ուղղությամբ է շարժվում, և Ռուաստանից հակազդեցությունը սպասելի էր։

Հարցին, թե ի՞նչ քայլերի կարող է գնալ Ռուսաստանը, Արթուր Խաչատրյանը պատասխանեց. «Մենյուն շատ մեծ է: նայեք, թե ինչ տեղի ունեցավ 2008 թվականին Վրաստանի հետ կապված: Ի դեպ, Վրաստանը 15 տարի անց հասկացավ, որ իրենց այդ քաղաքականությունն այդքան էլ արդյունավետ չէր»։