Եթե Ադրբեջանը երեկ ստորագրել է հայտարարություն, որով ճանաչել է տարածքային ամբողջականության սկզբունքը, այսօր պետք է իր օկուպացիոն զորքերը արդեն դուրս բերեր Գեղարքունիքի, Սյունիքի եւ Վայոց Ձորի մարզերից: Այս մասին այսօր՝ հոկտեմբերի 24-ին, ԱԺ-ում լրագրողների հետ զրույցում նշեց ՀՅԴ անդամ, ԱԺ «Հայաստան» խմբակցության պատգամավոր Արթուր Խաչատրյանը:

«Բայց Ադրբեջանը մի կողմից ընդունելով նման հայտարարություն, մյուս կողմից պահելով իր օկուպացիոն զորքերը Հայաստանի տարածքում, հստակ ուղերձ է հղում, որ ինքը որևէ դեպքում խաղաղության գնալու ցանկություն չունի, եթե այդ «խաղաղության» համաձայնագիրը չլինի Հայաստանի կապիտուլյացիայի հայտարարություն:

Պատերա՞զմ, թե՞ խաղաղություն` դա ադրբեջանական նարատիվ է, մեզ մոտ կա ցեղասպանվե՞լ, թե՞ ինքնապաշտպանվել, որովհետև Ադրբեջանն իր բոլոր գործողություններով ցույց է տալիս, որ խաղաղությունը իր համար ընդունելի չէ, բացի Հայաստանի կապիտուլյացիայից: Եթե մենք դրան համաձայն չենք, պետք է բոլոր միջոցները ձեռնարկենք, որ ապահովենք մեր տարածքային ամբողջականությունը, Արցախի ժողովրդի քաղաքական իրավունքները, ներառյալ ինքնորոշման իրավունքը: Բայց Հայաստանի իշխանությունները մեզ որևէ լավ տեղ չեն տանում», – հայտարարեց ընդդիմադիր պատգամավորը:

Ըստ նրա` ամենալուրջ վտանգն այն է, որ Հայաստանը չդառնա Արևմուտքի, Հյուսիսի ու Հարավի բախման թատերաբեմ:

«Ցավոք սրտի, այս իշխանությունների արտաքին քաղաքականությունը բերել է նրան, որ Հայաստանը վերածվել է բախումների թատերաբեմի: Թե որտեղ են ընթանում բանակցությունները, դա երկրորդական հարց է, առաջին հարցն այն է, թե բանակցությունների սեղանին ինչ է դրված, եւ այն մարդը, որ Հայաստանն է ներկայացնում, արդյոք պաշտպանում է հայկական շահերը: Ցայժմ մենք որևէ հիմք չունենք պնդելու, որ Հայաստանի բանակցողները պաշտպանում են Հայաստանի շահերը», – ընդգծեց Արթուր Խաչատրյանը։

Երեք տարի ինչ ասել ենք՝ ճիշտ ենք ասել, Փաշինյանն ինչ ասել է, սխալ է ասել, որովհետեր 3-5 տարի մենք անընդհատ գլորվում ենք դեպի անդունդը նշեց Արթուր Խաչատրյանը՝ անդրադառնալով դիտարկմանը, որ ընդդիմությունը ձախողվել է իշխանափոխության հարցում:

«Այո, պետք է փոխել իշխանությունը, բայց հիմա ընդդիմությանը խփելն արդյո՞ք օգնում է իշխանության փոխելուն: Չի օգնում: Վերջապես, հասարակության մեջ, քաղաքական ներկապնակի վրա կա-չկա, բայց միակ լուրջ, կազմակերպված, ինստիտուցիոնալ ընդդիմությունը մենք ենք, ԱԺ-ում հավաքվածներն է և անում ենք այն, ինչ որ ընդդիմությունը պետք է անի, քննադատում ենք իշխանությանը»,-հայտարարեց ընդդիմադիր պատգամավորը:

Նա հայտնեց, որ իրենք փորձում են մարդ մոբիլիզացնել փողոցում. «Այնքան չենք անում, որքան պետք է, բայց նայենք, թե այլընտրանքային ընդդիմությունը քանի մարդ է կարողանում մոբիլիզացնել: Նաեւ նայենք, թե փողոցում այս իշխանություններն ինչ աջակցություն ունեն: Երևանի քաղաքապետի ընտրությունները դրա ամենավառ վկայությունն են»,-ասաց Արթուր Խաչատրյանը՝ հավելելով, որ ինչքան շատ մարդ մոբիլիզացվի, այնքան շուտ կկարողանան այս իշխանություններից ազատվել, փոխել պետության քաղաքականության կուրսը:

Արթուր Խաչատրյանը անդրադառնալով դժգոհությանը, որ ընդդիմությունը վճռական գործողությունների չի գնում եւ չի կարողանում իշխանափոխություն իրականացնել, ասաց՝ գործողություն պահանջող եւ գործողության մասնակցող մարդիկ էապես իրարից տարբերվում են, որովհետեւ պահանջել գործողություն, ենթադրենք, կիրակի երեկոյան, բայց չգալ գործողության երկուշաբթի առավոտյան, դա նշանակում է՝ դու պահանջում ես «թամաշա»:

«Արդյոք այն քաղաքացին, որ պահանջում է գործողություն, բայց այդ գործողությանը չի մասնակցում, ինքն իր հետ անկեղծ է»,-ասաց նա:

Անդրադառնալով հայ-ռուսական հարաբերություններին, Արթուր Խաչատրյանն ասաց. «Ինչքան էլ Փաշինյանի հայտարարի, որ հայ-ռուսական հարաբերությունները լավ են… Եթե հայ-ռուսական հարաբերություններն լավ են՝ ինչո՞ւ են եթերում սփռվում հաղորդումներ, որոնք վնասում են հայ-ռուսական հարաբերություններին»:

Բանակցությունների այլընտրանքը պատերազմն է. ցավոք, 2020-ի 44-օրյա պատերազմին նախորդել էին բանակցությունների ձախողումները ասաց Արթուր Խաչատրյանը՝ անդրադառնալով նախօրեին Իրանում «3+3» ձեւաչափով հանդիպմանը:

«Այս իշխանությունները ձախողել էին ամբողջ բանակցային գործընթացը, կորցրել էին բոլոր դաշնակիցներին, նոր դաշնակիցներ ձեռք չէին բերել: Որեւէ բանակցության չգնալուց առաջ պետք է հասկանալ, թե դրա այլընտրանքը որն է: Այնպես որ բանակցությունների գնալը ճիշտ բան է, բայց կարեւորը այն չէ, թե բանակցությունների սեղանը որտեղ է դրված, կարեւորն այն է, թե բանակցությունների սեղանին ինչ է դրված»,-ասաց պատգամավորը:

Նա նկատեց, որ գործող իշխանությունը բոյկոտում է ՀԱՊԿ-ի եւ ԱՊՀ-ի հարթակները. «Իրենք խոսում են «հայկական խաչմերուկի» մասին: Ես դեռ նախորդ տարվա փետրվարին հարցում եմ ուղարկել, թե հաշվարկներ կա՞ն: ՏԿԵ նախարարությունը պատասխանել է, որ դրա մասին կարող ենք խոսել, երբ տեխնիկական տեսական ուսումնասիրությունն ավարտված լինի: Այսինքն առանց այդ ուսումնասիրության պնդումներ կատարելը անտրամաբանական է: Այն հաշվարկները, որոնք ես եմ արել, տնտեսական առումով որեւէ լավատեսություն չի ներշնչում: Թուրքական էքսպանսիան մի կողմից, մյուսը, եթե կա ավելի արդյունավետ ճնապարհ, օրինակ, Իջեւան- Ղազախ ճանապարհը, որն ավելի կարճ է, դա չեն գործարկում, գնում են միայն հարավային ճանապարհով: Ակնհայտ է, որ դա Ադրբեջանի ճնշման ներքո են գնում»,- հայտարարեց ընդդիմադիր պատգամավորը:

Ֆրանսիայից զենք ձեռք բերելը միայն դրական ազդեցություն կունենա Հայաստանի անվտանգության վրա. նշեց Արթուր Խաչատրյանը:

«Հինգ տարվա ընթացքում, վերջապես, հաջողացրեցին Ֆրանսիայից երեք ռադիոլակացիոն կայան ձեռք բերել ու ինչ-որ հրթիռների մասին պայմանավորվածություն: Դա պետք էր շուտ անել, ոչ թե գալ, ԱԺ ամբիոնից կամ Հանրայինի եթերից ողբալ, ասել` փող ունենք, բայց մեզ զենք չեն տալիս։ Դա նույնն է, ոնց որ ես գնամ տուն ու ասեմ` կնիկ, երեխեք, ես փող ունեմ, բայց մեր խանութում ինձ հաց չեն վաճառում: Տեսնում ես զենք չի տալիս, մեկ օր չի տալիս, երկու օր չի տալիս, երրորդ օրը բողոքելու փոխարեն պետք է փորձել այլ մատակարար գտնել: Եթե չես կարողանում երկրի պաշտպանունակությունը ապահովել, մնայիր թերթի խմբագիր: Որովհետեւ մինչ այդ զենք մատակարարվում էր թե՛ հարավից, թե՛ հյուսիսից, թե՛ արևելքից, թե՛ արևմուտքից», – ասաց նա:

Արթուր Խաչատրյանը նկատեց, որ երեք ռադիոլոկացիոն կայանների դեպքում աղմուկն ավելի շատ էր, քան կարող էր լինել: