Հայաստանի դատի հանձնախումբը շարունակում է աշխատել ԱՄՆ նախագահի բոլոր թեկնածուների հետ: Այս մասին Alpha News-ի հետ զրույցում ասաց Այս մասին Alpha News-ի հետ զրույցում ասաց ԱՄՆ Հայ դատի հանձնախմբի մամուլի քարտուղար Էլիզաբեթ Չուլջյանը:

«Մեկ տարի է մնացել Ամերիկայի նախագահական ընտրություններին, և Հայ դատի հանձնախումբը շարունակում է աշխատել բոլոր թեկնածուների հետ: Մենք ամեն ինչ անում ենք հասկանալու նրանց տեսակետը արցախյան հարցի շուրջ, Հայաստանի ապահովության հարցի շուրջ, և արդյոք նրանք հասկանում են՝ ինչ հսկայական մարտահրավերներ է նետել Ադրբեջանը Հայաստանին»,- ասել է Չուլջյանը:

Նրա փոխանցմամբ՝ նախորդ օրերին հանդիպում է տեղի ունեցել նախագահի թեկնածուների հետ և նրանք դատապարտել են Ադրբեջանին և նրա վարած քաղաքականությունը:

«Խոսելով արցախյան հարցի մասին՝ հանրապետական երեք թեկնածուներն էլ դատապարտել են Ադրբեջանին և նրա վարած քաղաքականությունը: Թեկնածուներից մեկը նշեց, որ Արցախի հարցը պետք է հաճախ միջազգային լրատվամիջոցների ուշադրության կենտրոնում լինի: Նա շեշտել է, որ ԱՄՆ-ն պետք է դադարի Ադրբեջանին ռազմական օգնություն տրամադել, և անի ամեն ինչ, որ արցախցիները վերադառնան իրենց պատմական հայրենիք և ապահով ապրեն: Նրանից բացի ՄԱԿ-ում ԱՄՆ-ի նախկին դեսպան Նիկի Հեյլին ևս դատապարտել է Ադրբեջանի քայլերը արցախահայության դեմ: Սրանք այն փոքր քայլերն են, որ Ամերիկայի Հայ դատի հանձնախումբն անում է՝ հասկանալու թեկնածուների վերաբերմունքը Արցախի հարցի շուրջ, և շարունակելու է անել»,- եզրափակել է Չուլջյանը:

Բաքվի ցեղասպան քաղաքականությունը դադարեցնելու միակ տարբերակը նրան ռազմական օժանդակությունից զրկելն է. ասաց Էլիզաբեթ Չուլջյանը:

«ԱՄՆ Սենատի՝ «Հայաստանի պաշտպանության ակտ 2023» օրինագծի ընդունումը հստակ պատգամ է՝ ուղղված Բաքվին և Բայդենի վարչակազմին: Ըստ Սենատի՝ Բաքվի ցեղասպան քաղաքականությունը դադարեցնելու միակ տարբերակը նրան ռազմական օժանդակությունից զրկելն է: Դա պետք է լինի ոչ թե վերջին, այլ առաջին պատժամիջոցը, որ ամերիկյան կառավարությունը կարող է անել Բաքվի շարունակական հարձակվողական քաղաքականության դեմ: Թեև այս ամենը պետք է լիներ այն ժամանակ, երբ Ադրբեջանը տասը ամիս շարունակ շրջափակել էր Արցախը՝ մարդկանց ենթարկելով սովի»,- ասաց Չուլջյանը:

Նա ընդգծում է, որ շրջանցելով ռազմական օժանդակությունից զրկելու օրենքը՝ ամերիկյան կառավարությունը մեղսակից է դարձել Ադրբեջանի ցեղասպան քաղաքականությանը:

«Նախագահ Բայդենը խոստացել էր հարգել 907-րդ բանաձևը, չշրջանցել օրենքը և Ադրբեջանին զրկել ռազմական օժանդակությունից: Բայց շարունակելով ռազմական աջակցությունը՝ ամերիկյան կառավարությունը մեղսակից դարձավ Ադրբեջանի ցեղասպան քաղաքականությանը: Սենատը ոչ է ասում Բայդենի վարչակազմին և շեշտում, որ պետք է կարճ ժամանակում կանխել ամերիկյան ռազմական օժանդակությունը դեպի Ադրբեջան: Սա Սենատի առաջին քայլն էր, բայց նրանք պայքարելու են այլ պատժամիջոցների ևս հասնելու համար:

Ամերիկայի Հայ դատի հանձնախումբն այսօր անում է ամեն ինչ, որ ընդլայնվի Արցախի հայության հումանիտար օժանդակությունը, մինչև ապահով կվերադառնան հայրենիք: Շատ կարևոր է, որ կրճատվի Ադրբեջանին ռազմական օգնություն տրամադրելը, բայց պետք է անել ավելին, քանի որ Ալիևի կառավարությունը շարունակում է իր հանցագործությունները՝ հայ ռազմագերիներին ազատ չարձակելով: Պատժամիջոցները տեղին են, և ռազմական օժանդակությունից զրկելը առաջին քայլը պետք է լինի, որպեսզի կարողանանք հստակ ազդանշան ուղարկել ամերիկյան կառավարությանը՝ ցույց տալով, որ որևէ երկիր չի կարող նման ցեղասպան քաղաքականություն վարել և անպատիժ մնալ»,- եզրափակել է Չուլջյանը: