«Մենք այսօրվանից, վերջին 10 օրվա մեջ գրեթե ամեն օր տարբեր մարզերում, քաղաքներում սկսել ենք հանդիպումների շարք մեր ժողովրդի հետ, մեր քաղաքացիների, որոնց բացատրում ենք այն բոլոր վտանգները, որ գոյություն ունեն նաև սահմանադրական հանրաքվե տեղի ունենալու դեպքում», – «Ազատությանը» տված հարցազրույցում հայտարարեց ՀՅԴ Հայաստանի Գերագույն մարմնի ներկայացուցիչ, Ազգային ժողովի «Հայաստան» խմբակցության պատգամավոր Իշխան Սաղաթելյանը։

«Մենք չենք նստելու սպասենք և առաջիկայում ավելի լայնածավալ մասշտաբով աշխատելու ենք մեր ժողովրդի հետ։ Իրենք, իմ կարծիքով, փորձում են ուսումնասիրել հասարակության տրամադրությունը, եթե տեսնեն կհաջողեն, նոր վերջնական որոշում կկայացնեն։ Մենք մեր աշխատանքով պետք է հասնենք նրան, որ իրենք հասկանան՝ դա անհնարին է», – ասաց Սաղաթելյանը։

Ինչ վերաբերում է հնարավոր արտահերթ ընտրություններին, եթե դրանք այս իշխանության կողմից անցկացվեն սահմանադրական հանրաքվեին զուգահեռ, դաշնակցական գործիչը նշեց. – «Ակնհայտ է, որ եթե իրենք գնան արտահերթ ընտրության, այդ ընտրությունը փորձելու են ծառայեցնել իրենց վերարտադրման համար և փորձելով դա ներկայացնել նոր լեգիտիմության պաշար՝ և՛ Ադրբեջանի հետ խաղաղության պայմանագիրը ստորագրելու, և՛ այն մյուս կործանարար քաղաքականությունը, որ որդեգրել են, ավարտին հասցնելու ուղղությամբ։ Կգա ժամանակը՝ մենք մեր որոշումը կկայացնենք։ Այս պահին մեր գլխավոր խնդիրը համարում ենք աշխատել մեր քաղաքացիների հետ, բացատրել այն բոլոր վտանգները, որ գոյություն ունեն, և փորձենք կանխենք այս ամեն ինչը, այլ ոչ թե արձագանքենք հետևանքներին»։

«Եթե տեղի ունենա Սահմանադրության հանրաքվե, մենք ամեն ինչ անելու ենք՝ այդ հանրաքվեն վերածելու Նիկոլ Փաշինյանի անվստահության հանրաքվեի, և դա այն տեղն է և այն դեպքն է, որ մենք տեսնում ենք Հայաստանի ընդդիմադիր քաղաքական դաշտում հնարավոր է իրականացնել շատ լայն համախմբում, և այո՝ դա վերածել Նիկոլի անվստահության հանրաքվեի, և դա մենք կանենք», – ասաց Սաղաթելյանը։

Դիտարկմանը՝ «այսինքն, նաև փողոցային պայքար եք ծրագրում, եթե բանը հասնի դրան», ընդդիմադիր գործիչն արձագանքեց. – «Մենք չենք հրաժարվել այն ճանապարհից, որը ընտրել ենք, մենք գնահատել ենք մեր անցած ժամանակահատվածի և՛ ձեռքբերումները, և՛ բացթողումները, և՛ թերությունները, և այնն օրակարգը, ինչի մասին հայտարարել ենք, շարունակում է մնալ»։

Սաղաթելյանը խոստացավ, որ «երբ պրոցես տեղի ունենա, այդ մասին, բնականաբար, նախօրոք կհայտարարվի, այս պահին գլխավոր խնդիրը հասարակության տարբեր շերտերի հետ աշխատելն է և տրամադրությունը փոխելը»։

«Սահմանադրության հնարավոր փոփոխության դեմ ձեր քննադատությանը իշխանությունը հակադարձում է, որ դուք Ալիևի հետ նույն օրակարգն ունեք՝ ներքաղաքական լարում առաջացնել
Հայաստանում»,- հարցին՝ ՀՅԴ ԳՄ ներկայացուցիչը պատասխանեց.- «Սահմանադրության փոփոխությունը դա ուղիղ Թուրքիայի և Ադրբեջանի պահանջն է, որը փորձում է իրականացնել Հայաստանի Հանրապետության օրվա իշխանությունը, իսկ եթե մենք բարձրաձայնում ենք և խոսում ենք դրա մասին, չի նշանակում, որ երկրի ներսում մեզ պետք է լարվածություն։ Երկրի ներսում մեզ պետք է պարզապես փոփոխություն, դիմադրության կազմակերպում, և այն մարտահրավերները, որ կան մեր երկրի առջև, դրանց հաղթահարում, իսկ դա այս իշխանություններով պարզապես հնարավոր չի»։

«Ինչի՞ են Ադրբեջանը և Թուրքիան ուզում, որպեսզի փոխվի Սահմանադրությունը և հատկապես դուրս գա Սահմանադրության նախաբանից Հռչակագրի տեքստը՝ հրաժարվել Ցեղասպանության միջազգային ճանաչումից և Արցախից առհասարակ, ընդհանրապես: Դրանով ի՞նչ հարց են լուծում, ինչի՞ համար է պետք Ադրբեջանին դա՝ որպեսզի լեգիտիմացնի իր այն ցեղասպան և էթնիկ զտման քաղաքականությունը, որ տեղի ունեցավ. դրանով փորձում են լեգիտիմացնել Արցախի նվաճումը, ինչպես նաև 1915 թվականին տեղի ունեցած Ցեղասպանությունը»,- վստահ է Սաղաթելյանը:

«Թուրքիան և Ադրբեջանը վերջին 100 տարվա մեջ երկու անգամ մեր ժողովրդին սեփական հայրենիքում ենթարկել են ցեղասպանության, էթնիկ զտման և նվաճել մեր հայրենիքը: Եթե հայկական պետությունը այսօր հրաժարվում է ադ պահանջից ընդհանրապես, և այլևս արգելվում է այդ մասին խոսել, դրանով լեգիտիմացվում է Ադրբեջանի և Թուրքիայի այդ միջազգային հանցագործությունը: Այսինքն՝ մենք զոհից դառնում ենք ագրեսոր՝ այդ հողերը վերցրել ենք, օգտագործել ենք, բնակություն ենք հաստատել», – ընդգծեց ՀՅԴ ԳՄ ներկայացուցիչը:

Կարլեն Ասլանյան

Հարցազրույցի մանրամասները՝ տեսանյութում.