Բանակցություն, ըստ էության, գոյություն չունի Հայաստանի և Ադրբեջանի միջև. բանակցությունը նշանակում է՝ ամեն կողմը գոնե պաշտպանում է իր շահերը, տեսակետները, բայց իրենց դիտարկումները բերում են այն եզրակացության, որ հայկական կողմն աշխատում է ամեն ինչ անի, որպեսզի բավարարի Ադրբեջանի բոլոր պահանջները, որ հանկարծ պատերազմ չլինի. այսօր՝ փետրվարի 27-ին, ԱԺ-ում լրագրողների հետ ճեպազրույցում ասաց ՀՅԴ Բյուրոյի քաղաքական ներկայացուցիչ, «Հայաստան» խմբակցության պատգամավոր Արմեն Ռուստամյանը։

«Ամեն ինչ անում են ստեղծելու համար պատերազմի լուրջ սպառնալիք, ամեն ինչ անում են, որ այդ պատերազմին երկիրը պատրաստ չլինի եւ համարում են, որ այս վիճակից միակ ելքն այն է, որ քանի որ մենք մեզ պաշտպանելու ընդունակ չենք, պետք է գնանք բվարարելու Ադրբեջանի պահանջները, իսկ Ադրբեջանի պահանջները օր-օրի մեծանում են: Այն 5 պայմանները, որ սկզբից դրել էին, հիմա դրանից անդին էլ արդեն պայմաններ են առաջանում, անընդհատ նորանոր պահանջներ ու սա վերջ չունի»,-ասաց Ռուստամյանը:

Նրա խոսքով, այդ պահանջների վերջը հայկական գործոնի վերացումն է այս տարածաշրջանից, քանի որ հենց դա է սպառնալիք Թուրքիայի և Ադրբեջանի համար:

«Փաշինյանը որ ասում է՝ կարմիր շոր ենք հագել եւ ցուլերին գայթակղում ենք մեզ վրա, հիմա իհարկե, նորանոր գազաններ են ավելանում այդ ճանապարհի վրա, մենակ ցուլերով չենք պրծնի: Ինքը մի այնպիսի ճանապարհ է ներկայացնում, որն անանցանելի է հայ ժողովրդի համար, քանի ինքն իր տեսակը չի փոխել: Այո, մենք մեր տեսակը պետք է փոխենք, որպեսզի ցուլերը եւ այլ կենդանիներ մեզ վրա չհարձակվեն: Ակնհայտ է, որ մեր ճանապարհը դառնալու է էլ ավելի անանցանելի եւ այդ վիճակը ստեղծել են այս իշխանությունները՝ իրենց պահվծքով ու քայլերով:

Հիմա անցանելի դառնալու համար մենք պետք է մեր տեսակը փոխենք, որ կարողանանք, ըստ իր ձեւակերպումների, պետք է մեր տեսակը փոխենք»,-ասաց Ռուստամյանը:

Նա նկատեց, որ Ալիևը վերջերս ավելի խիստ պահանջներ է ձևակերպում և ավելին, Հայաստանին ասում է, որ այլ տեղերում զինակիցներ փնտրել հարկավոր չէ, միակ փրկությունը իրենք են. «Ստացվում է, որ մեր անվտանգության միակ երաշխավորն այսօր Բաքուն է: Խաղի այս կանոնը, ըստ էության, նաև Հայաստանի իշխանություններն են որդեգրել և ամեն ինչ անում են, որպեսզի մենք չգրգռենք մեր հարևաններին: Եվ դա կարող է կատարվել միայն մեր ինքնությունից հրաժարվելու ճանապարհով:»,- ասաց նա:

Ընդդիմությունն այսօր անում է այն, ինչ կարող է անել, եւ այն չափով, որ չափով կարող է իրականացնել հանրային այն ընկալումների պարագայում, որոնք այսօր կան. ասաց Արմեն Ռուստամյանը։

«Կարծում եմ՝ դեռ խնդիր կա մարդկանց բացատրելու, թե այս ճանապարհն ուր է տանում: ՀՅԴ-ն վերջերս հանդես եկավ շատ հստակ հայտարարությամբ՝ կապված իշխանությունների կողմից վարվող «խաղաղության» գործընթացի հետ: Մենք նշել ենք, թե եթե մենք լինեինք, ինչ կանեինք: Մենք առաջարկել ենք շատ տրամաբանական լուծում, որտեղ հայկական շահն է երեւում:

Մենք խաղաղության կողմ ենք, բայց այդ խաղաղությունը պետք է ունենա երկկողմանի ընկալում: Մարդիկ պետք է տեսնեն, որ այս ամեն ինչից ելք կա: Մենք ասում ենք, որ իշխանությունների առաջարկած ճանապարհը կործանարար, ինքնաոչնչացման ճանապարհ է, որի դեմն առնել հնարավոր է համահայկական լուրջ ճակատ ձևավորելով։

Այդ ճակատը դեռ ձևավորված չէ։ Կձևավորվի, երբ այս ընկալումը շատերի մոտ առաջանա: Ես տեսնում եմ, որ այդ միտումը կա»,-ասաց նա:

Ռուստամյանը խոստովանեց, որ ընդդիմությանը կարելի է շատ հարցերում մեղադրել, որ մինչև հիմա չի հաջողվել հեռացնել այս իշխանություններին։ «Բայց այս իշխանությունը մեկ փաստարկով այդ քննադատությունների դեմն առնում է՝ ասում են՝ 2021 թվականին մեզ ժողովուրդն ընտրել է, ունենք մանդատ, որը մեզ տալիս է լեգիտիմ իրավունք իրականացնելու այս ամեն ինչը»,- ասաց նա՝ հավելելով, որ իշխանությունը լեգիտիմ չէ, քանի որ եկել է մի ծրագրով, սակայն իրականացնում է բոլորովին այլ ծրագիր:

«Դուք իրենց ձայն եք տվել մի բանի համար, իրենք բոլորովին այլ բան են իրականացնում: Ես վստահ չեմ, որ մարդիկ սա հասկացել են»,- ընդգծեց Ռուստամյանը:

ՀԱՊԿ-ի անդամակցության սառեցման ընթացակարգ չկա. ասաց Արմեն Ռուստամյանը՝ անդրադառնալով վարչապետ Նիկոլ Փաշինյանի հայտարարությանը, թե ՀԱՊԿ-ին Հայաստանի անդամակցությունը, փաստացի սառեցված է:

«Կառավարության ծրագրում ճիշտ հակառակն է գրված, որ մենք պետք է ամրապնդենք մեր հարաբերությունները ՀԱՊԿ-ի հետ, օգտագործելով անգամ մեր նախագահ լինելը , մեր անվտանգության երաշխիքներն ավելացնենք: Հիմա ճիշտ հակառակն է կատարվում: Հիմա ճիշտ հակառակն է կատարվում»,-ասաց նա:

Դիտարկմանը, որ իշխանությունները հայտարարում են, որ ՀԱՊԿ-ը չի ճանաչում Հայաստանի սահմանները, Ռուստամյանն ասաց, որ ՀՀ իշխանությունն ինքն էլ չի ճանաչում Հայաստանի սահմանները, սկսել են օգտագործել Ադրբեջանի կողմից օգտագործվող «պայմանական սահման» արտահայտությունը. «Թող գան այդ պայմանական սահմանի վրա կանգնեն: ԵՄ առաքելությունը հիմա ո՞ր սահմաններն է հետազոտում: Բացի Փաշինյանից ոչ ոք Ալմաթիի գռչակագրով չի առաջնորդվում: Պարզ չի՞, որ Ալմաթիի հռչակագիրը միջոց էր, որով տվեցինք Արցախը»:

Նրա խոսքով, Հայաստանը տարածքներ է կորցրել եւ դրանք վերադարձը չի դնում որպես նախապայման. Նա պետք է ասի՝ խաղաղության պայմանագրից կարելի է խոսել, երբ իմ սուվերեն տարածքներից քո զորքերը հանի: Զորքերդ հանի, նոր կսկսենք խոսել: Բա ինչի՞ Ալմաթիի հռչակագիրը չի հիշում, որը խախտված է»:

Ինչ վերաբերում է Զելենսկու հնարավոր այցին Հայաստան, Արմեն Ռուստամյանը նկատեց՝ իբր Հայաստանի վիճակը շատ լավ էր, հիմա էլ դառնալու է Ռուսաստան-Ուկրաինա պատերազմի թատերաբեմ։

«Դուրս եկավ, որ այսօր Փաշինյանի արտաքին քաղաքականությունը Ռուսաստան-Արևմուտք գլոբալ պատերազմը բերում է Հայաստան։ Հասկանո՞ւմ եք, թե դրանից ինչ կբխի։

Արևմուտքը փորձում է ընդլայնել հակառուսական ճակատը։ Եթե դու պատերազմի մեջ ես Ռուսաստանի հետ, պետք է հակառուսական ճակատն ընդլայնես: Հիմա դա ընդլայնվում է մեզանով, Հայաստանով փորձում են ընդլայնել հակառուսական ճակատը, իսկ դա կործանարար է լինելու Հայաստանի համար։

Մի օր կարող ենք արթնանալ ու իսկապես տեսնել՝ ընդանրապես այստեղ չկանք, մեր տարածքում կանգնած են Ռուսաստան-Արևմուտք պատերազմը տանող ուժերը, իրենք են թելադրում մեր ով, որտեղ լինելը։ Պետականության կորուստը մեր աչքի առաջ ուղիղ տեսնում ենք։ Հայ ժողովուրդը նման կորուստներ երբեք չի ունեցել, ինչ որ հիմա կարող է ունենալ այս անպատասխանատու պահվածքի պատճառով»,- հայտարարեց Ռուստամյանը: