ՀՅԴ Բյուրոյի քաղաքական ներկայացուցիչ, Ազգային ժողովի «Հայաստան» խմբակցության պատգամավոր Արմեն Ռուստամյանը չի բացառում, որ Ադրբեջանը գնա Հայաստանի դեմ լայնամասշտաբ հարձակման. այսօր՝ ապրիլի 9-ին, ԱԺ-ում լրագրողների հետ զրույցում նշեց նա:

«Եթե էսկալացիայի վտանգ չկա` ինչո՞ւ է իշխանությունը վախեցնում մեր ժողովրդին պատերազմով։ Վերջերս Նիկոլ Փաշինյանն այցելել էր սահմանամերձ գոտի, որտեղ պատրաստվում են տարածքներ հանձնել, ահաբեկել էր պատերազմով: Եթե որևէ վտանգ չկա` պետք չէ ժողովրդին վախեցնել, բայց, իրականում, դա այդպես չէ։ Սա շատ հստակ ծրագրված գործընթաց է. այնտեղից վախեցնում են, այստեղից վախեցնում են ու ստեղծում տպավորություն, որ ուրիշ ճանապարհ չունենք, պետք է զիջենք, որ կարողանանք գոյատևել», – ասաց նա:

Ըստ նրա` բանավոր խոսակցությունները զուգորդվում են սահմանային լարվածություններով, որ Ադրբեջանն ու Թուրքիան ստանան իրենց համար ընդունելի արդյունքներ ու հասնեն իրենց նպատակին:

Պատգամավորը գիտի, թե որքան պետք է զիջել Ադրբեջանին, որ բավարարեն նրա պահանջները. «Մինչև հայկական ինքնության վերացումը, մինչև հայկական գործոնի վերացումը ու Հայաստանի վերածումը «Արևմտյան Ադրբեջանի»: Բնականաբար, այս ընթացքն իրականացվում է այս ահաբեկչական մթնոլորտը ստեղծելով, մենք էլ ասում ենք` թույլ ենք, անկարող ենք: Ես չեմ բացառում, որ Ադրբեջանն այս անգամ նաև լայնածավալ հարձակման գնա, որ միանգամից խնդիրը լուծի: Լոկալ բախումների ընթացքում Ադրբեջանը միշտ հասել է ինչ-որ լոկալ արդյունքների, բայց այս անգամ, կարծում եմ, որ իրենց խնդիրն ավելի գլոբալ է»,-ասաց Ռուստամյանը:

Նա ասաց՝ երբ Հայաստանից ասվում է, որ այդ տարածքներն իրենցն են, դրանով նրանց հրավիրում ենք այդ տարածքներ մտնել, այդ թվում՝ նաև զորքով:

Արմեն Ռուստամյանը հայտարարեց, որ Թուրքիայի ու Ադրբեջանի նպատակն է Հայաստանը բերել այն վիճակի, որ որևէ կարողություն անգամ չունենա` պաշտպանելու իր նվազագույն շահերը:

«Նրանք հստակ ծրագիր են դրել՝ չեզոքացնել հայկական գործոնը տարածաշրջանում»,- հավելեց պատգամավորը:

««Զանգեզուրի միջանցքը» եղել եւ մնում է օրակարգում, ինչքան էլ այս իշխանությունները փորձում են ասել, որ դա հանված է օրակարգից»,- նշեց Արմեն Ռուստամյանը՝ անդրադառնալով Ադրբեջանի կողմից «Զանգեզուրի միջանցքի» հետ կապված պահանջներին:

Նրա խոսքով, նոյեմբերի 9-ի եռակողմ հայտարարության 9-րդ կետը շարունակում է գործել. «Զանգեզուրի միջանցքի» հետ կապված պահանջները մենք բազմիցս ենք լսում, շարունակում է մեր առջեւ այդ պահանջը դրվել: Բայց նաեւ իրենք միայն Զանգեզուրով չենք սահմանափակվելու: Իրենք պետք է այնպես անեն, որ Հայաստանը որպես աշխարհաքաղաքական գործոն իր նշանակությունը կորցնի: Այստեղ միայն այդ 4 տարածքների հանձնելու հարցը չի, մենք ռազմավարական հսկայական հարված ենք ստանալու դրանից հետո: Կորցնելու ենք անգամ դեպի Վրաստան ճանապարհը: Ադրբեջանը փորձում է իր վերահսկողության տակ պահել ռազմավարական նշանակության մեր բոլոր ճանապարհները, որից հետո մնացած բոլոր պահանջների իրականացումը տեխնիկայի հարց է դառնում:

Հայաստանը բերել այն վիճակի, որ որեւէ կարողություն անգամ չունենա իր նվազագույն շահերը պաշտպանելու: Տեսեք, թե ինչպիսի հիստերիա է իրենց մոտ առաջանում, երբ որեւէ երկիր, մասնավորապես, Ֆրանսիան, փորձում է ինչ-որ կերպ մեր պաշտպանունակության բարձրացման ուղղությամբ քայլեր կատարել: Արդեն Թուրքիայից են հայտարարություններ հնչում: Հստակ է, որ Թուրքիան ու Ադրբեջանը հստակ ծրագիր են դրել չեզոքացնել ընդհանրապես հայկական գործոնը այս տարածաշրջանում»,- հայտարարեց Արմեն Ռուստամյանը:

ԱՊՀ արտգործնախարարների խորհրդի նիստին Արարատ Միրզոյանի չմասնակցելը Արմեն Ռուստամյանը «հերթական արկածախնդրություն» է համարում. «Այս արկածախնդրությունը վաղուց է սկսվել։ Մենք բազմիցս ասել ենք` կարելի է հազար հարցով դժգոհել ՀԱՊԿ-ից, դժգոհել մեր ռազմավարական գործընկերոջ պահվածքից, բայց կատարվում են քայլեր, որոնք նշանակում են վեկտորի փոփոխություն, նշանակում են Ռուսաստան-միավորված Արևմուտք պատերազմը տեղափոխել Հայաստան։ Սա ամենակործանարար հետևանքը կարող է ունենալ Հայաստանի համար:

Խոսում են, թե սա փոխարինում չէ մեկը մյուսով, դիվերսիֆիկացիա է, բայց դիվերսիֆիկացիա նշանակում է նաև որոշակի քայլեր կատարել այլ ուղղությամբ: Օրինակ, ի՞նչն է խանգարում գնալ այդ նիստին ու քեզ հուզող հարցերը բարձրացնել: Կարծում եմ` պահանջ է դրված, որ Հայաստանը պետք է միանա հակառուսական ճակատին, ու այդ խնդիրը «բարեհաջող» իրականացնում է այսօրվա իշխանությունը»,- ասաց Արմեն Ռուստամյանը։

Մանրամասները՝ տեսանյութում