Ալեն Սիմոնյանն իր ելույթն ամբողջությամբ տեղավորեց Նիկոլ Փաշինյանին հաճոյանալու անհագ ցանկության մեջ. այսօր՝ ապրիլի 12-ին, ԱԺ-ում լրագրողների հետ զրույցում հայտնեց ՀՅԴ անդամ, ՀՀ ԱԺ «Հայաստան» խմբակցության քարտուղար Արծվիկ Մինասյանը:

«Ինչ ապաքաղաքական, ապազգային, հակապետական հայտարարություններ լսեցինք նրա հայտարարություններից, նրա ելույթներում է կարմիր գծով գնում դա: Ուժեղ Հայաստանն է եղել և կա ընդդիմության օրակարգը, ուժեղ Հայաստանին խոչընդոտողները նիկոլականներն են, նիկոլիզմն ու ադրբեջանաթուրքական և նրանց վերահսկողության տակ գործող արտաքին գործակալական ցանցը, սրանք այն հակառակորդներն են, որոնց դեմ մենք պայքարում ենք:

Այն ինչ Ալեն Սիմոնյանն առաջարկում էր, որպես լուծում, այդ լուծումը բխում է իրենց երազանքից՝ չունենալ այստեղ ընդդիմություն կամ ունենալ այնպիսի ընդդիմություն, ինչպիսին հիմա եթերներով կեղծ եվրոպիզմ քարոզող և Հայաստանը հերթական անգամ կառափնարան տանող ընդդիմադիրներն են, դա իրենց երազած ընդդիմությունն է, որ իրենք ուզում են ունենալ»,- նշեց պատգամավորը՝ անդրադառնալով Ալեն Սիմոնյանի հայտարարությանը, որտեղ նա կոչ էր անում ընդդիմադիրներին վայր դնել մանդատները:

Ըստ նրա՝ կառավարությունը տապալել է ոչ միայն նախընտարական խոստումներն ու իրենց, իսկ կոտրած ձեռքով գրված ու հաստատված, ծրագրային դրույթները, այլ նաև ամեն պահ մի նոր փորձություն են բերում մեր պետականության գլխին:

«Եթե այս վիճակից իշխանության պատկերացրած ելքը ընդդիմության հրաժարականն է ու այդ հրաժարականով կփրկվի երկիրը և, կոպիտ ասած, իրենք ռադ կլինեն այս բառի քաղաքական իմաստով, եւ ամբողջությամբ կմաքրվի դաշտը, մենք կգնանք այդ քայլին:

Մեր օրակարգի կյանքի կոչումը կախված է մի բանից՝ հասարակական աջակցությունն ինչ ծավալի կլինի, մանդատները վայր դնելը մեկ վայրկյանի հարց է, որևէ բան չի խանգարում: Բայց եթե չկա այն հասարակական ընդվզումը, որը պետք է այս իշխանությանը հեռացնի, որին պետք է նախորդի կառավարության նկատմամբ անվստահության հայտնումն ու հասարակության այն ընդվզումը, որը թույլ չտա այս իշխանությունը վերարտադրվել, այդ սցենարին ամբողջ ծավալով գնալու ենք:

Եթե պետք եղավ անվստահության հանրաքվեի գաղափարն ենք առաջ տանելու: Եթե հանրային աջակցությունը չկա կամ մարդիկ թերահավատորեն են մոտենում այդ գործընթացին, ապա արկածախնդրություն է գնալ մի գործողության, որի հետևանքով նորից ուժեղացնում ես ազգակործան ու ազգադավ իշխանությունը: Փաշինյանի համար կարմիր գիծն իր աթոռն ու շրջապատի բարեկեցությունն են»,- ընդգծեց Արծվիկ Մինասյանը:

Եթե անգամ ընդիմությանը հաջողվի բավարար չափով ստորագրություն հավաքել եւ օրակարգ բերել վարչապետին անվստահություն հայտնելու հարցը, Նիկոլ Փաշինյանի հերթական անամոթ շոու բեմադրությունը լինելու է նա, որ ասելու է՝ տեսեք, ԱԺ-ն եւս մեկ անգամ վստահություն տվեց մեր վարվող քաղաքականությանը հայտնեց Արծվիկ Մինասյանը:

«Դրանով հայ հանրությանը կասվի՝ տեսեք, եւս մեկ անգամ ապացուցվեց, որ ես ճիշտ եմ: Դրա համար մեզ համար կարեւոր է, որ ընդվզման բավարար ծավալը լինի, որ մենք արդյունքի հասնենք, ոչ թե ուղղակի մի ակտ անենք անելու համար»,-ասաց նա:

Անդրադառնալով իշխանության կողմից հնչող մեղադրանքներին, որ այսօր խորհրդարանական ընդդիմությունը ռուսամետ է եւ ավելի շատ ՌԴ շահերն է սպասարկում, քան Հայաստանի, Արծվիկ Մինասյանն ասաց. «Եթե որեւէ մեկը կասկածում է, որ այս տարածաշրջանում Ռուսաստանն այն դերակատարն է, որը մեր անվտանգության բաղադրիչի կարեւոր մաս է, ուրեմն այդ մարդը բացարձակ հայոց պատմության հետ կապ չունի կամ դասեր չի քաղել:

Այն, ինչ անում է այս իշխանությունը՝ կտրել մեզ մեր բոլոր դաշնակիցներից եւ թողնել միայնակ, ինչպես ինքն էր ձեւակերպում, Ադրբեջանն ու Թուրքիան ցուլ են, իրականում գայլեր են եւ այդ գորշ գայլերի հետ թողնում է մեն-մենակ»,-ասաց նա:

Ընդդիմադիր պատգամավորի խոսքով, Հայաստանը հեռու է վանում իր դաշնակիցներին, սառեցնում է նրանց հետ հարաբերությունները. «Դրա համար Նիկոլ Փաշինյանը հայոց պատմությունը բերել է միայնակ դաշտ, որտեղ իր վարած քաղաքականության հետեւանքով մենք կորցրել ենք մեր բոլոր արտաքին անվտանգային համակարգերը:

Հայաստանն ու Ռուսաստանը ունեն բարեկամության, ռազմական փոխադարձ աջակցության միջազգային համաձայնագիր, ինչո՞ւ դա կյանքի կոչելու համար բավարար ջանքեր չի գործադրում Նիկոլ Փաշինյանը, այլ փորձում է ամեն գնով այդ դաշինքը տապալել: Անգամ եթե ռուսական կողմից սխալ ազդակներ են հնչում, քո պարտավորությունն է այդ սխալ ազդակները ուղղել եւ ուղղորդել քո դաշնակցին քո շահերը պաշտպանելու համար»,- ընդգծեց Արծվիկ Մինասյանը:

Նիկոլ Փաշինայնը մեղադրում է Ռուսաստանին, ասում է՝ Ռուսաստանն ուզում է Հայաստանում իշխանափոխություն անել. ասաց Արծվիկ Մինասյանը:

«Ընդդիմությունից պրծավ, հետո մեղադրեց Ռուսաստանին, Արցախի իշխանություններին, Արցախի ժողովրդին: Երկրորդը, Արեւմուտքը օգտագործելով այս տիկնիկային իշխանությանը, փորձում է Ռուսաստանի ազդեցությունն այս տարածաշրջանում նվազեցնելու կոնտեքստում փորձում է մղել Հայաստանի հակառուսականացմանը: Իրենք հեշտությամբ մտել են այդ դերի մեջ»,-ասաց նա:

Անդրադառնալով նրան, որ Ռուսաստանը չի կատարում իր պարտավորությունները եւ Հայաստանին չի տալիս խոստացած զենքը, Մինասյանն ասաց, որ այդ խնդրի լուծման ձեւը այն է, որ պետք է գնալ, Ռուսաստանի հետ նստել, խոսել, քննարկել, պահանջել ստանալ, կամ ռնվազն այլընտրանքային լուծում տալ, ոչ թե մուննաթ գալ: «Մուննաթի ինստիտուտը բնորոշ է այս իշխանությանը, մուննաթ է գալիս բոլորի վրա, որոնք որեւէ կերպ կարող է իրենց կարճ մտածողությամբ, իրենց աթոռից դուրս պատկերացնեն որեւէ այլ լուծում: :

Ո՞վ ասաց. որ մենք գոհ ենք Ռուսաստանի վարքագծից: Ոչ, բայց դրա լուծումը մուննաթ գա՞լն է, Հայաստանը այս գորշ գայլերի արանքում թողնե՞լն է: Թե գտնել երկխոսության այնպիսի հարթակ, որ կարողանաս քո դաշնակցային հարաբերությունները, քո բնական դաշնակից համարվող Իրանին ներգրավել տարածաշրջանում կարեւորագույն անվտանգային հարցերի լուծմանը՝ առանց վնասելու ԱՄՆ-ի եւ ԵՄ-ի հետ հարաբերությունները»,- հայտարարեց ընդդիմադիր պատգամավորը՝ հավելելով, որ այս իշխանությունը Հայաստանը տանում է մի նոր կառափնարան:

Իշխանությունը խոսում է խորհրդային սահմանների մասին, բայց Ադրբեջանը ընդունո՞ւմ է այդ սահմանը. նշեց Արծվիկ Մինասյանը:

«Բա որ ընդունում է, ինչո՞ւ է կրակում: Կամ դուք ծանո՞թ եք Ադրբեջանի Սահմանադրությանը, իրենց անկախության փաստաթղթերին: Այնտեղ գրված է խորհրային սահմա՞ն: Հակառակը, Ադրբեջանը հրաժարվել է ԽՍՀՄ պայմանագրերից: Ալիեւն ասաց՝ Ալմա-Աթայի հռչակագրին համաձայն եմ, երբ պետք էր իրեն Արցախը զավթելու, նվաճելու համար: Հիմա ինչո՞ւ չի տալիս Ալմա-Աթայի անունը: Ալմա-Աթայի փաստաթուղթը որեւէ իրավական հիմք չէ, իրավական հիմքը այն արձանագրությունն է, որը Ադրբեջանը պաշտոնապես իր համար գործողության մեջ է դրել 1993-ի սեպտեմբերի 24-ից: Այդ րձնագրության երկրորդ մասում հստակ ասված է, որ երկրների համար այս համաձայնագրի կետերը կողմերի համար ուժի մեջ են մտնում պաշտոնապես անդամակցելու պահից: Ըստ այդմ, եթե Նիկոլ Փաշինյանն Ալմա-Աթայի հռչակագիրն է հիմք ընդունում, 1993 թվականի սեպտեմբերի 24-ի դրությամբ հաստատված շփման գիծը պետք է լինի սահմանազատման հիմքը, եւ դա հիմք ընդունելով դու պետք է կատարես ճշգրտումներ»,-ասաց նա:

Արծվիկ Մինասյանի խոսքով, ՀՀ ինքնիշխան իրավազորության տակ գտնվողն տարածքները նրանք են, որոնք 1993-ի սեպտեմբերի 24-ի դրությամբ այդ տարածքներում գործել է ՀՀ օրենքը, եւ երկրորդ, բոլոր այն տիտղոսները՝ Արծվաշենի, Հայաստանի բռնազավթված այն տարածքների նկատմամբ, որոնք խորհրդային ժամանակահատվածում պատկանել են Հայաստանին»: