«ԱԺ-ում ՄԻՊ-ի զեկույցից պարզ դրաձավ, որ իրեն ժողովրդավարության բաստիոն հռչակած երկրում կալանավորվածների 53 %-ն անմեղ են, որովհետև այդ մարդկանց նկատմամբ դատարանի օրինական ուժի մեջ մտած վճիռ չկա»,- ԱԺ ասուլիսների ժամանակ հայտարարեց ՀՅԴ անդամ, «Հայաստան» խմբակցության պատգամավոր Արթուր Խաչատրյանը՝ անդրադառնալով նստաշրջանի ժամանակ օմբուդսմենի զեկույցին։

Մեկնաբանելով Գլխավոր դատախազ Աննա Վարդապետյանի զեկուցը՝ ընդդիմադիր պատգամավորն ասաց. «Գլխավոր դատախազը հերքեց, քաղաքական իշխանությունների, Նիկոլ Փաշինյանի, ՔՊ-ի այն պնդումները, թե Հայաստանում որոշ ուժեր արտերկրից դրդված փորձում են Հայաստանում հեղաշրջում իրականացնել։ Որևէ քրեական գործ չկա»։

Արթուր Խաչատրյանը հիշեցրեց, որ պատերազմի օրերին և դրանից հետո իշխանությունները հայտարարում էին, որ Ստեփանակերտի գրանցումով ինչ-որ մի մարդ փորձել էր դասալքություն հրահրել, թե պատերազմի ժամանակ զինանոցներից կամավորներին զենք չեն տվել՝ նշելով, որ դրանք քարոզչական փուչիկներ էին։

Նա հայտնեց, որ սահմանազատման գործընթացն անվերապահ կապիտուլյացիա է, ադրբեջանական ճնշումների դեմ ընկրկում է, իսկ իշխանությունները ժողովրդից գաղտնի են պահում քարտեզները, որոնցով գործընթաց է գնում։

Անդրադառնալով «Տավուշը հանուն Հայաստանի» շարժմանը Խաչատրյանն ասաց, որ շարժման մեջ շատ ակտիվ մասնակցություն ունի Դաշնակցությունը։

«Մենք միշտ հայտարարել ենք, որ աջակցում ենք շարժմանը, հիմա էլ կոչ ենք անում Հայաստանի ճակատագրով հետարքրքված բոլոր քաղաքական ուժերին միանալ շարժմանը, որովհետև սա իշխանության համար շարժում չէ, սա Հայաստանի տարածքային ամբողջականության, ինքնիշխանության, անկախության և հայ ժողովրդի արժանապատվության համար շարժում է»,- ասաց նա։

«Սա ժողովրդի ձայնն է, որ իշխանություններին ասում է. «Դուք չեք կարողանում ապահովել երկրի անվտանգությունը»:

Անդրադառնալով իշխանությունների ներկայացուցիչների հայտարարություններին, թե տավուշյան շարժման միջոցով որոշ ուժեր ցանկանում են հայաստանը դարձնել ծայրագավառ՝ Արթուր Խաչատրյանն ասաց. «Ես չգիտեմ, թե Հայաստանում կա նման ուժ, որը ցանկանում է երկիրը դարձնել ծայրագավառ, բայց տեսնում եմ, որ ՔՊ-ն ուզում է Հայաստանը դարձնել վիալայեթ և դրա համար այդքան հանճույքով Փաշինյանը գնացել էր Էրդողանի երդմնակալությանը, նստել Ալիևի թիկունքում և նայել նրա ծոծրակին»։

Նա ենթադրեց, որ Փաշինյանին թույլ չեն տվել գնալ Վլադիմիր Պուտինի երդմնակալությանը. հավանաբար էրդողանի երդմնակալության քաղցր հիշողությունները չի ցանկանում մթագնել նոր տպավորություններով։

Մենք մանդատները վայր կդնենք, բայց Փաշինյանը չպետք է մնա վարչապետի պաշտոնակատար և օգտագործի բոլոր վարչական ռեսուրսները ընտրություններում ձայներ ապահովելու համար. հայտարարեց Արթուր Խաչատրյանը՝ անդրադառնալով ԱԺ նախագահ Ալեն Սիմոնյանի այն հայտարարություններին, որ եթե ընդդիմությունը մանդատները վայր դնի, ՀՀ-ում արտահերթ ընտրություններ տեղի կունենան։

«Ասում են 2 անգամ հրաժարական է տվել, այո, բայց մնացել է վարչապետի պաշտոնակատար նույն լծակներով, ի՞նչ տարբերություն հրաժարական է տվել, թե չի տվել։ Այդ մարդն իր թիմում մի վստահելի մարդ չունի՞, որ մի քանի օրով ասի առ կնիքը, գնա կառավարի։ Ընտրություններ, այո, պետք է լինեն, բայց ընտրության ամենակարևոր և առաջին պայմանը՝ Փաշինյանը չպետք է լինի վարչապետի ժամանակավոր պաշտոնակատար»,- ասաց նա։

Մանրամասները՝ տեսանյութում

https://youtu.be/GTvbARoq3Vc