Alpha News-ի ուղիղ եթերում ՀՅԴ Հայ դատի Եվրոպական գրասենյակի նախագահ Գասպար Կարապետյանն անդրադարձել է Ադրբեջանի նախագահ Իլհամ Ալիևի նոր պահանջին։ Հիշեցնենք, որ Ալիևը Խոջալուում հայտարարել է, թե «Հայաստանը պետք է ճանաչի Խոջալուի ցեղասպանությունը և ներողություն խնդրի»։

«Ակնկալելի էր, որ Ալիևը նման բան կասեր։ Քանի ինքը այսօրվա իշխանության հետ լեզու է գտել, վտանգավոր է։ Նրանք ինչ ուզեն, այս իշխանությունը կկատարի»,- նշում է Գասպար Կարապետյանը։

Մեր զրուցակիցն անդրադարձ է կատարել նաև «Տավուշը հանուն հայրենիքի» շարժմանը։ Կարապետյանի խոսքով՝ այս իշխանությունները քննադատում են շարժումը, բայց իրենք էլ հաջողության են հասել քայլերթով։

«Ես լավատես չեմ։ Այլևս անհնարին է երկար ճանապարհ գնալ այս իշխանության հետ։ Տպավորություն է, որ Նիկոլ Փաշինյանը ամեն գնով պիտի փորձի իր աթոռի վրա մնալ ու այս իշխանությունը պահել։ Այս ամենը շատ վատ է երկրի համար։ Եթե ես Փաշինյանի տեղը լինեի ու ունենայի հայրենասիրական ջիղ իմ մեջ, պիտի փորձեի որևէ լուծում գտնել»,- ասել է Գասպար Կարապետյանը։

Նա նաև նշել է, որ Հանրապետության հրապարակում մարդկանց հոծ բազմություն հավաքելը բարդ է, բայց Բագրատ Սրբազանին դա հաջողվում է․

«Կարևորն այն է, որ երկրում կա շարժում։ Դա տեսանք Բագրատ Սրբազանի քայլերթով։ Երբ այսօրվա վարչապետը սկսեց քայլերթ անել Գյումրիից, 3 հոգով էին, 4-5 հոգով հասավ այստեղ։ Պայմաններն այդպես ստեղծվեցին ու ունեցան մեծ հանրահավաքներ։ Հիմա այդ նույն մարդիկ չեն հասկանում երկրի վիճակի լրջությունը: