Այսօր՝ հունիսի 9-ին Հանրապետության հրապարակում մեկնարկեց «Տավուշը հանուն հայրենիքի» շարժման առաջնորդ Բագրատ Սրբազանի հրավիրած համազգային հանրահավաքը։

Մինչեւ հանրահավաքի սկսելը երիտասարդները Սասունցի Դավիթ կայարանի, Հրազդան մարզադաշտի և Մատենադարանի հարակից տարածքներից երթով միացան հրապարակում հավաքված բազմահազար քաղաքացիներին:

Հանրահավաքը մեկնարկեց ՀՀ օրհներգով եւ Տերունական աղոթքով:

Մեծ էկրանի վրա ցուցադրվեց ոստիկանական վայրագություններն հիշեցնող տեսանյութ:

Այս շրջանում իշխանությունները բազմաթիվ միջոցներով ճնշում են մարդկանց, դա կարող է դրսևորվել մատ թափ տալուց սկսած մինչև կալանավորում: Ունենք քաղբանտարկյալներ, որոնք երկար ժամանակ է նստած են. իր ելույթում հայտարարեց փաստաբան Ռուբեն Մելիքյանը։

Անդրադառնալով ԱԳՆ շենքի դիմաց ոստիկանների կողմից քաղաքացիների նկատմամբ բիրտ ուժ գործադրելուն՝ փաստաբանն ասաց․ «Քանի դեռ մի ոստիկան չի կանչվել պատասխանատվության, քաղաքացիների նկատմամբ ցանկացած գործողություն, այդ թվում՝ ձերբակալում և կալանավորում ապօրինի է, քանի որ տարբերակված մոտեցում է կիրառվում»։

Հինգ իրավապաշտպանների անունից ուզում ենք կարմիր բերետ նվիրել ՄԻՊ-ին, որովհետև նա հիանալի պաշտպանում է կարմիր բերետների իրավունքը. ասաց Ռուբեն Մելիքյանը՝ հավելելով, որ վաղն այն անպայման կառաքվի Անահիտ Մանասյանին։

«Իմաստ չունի իմ սովորելը, եթե հետո պետք է դառնամ թուրքի կիրթ ստրուկը: Մենք՝ ուսանողներս, գիտակցում ենք ավելին, քան թվում է շատերին։ Վերջին հինգ տարիներին մենք շատ բան հասկացանք։ Շատ ժամանակ դժվար էր կոշմնորոշվել՝ փողոց դուրս գալ, մտնել պայքարի մեջ, բայց այսօր մեզ այլ ճանապարհ չեն թողել։ Մենք հաղթանակի սերունդ ենք և մեր հաղթանակաը պետք է շարունակական լինի։ Մենք համաձայն չենք ապրելու պարտվողի հոգեբանությամբ։ Ես այստեղ եմ, որ ունենամ ամուր պետություն, որպեսզի կառուցեմ իմ ապագան արժանապատիվ երկրում, ստիպված չլինեմ արտագաղթել այլ երկիր»,- իր խոսքում ասաց ԵՊՀ ուսանող Արման Սարգասյանը, որը պայքարի օրերին տուժել է նաև ոստիկանների բռնի գործողություններից։

Հանրահավաքի ժամանակ ցուցադրվեց տեսանյութ այն մասին, թե ինչ է նշանակում «Սրբազան պայքար»-ի տարբերանշանը:

Թուրքագետ Վարուժան Գեղամյանը իր ելույթում նշեց. մեկ ամիս է, ինչ Թուրքիայում և Ադրբեջանում ուշադիր հետևում են Հայաստանում տեղի ունեցող գործընթացներին։ Ձեր պայքարին հետևում են անհանգստացած, որ հանկարծ այստեղ մի փոփոխություն չլինի:

«Բացի այն, որ անհանգստանում են, այլև ձեր սկսած պայքարի պատճառով Թուրքիայում հրավիրում են անվտանգության խորհրդի նիստ, որովհետև Հայաստանում իշխանափոխությունը ձեռնտու չէ իրենց շահերին»,-ասաց Գեղամյանը՝ հավելելով, իրենք անհանգստանում են, որովհետև գիտեն՝ բոլորիս պայքարը բերելու է ոչ թե թուրքական, այլ՝ հայկական խաղաղություն։

Բագրատ արքեպիսկոպոս Գալստանյանը հայտարարեց. կեղծ են բոլոր թեզերը, որ այսօր պատերազմ գոյություն չունի, և իբրև թե մենք ենք նպաստելու դրա վերսկսմանը հայտարարեց

«Սա ամենամեծ կեղծիքն է, քանի որ պատերազմ բերած իշխանությունը չի կարող պատերազմ ավարտել։ Լավագույն դեպքում այն մեզ տանելու է ամբողջական ինքնահանձնման, մեր հայրենիքի, պետության և ինքնության կորստով։ Պատերազմը չի ավարտվել։

Այն շարունակվում է այս հանցավոր սահմանազատման և սահմանագծման տեսքով»,-ասաց Սրբազանը։

Անցումային կառավարությունը կպատրաստվի արտահերթ ընտրությունների` առանց դրան մասնակցելու. հայտարարեց Բագրատ Սրբազանը։

Նա նշեց, թե անցումային կառավարությունը օրակարգային ինչ երեք ուղղություններով է աշխատելու․

«ա) Հաշտության կառավարություն վերկուսակցական՝ կազմված բոլոր ունակներից՝ իրենց մասնագիտական վաստակով, գիտելիքներով և նվիրումով։ Ներքին հաշտության՝ արդարության սկզբունքի վրա։

բ) Արտաքին հարաբերություներ՝ իրական խաղաղության, առանց հակաների, հայկական օրակարգով

գ) Սահմանված ժամկետում արտահերթ կամ հերթական ընտրությունների նախապատրաստում և անցկացում՝ առանց հավակնություն ունենալու մասնակցելու այդ ընտրություններին՝ ազատ ու թափանցիկ միջավայր և մեկնարկային արդարություն ապահովելով բոլոր քաղաքական ուժերի համար»։

Բագրատ Սրբազանը հայտարարեց շարժման առաջիկա օրերի անելիքները և պահանջները։

«Դիմում եմ ԱԺ բոլոր խմբակցություններին․

Քայլ 1. Մեր պահանջով Ազգային ժողովի ընդդիմադիր պատգամավորները նախաձեռնում են խորհրդարանի արտահերթ նիստ հունիսի 11-ին` ժամը 18։30-ին, կառավարության հրաժարականի և նոր կառավարություն ձևավորելու օրակարգով։

Քայլ 2. Հունիսի 10-ին Ազգային ժողովի խորհուրդը ժողովրդի որոշմամբ պարտավոր է ընդունել որոշում արտահերթ նիստ հրավիրելու մասին, քաղաքական մեծամասնությունը՝ ՔՊ-ական պատգամավորները, պարտավոր են ենթարկվել ժողովրդի կամքին, գործել անձնական խղճով և համոզմունքով։ Մեր ներկայությամբ մենք նրանց թույլ չենք տալու հերթական հակապետական սխալը գործել։

Քայլ 3. Համաժողովրդական պահանջի հիման վրա խորհրդարանը իր արտահերթ նիստով հավանություն է տալիս գործող կառավարության հրաժարականի և նոր կառավարություն ձևավորելու որոշմանը»։

Խաղալու ժամը չէ, պետք է գործել. հայտարարեց Սրբազանը:

Հանրահավաքի ավարտին Հանրապետության հրապարակից մեկնարկեց երթ՝ Ամիրյան, Մաշտոց և Բաղրամյան փողոցներով: