ՀՅԴ Զաւարեան ուսանողական միութիւնը խստօրէն կը դատապարտէ`

1.- Հայաստանի իշխանութեան ապազգային ու ամօթալի գործընթացը:

«Տաւուշը յանուն հայրենիք» շարժումին հանդէպ սկզբնական լռութիւնը եւ ապա վերջին օրերուն հակաօրինական բոլոր քայլերը` բողոքող ժողովուրդին հանդէպ ընդհանրապէս եւ ՀՅ Դաշնակցութեան հանդէպ մասնաւորապէս:

2.- ՔՊ-ով գլխաւորուած Հայաստանի իշխանութեան բռնաճնշումներու նոր ալիքը:

ՀՅԴ-ի դէմ կատարուած վերջին շրջանի բռնաճնշումներու նոր ալիքին հիմնական նպատակն է անբարոյ եւ ոչ իրաւական մեթոտներով կանխել ու բռնաճնշել ՀՅԴ-ի նման կազմակերպութիւնները, որոնք առաջնորդուած են ազգային ուղեգիծով եւ ունին սկզբունքային դիրքորոշումներ Հայաստանի Հանրապետութեան ու Արցախի նկատմամբ եւ կը գերադասեն ազգն ու հայրենիքը ամէն բանէ:

3.- Հայաստանի Ոստիկանութեան յարձակումը ՀՅԴ «Սիմոն Վրացեան» կեդրոնին վրայ:

Ոստիկանութիւնը բիրտ ուժ կիրարկեց` յարձակելով եւ ապօրինի բերման ենթարկելով կուսակցութեան բազմաթիւ անդամներ, ինչպէս նաեւ` Ազգային ժողովի պատգամաւոր եւ ՀՅԴ Գերագոյն մարմինի նախագահ Աշոտ Սիմոնեանը:

4.- Ապատեղեկատուութիւնը` ՀՅԴ Հայաստանի ԳՄ անդամ Գերասիմ Վարդանեանին հասցէին:

Կեղծ ձայնագրութիւններ եւ լուրեր տարածելով` հարուածելու համար Գերասիմ Վարդանեանի հիմնական արժէքները, զորս ժողովուրդը կը նկատէ անոր մէջ` բարոյական նկարագիր, ազգային արժէքներ եւ ժողովրդավարութիւն:

5.- ՀՅԴ-ի ընկերվարական սկզբունքներու դէմ յստակ ամբաստանութիւն:

ՀՅԴ ընկերվարական հիմնական սկզբունքն է պաշտպանել շահագործուած տարրը եւ ըմբոստանալ շահագործողին դէմ: «Սրբազան պայքար» նորաստեղծ այս շարժումը ժողովուրդին մէջ համախմբեց «Մշակը, բանուորը եւ ռենչպեր ախպերը»: Հետեւաբար, ինչպէ՞ս կարելի է ամբաստանել եւ յայտարարել, որ ՀՅ Դաշնակցութիւնը կը շահագործէ եւ կը կաշառէ Հայաստանի ժողովուրդը, մանաւանդ` արցախցի ժողովուրդը, մասնակցելու նման հաւաքներու եւ ցոյցերու:

6.- Նիկոլ Փաշինեանի կեցուածքը` մեր նահատակներուն եւ խաչի նկատմամբ:

Նիկոլ Փաշինեանի մտայնութեամբ, «Մեր նահատակները զոհուեցան, որ մեր երեխաներուն վիզը խաչ կապե՞նք, ո՛չ, պէտք է իրենց կեանքը վայելեն, որովհետեւ կեանքէն հաճոյք ստանալը ամօթ չէ»:

Առաջին անգամը չէ, որ Փաշինեան կը հարուածէ հայ եկեղեցին եւ յստակօրէն կը յայտնէ խաչին ու Աստուծոյ նկատմամբ իր անհաւատութիւնը, անընդունելի է նաեւ անոր վերաբերումը հայ զինուորին նկատմամբ, որովհետեւ կը պղծէ մեր նահատակներուն թափած արիւնը, զոր շաղախուած է մեր սուրբ հողին:

7.- Նիկոլ Փաշինեանի կեցուածքը` Արցախի նկատմամբ.

«Պէտք էր 2018-ին ըսէի, որ Լեռնային Ղարաբաղը պէտք է միացուի Ազրպէյճանի»:

Փաշինեան իր այս համոզումով եւ խորհրդարանին մէջ ունեցած արտայայտութեամբ կը փաստէ, որ ինք անցնող վեց տարիներուն գործած է անէացնելու Արցախի գաղափարը, անէացնելու բոլոր մեր ազգային արժէքները` դիտումնաւոր կերպով պարտութեան տանելու 2020 թուականի արցախեան պատերազմը եւ իրերայաջորդ դէպքերը:

Յստակ է, որ ներկայ իշխանութիւնները կը փորձեն ՀՅ Դաշնակցութեան երթը կասեցնել, սակայն 134 տարեկան այս կուսակցութիւնը իր պատմութեան տարբեր փուլերուն ենթարկուած է բազմաթիւ ամբաստանութիւններու, տեսած է զրկանքի ու տառապանքի բոլոր ձեւերը, դիմագրաւուած է դաւաճաններ ու թշնամիներ, սակայն երբեք չէ ընկրկած, այլ յաղթահարած է բոլոր դժուարութիւնները եւ շարունակած` իր անխափան երթը:

Վստահ ենք` այս ալ կը յաղթահարենք:

ՀՅԴ ԶԱՒԱՐԵԱՆ ՈՒՍԱՆՈՂԱԿԱՆ ՄԻՈՒԹԻՒՆ