Oragir.News-ի «Ըստ էության» հաղորդաշարի տաղավարում հյուրընկալվել է ՀՅԴ անդամ, ԱԺ «Հայաստան» խմբակցության քարտուղար Արծվիկ Մինասյանը։

Խոսելով «Տավուշը հանուն հայրենիքի» շարժման հաջողության հասնելու հնարավորությունների մասին՝ Մինասյանը նշեց՝ շարժումը միանշանակ հաջողելու է, երկրորդ կարծիք լինել չի կարող։

Դիտարկմանը, որ տպավորություն է, թե շարժումը մարել է, Մինասյանը նկատեց.

«Տպավորությունը, որ շարժումը մարել է, անշուշտ իրականությունը չի արտացոլում։ Այս շարժումը ծնվեց կոնկրետ Տավուշում՝ չհիմնավորված, անհասկանալի կերպով սահմանազատում կոչված երևույթի շուրջ ձևավորված ընդվզումով։ Շարժման նպատակը Հայաստանի անվտանգությունն է։ Այս շարժումը մարել չի կարող, քանի որ հիմա նոր դրսևորումներ է ստանում։ Ես կարծում եմ՝ այս վերադասավորումը, որը տեղի է ունենում շարժման շրջանակներում, աշնանը բերելու է շատ ավելի մեծամասշտաբ, ավելի լայն, ավելի կոնկրետ գործողությունների, որոնք պետք է պսակվեն հաջողությամբ»։

Արծվիկ Մինասյանը նշեց նաև, որ այս պահին հանրային ճնշումը բավարար չէ իմպիչմենթի գործընթացի համար։

Հարցին՝ ի՞նչ է սա ենթադրում՝ ժողովուրդը չի՞ ուզում, որ այս իշխանությունը հեռանա, թե՞ անհրաժեշտ է, որ ՔՊ-ի շրջանակից միանան շարժմանը, Մինասյանը պատասխանեց.

«Ակնհայտ է, որ այստեղ ժողովրդի ընդվզումը, մարդաշատությունը չափազանց կարևոր է, որպեսզի նաև իշխանությանը սատարող կամ իշխանության մեջ գտնվող մարդիկ հասկանան, որ սա համաժողովրդական այնպիսի ընդվզում է, որը չի կարող քողարկվել, չի կարող թաքցվել իրենց կեղծ թեզերի ներքո։ Դրանով է շատ կարևոր, որ սկսվի երերման պրոցեսը՝ իշխանությունը սկսի փլուզվել։ Հայաստանը պետք է դուրս բերել աշխարհաքաղաքական այս թոհուբոհից, այսինքն՝ հանել բոքսի տանձիկի կարգավիճակից և դնել հանդարտության ռեժիմ»։

Մանրամասները`տեսանյութում