Հուլիսի 4-ին Հրապարակ TV-ի Հինգշաբթի հաղորդաշարի հյուրն էր Իրանի Իսլամական Հանրապետության խորհրդարանի նախկին պատգամավոր Կարեն Խանլարյանը: Անդրադարձ է կատարվել Իրանում տեղի ունեցած նախագահական ընտրություններին, թեկնածուների քաղաքական հայացքներին, երկրորդ փուլ անցած գործիչների ներկայացրած քաղաքական հոսանքներին, ինչպես նաև նրանցից մեկնումեկի հաղթանակի պարագայում հայ-իրանական հարաբերությունների նորովի զարգացման հնարավորություններին:

Կարեն Խանարյանը խոսել է նաև Իրան-Հայաստան հարաբերությունների ներկա փուլի մասին, մտահոգություն հայտնել ՀՀ իշխանությունների վարած տարածաշրջանային քաղաքականության կտրուկ փոփոխությունների կապակցությամբ, որոնք միշտ չէ, որ ճիշտ ընկալում են ունենում դաշնակից պետությունների, այդ թվում՝ Իրանի կողմից: Չնայած դրան, նշել է Կարեն Խանլարյանը, տարածաշրջանային խոշոր տերությունները և ի մասնավորի Իրանի Իսլամական Հանրապետությունը, որպես Հայաստանի Հանրապետության բնական դաշնակից, շարունակում հետևողականորեն հետապնդել իր որդեգրած մոտեցումները՝ կապված սահմանների անփոփոխելիության, ինչպես նաև արցախահայության ինքնորոշման իրավունքի հետ:

Խոսելով արտաքին քաղաքականության մեջ ՀՀ իշխանությունների կատարած կտրուկ դարձումների, վեկտորներ փոխելու և դա որպես ՀՀ անվտանգության համակարգերի դիվերսիֆիկացիա ներկայացնելու փորձերի մասին՝ Կարեն Խանլարյանը մասնավորապես նշել է. «Նախ պետք է քաղաքական վեկտորի փոփոխությունը հստակ տարբերակել դիվերսիֆիկացիայի կամ զանազանակերպության մոտեցումից: Իմ կարծիքով անվտանգության տեսանկյունից թե արտաքին և թե տնտեսական քաղաքականության մեջ դիվերսիֆիկացման քաղաքականությունը կարող է օգտակար լինել ոչ միայն Հայաստանի Հանրապետության, այլև ցանկացած պետության համար: Բայց ինչպես ասացի՝ վեկտորի փոփոխությունը պետք է տարբերակել անվտանգության համակարգերի դիվերսիֆիկացիայից: Վեկտրի փոփոխությունը բոլորովին այլ մակարդակի խնդիր է, որի իրականացումը մեկ-երկու օրվա հարց չէ, իսկ որոշ դեպքերում անգամ՝ անհնարին է: Օրինակ, եթե Հայաստանի Հանրապետությունը հենց վաղը որոշի մտնել ՆԱՏՕ, ապա, դա հնարավոր չի լինի իրականացնել ընկալելի ժամանակահատվածում մի պարզ պատճառով, որ ՆԱՏՕ-ն ինքը պատրաստ չէ դրան: Իմ կարծիքով՝ Հայաստան-Իրան փոխհարաբերություններում տարակարծությունները սկսվեցին այն բանից հետո, երբ Հայաստանի անվտանգային համակարգերի դիվերսիֆիկացման խնդիրը ճիշտ չներկայացվեց միջազգային հարթակներում և տպավորություն ստեղծվեց, թե Հայաստանը քաղաքական վեկտորի փոփոխություն է կատարում»:

Մանրամասները՝ տեսանյութում