Երեւան, 28 Յուլիս, 2000 (Հ.Յ.Դ. Մամլոյ Դիւան).- Ստորեւ Հ.Յ.Դ. Արցախի Կենտրոնական Կոմիտէի յայտարարութիւնը՝ Ստեփանակերտի թիւ 4 եւ 7 ընտրատարածքներում ԼՂՀ Ազգային Ժողովի ընտրութիւնները անվաւեր յայտարարելու Գերագոյն Դատարանի Սահմանադրական Ատեանի որոշումի առթիւ։

Սույն թվականի հուլիսի 14-ին ԼՂՀ երագույն Դատարանի Սահմանադրական Ատյանը, վարույթի ընդունելով իր լիազորություններից դուրս գտնվող հայցեր, անվավեր է ճանաչել Ստեփանակերտի թիվ 4 եւ 7 ընտրատարածքներում ԼՂՀ ԱԺ պատգամավորների ընտրությունը:

ԼՂՀ երագույն Դատարանի Սահմանադրական Ատյանը քաղաքական պատվեր կատարելով, առանց իրավական եւ փաստական հիմնավորումների ընդունել է որոշում, որը խորհրդանշում է հանրապետական բարձրագույն իշխանությունների գործնական շեղումը երկրի ժողովրդավարացման եւ օրենքի գերակայության` իրենց իսկ հռչակած քաղաքական ուղեգծից:

Այդ ուղեգծից շեղումը ակնհայտ էր դեռեւս նախընտրական քարոզչության ժամանակ եւ ընտրությունների ընթացքում, երբ իշխանության օղակները (վարչապետ, վարչակազմի ղեկավարներ, գյուղապետեր, ուժային կառույցներ) ապօրինաբար մասնակցում էին քարոզարշավին եւ օգտագործելով բոլոր լծակները, փորձել էին իրենց համար ապահովել խորհրդարանական մեծամասնություն: ՀՅ Դաշնակցությունը, փորձելով հակազդել իշխանությունների թույլ տված ապօրինություններին, բազմաթիվ խախտումների մասին դիմել է դատական ատյանների, որոնք գործերը վարույթի չեն ընդունել:

Չնայած, որ օրինախախտումների մասին տեղյակ էր լայն հանրությունը, ՀՅ Դաշնակցությունը, մտահոգ լինելով երկրի միջազգային վարկանիշով, զերծ է մնացել դիմելու զնագվածային լրատվական միջոցներին:

Սակայն, երկրի ղեկավարությունը, կանգ չառնելով ընտրությունների արդյունքում ձեռք բերվածի վրա, շարունակեց ժողովրդավարության եւ օրինականության սկզբունքներին հակասող գործողությունները, որի վառ արտահայտումն էր ԼՂՀ Ազգային Ժողովի նախագահի ընտրությունը, որն անց է կացվել փակ գաղտնի քվեարկության հիմնական սկզբունքի խախտումով:

Այդ իսկ պատճառով, ՀՅԴ խորհրդարանական խմբակցությունը չի մասնակցել ԱԺ նախագահի ընտրության անօրինական քվեարկությանը: Հետեւաբար, ՀՅ Դաշնակցությունը ԼՂՀ ԱԺ նախագահի ընտրությունը համարում է ոչ օրինական, իսկ այդ եղանակով ընտրված ԱԺ նախագահին՝ ոչ լիգիտիմ:

Իշխանությունների անօրինությունները շարունակվեցին նաեւ վերոհիշյալ դատավարություններով, որի արդյունքում նվաղել է ԼՂՀ ԱԺ ՀՅԴ խմբակցության անդամների քանակը:

ՀՅ Դաշնակցությունը ներկայացրել է առաջարկություններ՝ ստեղծված իրավիճակը շտկելու համար, սակայն, երկրի ղեկավարությունը չի ցանկանում գտնել հարցի լուծումներ, դրանով իսկ էլ ավելի խորացնելով առաջացած իշխանական-օրենսդրական ճգնաժամը:

Այս պայմաններում ՀՅ Դաշնակցությունը գտնում է, որ միայն ողջ ժողովրդի միասնական ջանքերով է հնարավոր երկրի ղեկավարությանը մղել դեպի ժողովրդավարության եւ օրենքի գերակայության սկզբունքների հարգման ուղի:

25.07.2000