«Թե’ Թուրքիան, թե’ Ադրբեջանը մինչև իրենց ուզածը չստանան, հարաբերություններ չեն կարգավորի». այսօր ԱԺ-ում լրագրողների հետ ճեպազրույցի ընթացքում ասաց ՀՅԴ Բյուրոյի քաղաքական ներկայացուցիչ, «Հայաստան» խմբակցության պատգամավոր Արմեն Ռուստամյանը։

«Ամեն ինչ տեղի է ունենում կուլիսների հետևում, հանրությունը միշտ վերջին պահին է իմանում և կանգնում փաստի առաջ։ Միևնույն է, թե’ Թուրքիան, թե’ Ադրբեջանը մինչև իրենց ուզածը չստանան, որևէ առաջընթաց իրենց հարաբերությունների մեջ դժվար է կանխատեսել։ Նրանք Հայաստանի հետ կապերը կկարգավորեն այն ժամանակ, երբ իրենց պահանջները կբավարարվեն», – նշեց Ռուստամյանը։

Հայաստանն աշխարհին հետաքրքիր է երեք գործոնների պատճառով. Լեռնային Ղարաբաղ, որը մենք կորցրինք, պանթուրանական գծի վրա գտնվող Սյունիք, ինչպես նաեւ ատոմային էլեկտրակայան. ասաց Արմեն Ռուստամյանը։

Նրա խոսքով՝ Հայաստանը հենց այդ գործոններով է հետաքրքիր աշխարհին։ Նա նշել է, որ Երեւանն աստիճանաբար կրճատում է հաղթաթղթերի քանակը, որոնք ունի։

«Ղարաբաղյան հարցը օրակարգից դուրս եկավ։ ԱԷԿ հարցը տարբեր գերտերություններ փորձում են վերցնել իրենց վերահսկողության տակ։ Մնում է Սյունիքը, եւ եթե մենք այն կորցնենք, ապա այստեղ կսկսվի աշխարհաքաղաքական բախում։ Բոլորը ցանկանում են մասնակցություն ունենալ դրանում ի շահ իրենց՝ օգտագործելով Հայաստանը»,- ենթադրել է պատգամավորը։

Նրա կարծիքով՝ խնդիրն այն է, որ Հայաստանն այս պայմաններում դառնում է ոչ թե գործոն, այլ գործիք։ Միջնորդների ակտիվությունը հայ-ադրբեջանական հարցերում Ռուստամյանը բացատրել է նրանով, որ տարածաշրջանում աշխարհաքաղաքական հարց է լուծվում։

Ադրբեջանի հետ հարցերի լուծման երկկողմ ձեւաչափը, առանց միջնորդների ներգրավման, ծուղակ է եւ փակուղի, քանի որ չի լինի վեճերի լուծման մեխանիզմ. ասաց Արմեն Ռուստամյանը։

Նա ավելացրեց, որ ՀՀ վարչապետը Թուրքիային խնդրում է, որ նա միջամտի հայ-ադրբեջանական հարցերին։ Նրա խոսքով՝ Փաշինյանի համար Թուրքիայի ներգրավումը ընդունելի է, իսկ «3+3» ձեւաչափը որպես բանակցությունների հարթակ՝ ոչ, չնայած վերջինի միջնորդությունը կարող է Հայաստանի համար ավելի նպաստավոր լինել, քան միայն թուրքականը։

«Փաշինյանը Թուրքիային խնդրում է օգտագործել իր ազդեցությունը Ադրբեջանի վրա։ Բա միջամտությունն էլ ո՞նց է լինում։ Մեր շահերն Իրանի հետ խիստ համընկնում են, Ռուսաստանի շահերի հետ որոշակի չափով նույնպես համընկնում են, բայց հակասում են Թուրքիայի եւ Ադրբեջանի շահերին։ Ամեն բան կախված է նրանից, թե ինչպես ենք մենք տեսնում մեր շահերը։ Եթե, ինչպես դա անում են իշխանությունները, տեսնում ենք Թուրքիայի եւ Ադրբեջանի հետ, ապա դա նշանակում է, որ մենք մեզ դնում ենք լուրջ ճնշման տակ եւ կրճատում ենք մեր շահերը պաշտպանելու հնարավորությունը»,- նշեց է Ռուստամյանը։

Մանրամասները՝ տեսանյութում