Շարժման քայլերը քննադատում են մարդիկ, ովքեր Արցախի կորստի ժամանակ մատը մատին չեն խփել
24 Հոկտեմբեր 2024
Մենք կարողացանք տրամադրություններ փոխել, մեր քայլերի շնորհիվ կարողացանք հասարակությանը արթնացնել և հիմա էլ «Սրբազան պայքարը» կանգնել է բոլորի կոկորդին. այս մասին այսօր «Սրբազան Պայքարի» աջակիցների իրավունքների զանգվածային խախտումները» թեմայով հրավիրված ասուլիսի ժամանակ հայտարարեց ՀՅԴ անդամ, ԱԺ «Հայաստան» խմբակցության պատգամավոր, «Տավուշը հանուն հայրենիքի» շարժման մասնակիցներից Գառնիկ Դանիելյանը։
Նա նշեց, որ իշխանությունները, եթե ասում են, որ այս շարժումը մարել է, ապա ինչու են ամեն օր «Սրբազան պայքարի» ակտիվ համակիրների ու աջակիցների նկատմամբ բռնություններ կիրառվում։
«Այս մարդիկ ստեղծել են հանցավոր խմբեր, որոնք առանց պատճառի կանգնեցնում են մարդկանց մեքենաները, ահաբեկչի գործելաոճով մարդկանց տանում են ոստիկանական բաժանմունքներ և կտտանքների ու հալածանքների ենթարկում։ Եթե ամեն ինչ նորմալ է, շարժումը մարած է, ապա այս ճնշումներն ինչի՞ համար են»,- ասաց Դանիելյանը։
Այսօր «Սրբազան պայքար»-ը քննադատում են մարդիկ, որոնք ոչինչ չեն արել, մատը մատին չեն տվել։
«Արցախի կորստի ժամանակ, երբ տասնյակ հազարավոր քաղաքացիներ, քաղաքական գործիչներ դուրս եկան պայքարի, այդ մարդիկ ո՞ւր էին, Նիկոլ Փաշինյանի հետ զբաղված էին Արցախը հանձնելու գործընթացով: Կիրանցում տեղի ունեցած իրադարձությունները կարևո՞ր չէին իրենց համար։ Սրբազան շարժումը պատրաստ է բոլոր առաջարկները քննարկելու, պայքարի դռները բաց են բոլորի համար, այնպես որ համագործակցողը կհամագործակցի, պայքարողը կպայքարի, իսկ ստատուս գրողը կմնա ստատուս գրող»,- ասաց նա։
«Խոստովանում ենք նաև, որ այս կարճ ժամանակահատվածում իշխանությանը հեռացնել չի ստացվել, բոլորս վճռական ենք պայքարը շարունակելու հարցում»։
Անդրադառնալով հունիսի 12-ին խաղաղ ցուցարարների նկատմամբ կատարված բռնություններին՝ Գառնիկ Դանիելյանն ասաց․ «Ակնհայտ է, որ իշխանությունների կողմից կա հստակ հովանավորչություն, ցուցում, որ նամանավանդ ցույցերի ակտիվ փուլի ժամանակ և անհնազանդության ակցիաների ժամանակ բռնություն գործադրեն ցուցարարների նկատմամբ․ օրինակ՝ «Զարյա-3»-ի՝ արգելված միջոցների կիրառումը»։
Մանրամասները՝ տեսանյութում
