Շոկի մեջ եմ, վատ երազում էլ չէի տեսնի, որ գերիների հարցն ԱԺ-ում կարող են դարձնել իմ ու քո հարց. ՔՊ-ի կողմից «Ադրբեջանում պահվող հայ ռազմագերիների վերաբերյալ» ԱԺ հայտարարության նախագծի ընդունման տապալումից հետո լրագրողներին ասաց ՀՅԴ Բյուրոյի քաղաքական ներկայացուցիչ, «Հայաստան» խմբակցության պատգամավոր Արմեն Ռուստամյանը։

«20 տարվա պատգամավորական կենսագրություն ունեմ, բայց չէի պատկերացնում, որ ժողովը, որը կոչվում է ՀՀ Ազգային ժողով, կարող է գերիների հարցը դարձնել ոչ միայն իմ ու քո հարց, այլև մերժել։ Այսպիսի բան կարող էր լինել միայն Միլլի մեջլիսում։ Այստեղ, փաստորեն, մենք ունենք իրավիճակ, որ ռազմագերիների հարցի մասով, որը մեր արժանապատվության հարցն է, որոշ մարդիկ հայտարարում են, որ ընդդիմությունն այս ամենն անում է՝ թքած ունենալով գերիների վրա։ Այսի՞նքն։ Մենք այնտեղ մոտիկ ընկերներ ունենք, որ այսօր գտնվում են բանտերում, ուրեմն Գեղամ Մանուկյանը թքա՞ծ ունի իր եղբոր ճակատագրի վրա, ես թքա՞ծ ունեմ Բյուրոյի իմ գործընկեր Դավիթ Իշխանյանի վրա»,-ասաց Ռուստամյանը։

Նա նշեց, որ ռազմագերիների հարցն արժանապատվության հարցն է, անգամ մարդկանց լեզուն պտտվում է ասի՝ «ընդդիմությունը դա անում է՝ թքած ունենալով նրանց ճակատագրի վրա»։

«Այսինքն մենք այնտեղ ունենք մեզ մոտիկ ընկերներ, մեր Գեղամ Մանուկյանը ուրեմն թքած ունի՞ իր եղբոր ճակատագրի վրա։ Ես թքած ունեմ մեր Բյուրոյի ընկերոջ՝ Դավիթ Իշխանյանի ճակատագրի վրա՞։ Լավ, կարելի է այդ աստիճանի անամոթ հայտարարությունել անե՞լ։

Իմ մոտ արդեն խորանում է այն տպավորությունը, որ մեր իշխանությունները պատանդ են Ադրբեջանի իշխանությունների ձեռքին։ Սրանք սպասարկում են Ադրբեջանի շահերը։ Այս ամենը հնարավոր չէ այլ կերպ մեկնաբանել»,- նշեց նա։

Արմեն Ռուստամյանն ասաց, որ այս հայտարարության մեջ որևէ ներքաղաքական խնդիր չկա։

«Շատ տարաձայնություններ ունենք իրենց հետ, բայց իշխանությանն ուղղված որևէ մեղադրանք չկար դրա մեջ»,- նշեց ընդդիմադիր պատգամավորը։