«Հրապարակի» զրուցակիցը Սիրիայի խորհրդարանի հայազգի պատգամավոր Մարիա Գաբրիելյանն է:

– Սիրիայում ՀՀ դեսպանությունն ու Հալեպում ՀՀ գլխավոր հյուպատոսությունը հայտարարել են, որ ներկայում տարհանում կազմակերպելն անհնարին է` քաղաքը փակ է, բայց մեր հայրենակիցներին օժանդակելու նպատակով ստեղծվել է թեժ գիծ (+ 963 96 000 36 22)։ Հատկապես ի՞նչ խնդիրների հետ են բախվում մեր հայրենակիցները, ի՞նչ իրավիճակ է այս պահին:

– Հիմնական խնդիրը ստեղծված անորոշությունն է, անապահովության զգացումն ահավոր մթնոլորտ ստեղծեց, երբ վայրկյանների ընթացքում ամբողջ նահանգը դատարկվեց իշխանության ներկայացուցիչներից եւ անցավ ընդդիմության տիրապետության ներքո։ Երկրորդ խնդիրն աշխատանքի պարագան է, բացի վաճառատներից, մնացյալ հիմնարկները փակ են, նույնիսկ եթե բաց լինեն, ապա ի՞նչ գործ… Մեծաթիվ ընտանիքներ օրապահիկով են ապրում, հետեւաբար՝ նրանք զրկվեցին առօրյա նյութական մուտքերից։ Փոքրիկներ ունեցող ընտանիքներին, ինչպես նաեւ տարեցներին անհրաժեշտ օգնություն մատակարարելն առաջնային խնդիր է։

– Հալեպում ՀՀ գլխավոր հյուպատոսը տեղափոխվել է Դամասկոս` աշխատում է ՀՀ դեսպանությունում։ Կապի մե՞ջ եք մեր դիվանագիտական ներկայացուցչության հետ, կոնկրետ ի՞նչ քայլեր են արվում՝ ի աջակցություն սիրիահայության:

– Այո, կապեր կան, իսկ թե ինչ աշխատանքներ պիտի ծավալվեն աջակցության համար, առաջիկա օրերին կհստակեցվեն։ Բերիո Հայոց Թեմի Ազգային Առաջնորդարանն ու Արամ Մանուկյան կենտրոնը համայնքի տերն ու տիրականն են, նրանք են համակարգում ազգի զավակների կարիքները հոգալու աշխատանքները եւ այս իրավիճակից նվազագույն վնասներով դուրս գալու ջանքերը։

– Հայության շրջանում ներքին գաղթի կամ արտագաղթի մասին ի՞նչ տեղեկություններ կան, որքա՞ն է տեղահանվածների թիվը:

– Առաջին ժամերին ստեղծված խուճապի մեջ մի շարք ընտանիքներ ինքնակամ դուրս եկան քաղաքից եւ մեկնեցին մայրաքաղաք կամ ծովեզրյա շրջան։ Հալեպահայ համայնքի մեծամասնությունը Հալեպի մեջ է։

– ԶԼՄ-ները հայտնում են, որ ահաբեկիչները զանգվածաբար մարդկանց են առեւանգում, տներ թալանում: Սիրիահայությանը նման վտանգ սպառնո՞ւմ է:

– Հալեպի վրա իշխող ընդդիմության կողմից հայերի նկատմամբ մինչեւ այժմ նման դեպքեր չեն արձանագրվել։

– Թուրքամետ ասպտամբները պնդում են, որ նորանոր տարածքներ են գրավել՝ ընդհուպ հասնելով Հոմսին: Այն դեպքում, երբ Սիրիայի կառավարական բանակը, չնայած ՌԴ զինուժի աջակցությանը, կորուստներ է գրանցում եւ նահանջում՝ փաստորեն, անպաշտպան թողնելով երկրի քաղաքացիներին: Ի՞նչ է սպասվում Ասադի իշխանությանը:

– Այո, երկրի տարբեր շրջանների մեջ գործող իշխանությունը տարածքներ կորցրեց, սակայն պատերազմը տակավին չի ավարտվել, վիճակն անկախատեսելի է, մանավանդ, որ անցած 13 տարիների ընթացքում շատ տարածքներ, ներառյալ՝ Հալեպը, նման կացության մատնվեցին։ Կացությունը հարափոփոխ է, այն, ինչ հիմա հաստատում ենք, կարող է ժամեր հետո արդեն փոխվել: Առաջիկա օրերին Ասիդանայի համաձայնության խախտման գծով կայանալիք նիստից հետո կարելի է որոշ հստակեցումներ կատարել։

– Իսկ հայերն ի՞նչ վիճակում են` նոր զոհեր կամ վիրավորներ կա՞ն:

– Ոչ, վիրավորներ չունենք։ Միայն երեկ օդանավակայանի ռմբակոծման հետեւանքով մերձակա շենքերն են վնասվել, որոնց մեջ հայեր կային: Փառք Աստծո՝ միայն մեկ վիրավոր կար, մեր ընկեր՝ լուսանկարիչ Պերճ Պողիկյանն էր, որի տան երկաթե պատուհանն ընկել էր նրա գլխին, բայց մեծ վիրավորում չի ստացել։