«Միշտ էլ կգտնվեն մարդիկ, որ ներկա կլինեն նման հանդիպումներին, բայց, տեսանյութից դատելով, կարող եմ ասել, որ փայլուն հադիպում չէր իր համար։ Սրահում մեծ թվով մարդ չէր հավաքվել, միտինգ չէր կարող անել»,- «Փաստինֆո»-ի հետ զրույցում ասել է ՀՅԴ Բյուրոյի անդամ, Ֆրանսիայի հայկական կազմակերպությունների համակարգող խորհրդի համանախագահ Մուրադ Փափազյանը՝ անդրադառնալով Փաշինյանի ԱՄՆ կատարած այցին:

7օր ԱՄՆ-ում մնալով որեւէ պաշտոնական հանդիպման չարժանացած Նիկոլ Փաշինյանն այսօր մեկնել է Ֆրանսիա՝ մասնակցելու արհեստական բանականության գործողությունների գագաթնաժողովին: Միաժամանակ նա շտապել էր հայտնել, թե Ֆրանսիայում հանդիպում կունենա նախագահ Մակրոնի հետ։ Իսկ մինչ այդ՝ տելեգրամում գրել էր, թե հանդիպում է ունեցել նաեւ ֆրանսահայերի, իր բնորոշմամբ, «մի պատկառելի խմբի» հետ։

Մուրադ Փափազյանը, որը ջերմ հարաբերություններ ունի թե Փարիլի քաղաքապետի ու թե Ֆրանսիայի նախագահի հետ, ինչպես եւ սպասվում էր, չի մասնակցել Փաշինյանի համար կազմակերպված հանդիպմանը։

Նրա փոխանցմամբ՝ նման հանդիպումները, սովորաբար, կազմակերպվում են դեսպանատան կողմից ու լինում են մարդիկ, որոնք ներկա լինում են, սակայն Փաշինյանի այցերի դեպքում այլեւս համայնքի կառույցների հետ հանդիպումներ չեն լինում, ինչպես նախկինում։

«Տեսնում եմ, որ սրահում կան մի քանի իր համակիրներից, կան նաեւ ազգային մտածելակերպով մարդիկ, որոնք հավանաբար ցանկացել են տեսնել, թե ինչ է ասում։ 20-25 տարի է արդեն՝ դեռևս նախագահ Քոչարյանի օրոք, դեսպանատունը ձևավորած ունի Հայաստանի բարեկամ կազմակերպությունների խումբ, որոնք 50- 60 անդամ ունեցող կազմակերպություններ են, այդ բարեկամական խմբերի հետ դեռևս պահպանվում են հարաբերությունները և այդ կազմակերպություններից մարդիկ ևս տեսնում եմ տեսանյութում,» – ասաց Փափազյանը։