Բելգիայի Ներկայացուցիչների պալատի Արտաքին հարաբերությունների հանձնաժողովն ապրիլի 2-ին լսումներ է անցկացրել և քննարկել Լեռնային Ղարաբաղի վերաբերյալ բանաձևի նախագիծ: Լսումներին մասնակցել է նաև ՀՅԴ Հայ դատի Եվրոպայի գրասենյակի նախագահ Գասպար Կարապետյանը:

Alpha News-ը թեմայի վերաբերյալ զրուցել է ՀՅԴ Հայ դատի Եվրոպայի գրասենյակի լրատվական կապերի պատասխանատու Արամ Գևորգյանի հետ:

«Բանաձևը, որը ներկայացրել են պատգամավորներ Էլս Վան Հուֆը և Միշել դե Մաեգդը, նոր չէ, այլ նախկին բանաձևերն են, որոնցում որոշ կետեր են ավելացրել։ Պարոն Կարապետյանը առաջարկել է փոփոխություններ մտցնել այդ բանաձևի տեքստում, ինչպես նաև ավելացնել կետեր Հայաստանի և Ադրբեջանի միջև ակնկալվող «Խաղաղության պայմանագրի» և արցախահայության մասին:

Բանաձևի սկզբում ներկայացվում է Արցախի անկախության պատմությունը և խոսվում Ալմա-Աթայի հռչակագրի մասին: Այս հատվածի համար Գասպար Կարապետյանը նշել է, որ հստակ պետք է գրվի՝ Լեռնային Ղարաբաղի անկախության հիմքը ԽՍՀՄ օրենքի հիման վրա է դրված: Երկրորդ կետը, որ պետք է նշվի բանաձևում, այն է, որ 1990թ-ի սկզբներին Հայաստանի խորհրդարանը Ալմա-Աթայի հռչակագրում հստակ նշել է՝ Արցախը Ադրբեջանի մաս չպիտի կազմի: Կարապետյանը մանրամասն ներկայացրել է, որ Ադրբեջանի հայտարարությունները, թե Ղարաբաղը միշտ եղել է Ադրբեջանի կազմում, և հայերն իրենց 30 տարի է՝ հանել են այնտեղից, սուտ է և պատմական հիմք չունի»,- նշել է Գևորգյանը:

Խոսելով օրերս Նիկոլ Փաշինյանի հայտարարության մասին, թե պետք է մոռանալ Արցախյան շարժման մասին՝ Գևորգյանն ընդգծել է.

«Գասպար Կարապետյանը լսումների ընթացքում նշել է, որ ժողովրդավար, իրավունքի և անկախության շարժումը որևէ վարչապետ ինչ-որ քաղաքական պատճառներով չի կարող դադարեցնել: Նա նաև ասել է, որ Արցախի Ազգային ժողովը շարունակում է աշխատել և լավ կլիներ, որ Եվրոպական միությունը կամ դրա կառույցները հետևեին այդ մարմնի գործունեությանը»: