Լույս է տեսել ՀՅԴ պաշտոնաթերթ «Դրօշակ»-ի 2025 թ․ հինգերորդ համարը
28 Մայիս 2025
Ընթերցողին է ներկայացվել «Դրօշակ»-ի 2025 թ․ հինգերորդ համարը։ Ավանդաբար մայիսը մեզ համար եղել է տոնական ամիս և համապատասխան թեմաներն ու տրամադրությունները արտացոլվել են լրատվական և քարոզչական միջոցներում։ Արդեն մի քանի տարի է, սակայն, մայիսը դիմավորում ենք ծանր ապրումներով ճակատագրական կորուստների չմարող ցավը մեր ներսում։ Այս թեմաներն ու մտածումները, ինչպես և այսօրվա իրականությունը ծնող պատճառների վերլուծությունը կարմիր գծի նման արտացոլված են «Դրօշակ»-ի այս տարվա մայիսյան համարի հրապարակումներում։
Ներկայացված հոդվածներում անդրադարձ կա, մասնավորապես, երկրորդ աշխարհամարտի 80-րդ տարեդարձին և համաշխարհային այս պատերազմում հաղթանակի գործում հայ ժողովրդի ունեցած ներդրման ինչպես և զոհաբերությունների հարցին։ Թերևս տվյալ թեմայի վրա ուշադրության զգալի կենտրոնացումը բացատրվում է միջազգայնորեն նշվող իրադարձությունների շրջանակում Հայաստանի վարչապետի որդեգրած կեցվածքին և վերջինիս թելադրանքով պետական քարոզչամիջոցների կողմից տվյալ իրադարձությունները «այլ մեկնաբանությամբ» քննելու խայտառակ մոտեցմանը։
Հետաքրքրական է պատմաբան Վանիկ Վիրաբյանի հոդվածը որում հեղինակը քննում է Հայաստանի երեք հանրապետությունների օրգանական և շարունակական կապի խնդիրը։ Հոդվածում որպես փաստարկումներ ներկայացված են նշանավոր հայ գործիչների մեկնաբանությունները։ Մայիսյան այս համարում ՀՅԴ պաշտոնաթերթի խմբագրակազմը, ծննդյան 150 ամյակի առիթով մի քանի գրություններով անդրադարձել է Առաջին Հանրապետության նշանավոր գործիչներից մեկի՝ Նիկոլ Աղբալյանի կյանքին և գործունեությանը, ինչպես և ներկայացրել է մեծ հայորդու ուշագրավ անդրադարձին մայիսի 28-ի իրադարձություններին և այս պատմական օրվա նշանակությանը հայ ժողովրդի կյանքում։
«Դրօշակ»-ը տարբեր գրություններով անդրադարձել է նաև տաղանդավոր գեղանկարիչ Սեյրան Խաթլամաջյանին՝ ում մահվան երեսնամյա տարելիցը լրացավ նախորդ տարի։
Պաշտոնաթերթի ներկայացրած հոդվածաշարի հեղինակներն իրենց խոհերը և գնահատականներն են ներկայացնում պատմություն դարձած հայոց եռատոնին, անկախության և պետականության հաստատման իրադարձություններին, այն հավատով, որ հայ ժողովրդի համար անկումի այս ժամանակաշրջանը ավարտվելու է և մեջքը շտկելով հայությունը ունակ է դառնալու նոր մեծագործությունների, հայոց նոր վերածննդի մարտահրավերը պատվով ընդունելու համար։
«Դրօշակ»-ի մայիսյան համարում ընթերցողը կարող է գտնել հետաքրքրական այլ նյութեր ևս:
«Դրօշակ»ի 2025թ հինգերորդ համարը համացանցում կարող եք գտնել droshak.am հասցեի ներքո:
