Տեր կանգնենք մեր հաղթանակին` վերակերտելով նոր հաղթանակներ
28 Մայիս 2025
Արցախում Մայիս 28-ի խորհուրդը յուրօրինակ էր ընկալվում, այն հպարտության եւ վերակերտման տոն էր, հաղթանակի արժեւորման, պետության հիմքի, ազգային գաղափարաբանության, սեփական ուժի նկատմամբ հավատքի ընակլում։
Մայիս 28-ը մեր հավատքն էր պայքարի ու հաղթանակի կերտման։ Այդ ոգին էր, որ առաջնորդեց մեր մարտիկներին Արցախյան բոլոր պատերազմներում։ Հաճախ ենք կրկնում, որ Արցախը Սարդարապատ էր, այո’, Սարդարապատ էր, որտեղ զինվորն իր զենքը ցած չդրեց, որտեղ զինվորը պայքարեց եւ կերտվեց հայկական երկրորդ պետականությունը` Արցախի Հանրապետությունը։
Այսօր մեր պարտության ու նահանջի, մեր հայրենիքի կորուստի համար պետք է գիտակցենք, որ չպետք է հրաժարվենք մեր պայքարից, մենք կորցրեցինք, որովհետեւ չունեցանք ազգանվեր, հայրենատեր առաջնորդ…
Տեղին է հիշել Զոր. Նազարբեկյանի կոչը. «…Եթէ այժմ զէնքով չկարողանանք պաշտպանել մեր ազատութիւնն ու ունեցուածքը, ապա մենք արժանի չենք գոյութիւն ունենալու որպէս ինքնուրոյն ժողովուրդ եւ այն ժամանակ վա՛յ մեզ ու մեր յետնորդներին: Մեր որդիներն ու թոռները միմիայն անէծքով կը յիշեն մեզ: Մենք մեր յոյսը պէտք է դնենք միմիայն մեր սեփական ուժերի վրայ եւ եթէ այժմ առանց ժամանակ կորցնելու չօգնենք մեր զօրքին, չլայնցնենք նրա շարքերը զինուորներով եւ չմատակարարենք նրան անհրաժեշտ մթերքներ — մենք կորած ենք: Լաւ իմացէք, եթէ այժմ զէնքով չնուաճենք մեր ազատութիւնն ու չստեղծենք մեզ համար երջանիկ ապագայ — այլեւս երբեք չի յաջողուի այդ բանը ո՛չ մեզ եւ ոչ մեր սերունդներին»:
Այսօր վտանգված է Արցախի պետականությունը, բոլոր քայլերը միտված են Արցախի հարցը փակելու, Բաքվի բանտերում են Արցախի ռազմական եւ քաղաքական ղեկավարները, Հայաստանի ներկա իշխանությունները հրաժարվում են ազգային առաջնահերություններից, այս կործանարար ընթացքը շարունակվում է։
Պատահական չէ այսօր Թուրքիայի նախագահի այցն Արցախ, մինչ ՀՀ ներկա իշխանությունը հայտարարում է, որ ուրիշ հայրենիք չունի՝ Էրդողանը Արցախ է մեկնում, սա եւս մեկ ապտակ է, որ ամբողջ հայ ազգին է ուղղված։ Ազգային զարթոնքն անխուսափելի է, կամ այսօր, կամ երբեք, չպետք է թողնել, որ մեր որդիներն ու թոռներն անեծքով հիշեն մեզ։
Փա՛ռք Հայրենիքի ազատագրման պայքարի նվիրյալ մեր բոլոր ժամանակների հերոսներին, տեր կանգնենք հաղթանակին՝ վերակերտելով նոր հաղթանակներ․․․
«Ապառաժ»-ի խմբագրական
