Մայիսի 29-ին Հրապարակ TV-ի «Հինգշաբթի» հաղորդաշարի հյուրն էր Արցախի Հանրապետության ԱԺ նախկին պատգամավոր, Կրթության, գիտության, երիտասարդության և սպորտի նախկին նախարար, պատմաբան Արմեն Սարգսյանը: Անդրադարձ է կատարվել 2018 թվականից այսկողմ Հայաստան-Արցախ հարաբերություններում ի հայտ եկած օտարոտի մոտեցումներին, Արցախի հարցի կարգավորման գործընթացում ՀՀ իշխանությունների դրսևորած պարտվողական և զիջողական վարքագծին:

Խոսելով այսպես կոչված «թավշյա հեղափոխության» հետ կապված արցախահայության առաջին ընկալումների մասին՝ Արմեն Սարգսյանը նշել է, որ դրանք միանշանակ դրական չէին, և կար ժողովրդի մի մեծ հատված, որ զգուշավոր մոտեցում ուներ ՀՀ նոր իշխանությունների՝ Արցախին վերաբերող բարձրագոչ հայտարարությունների նկատմամբ: «Բայց Արցախը և արցախահայության գիտակից հատվածն այն ժամանակ առաջնորդվում էին մեկ և միակ գաղափարով՝ չանել այնպիսի քայլեր, որ, Աստված մի արասցե, անհասկացողության սեպ խրվի Հայաստանի և Արցախի միջև, պառակտում առաջանա հայաստանցիների և արցախցիների միջև»,- ասել է Արմեն Սարգսյանը:

Նա մանրամասն խոսել է նաև Արցախի պետական մարմինների պահպանման՝ որպես Արցախ հավաքական վերադարձի կարևորագույն պայմանի՝ հաշվի առնելով այն իրողությունները, որ մի շարք երկրների խորհրդարաններ, միջազգային կառույցների առանձին ներկայացուցիչներ, չնայած ՀՀ իշխանությունների մերժողական կեցվածքին, արդեն իսկ բարձրաձայնում են արցախցիների իրավունքների, այդ թվում նաև ինքնորոշման իրավունքի հարցը, և Արցախի պետական կառույցներն են, որ պետք է երկխոսություն վարեն նրանց հետ:

«Արցախ հավաքական վերադարձը հնարավոր է, դա միֆ չէ ու պետք է աշխատել այդ ուղղությամբ՝ համախմբելով ողջ հայության ներուժը, ստեղծելով համահայկական կուռ կառույցներ»,- նշել է Արմեն Սարգսյանը:

Մանրամասները՝ տեսանյութում