Ֆրանսայի նախագահին, Ռուսիոյ արտաքին գործոց նախարարին եւ Եւրոպական Միութեան արտաքին եւ անվտանգային քաղաքականութեան յանձնակատարին յայտարարութիւններէն ուղերձներ բովանդակող բաժիններու ծաղկաքաղը քաղաքական եզրայանգումներ կրնայ ընդգծել տալ:

Ֆրանսայի նախագահը անվերապահ զօրակցութիւն կը յայտնէր պաշտօնական Երեւանի կիրարկած թէ՛ ներքին եւ թէ՛ արտաքին քաղաքականութեան: Ներքին առումով կ՛ողջունէր ժողովրդավարութիւնը ապակայունացնողներու դէմ կիրարկուած ճնշումները, իսկ արտաքին` կը ջատագովէր վարչապետին «խրոխտ» քայլերը խաղաղութիւն հաստատելու ուղղութեամբ: Հակառուսականութիւնը ակներեւ էր այս բոլորին մէջ:

Կեդրոնանանք սակայն ներքին քաղաքականութեան նկատմամբ հասցէագրուած բաժիններուն վրայ: Այսպէս. Ռուսիոյ դաշնութեան արտաքին գործոց նախարարը մտահոգիչ գտած է եկեղեցւոյ նկատմամբ իշխանութիւններուն ձեռնարկած գործողութիւնները: Ան նաեւ նշած է, որ Մոսկուան շահագրգռուած է, որ այս հակամարտութիւնը, այս իրավիճակը հնարաւորինս շուտ կարգաւորուի` Սահմանադրութեան, հաւատացեալներու իրաւունքներու եւ մարդու այլ իրաւունքներու լիակատար յարգանքի հիման վրայ:

Սահմանադրութեան ակնարկելը կ՛ենթադրէ, որ եկեղեցին եւ պետութիւնը անջատ են եւ թէ պետութիւնը նման կերպով իրաւունք չունի միջամտելու եկեղեցւոյ խնդիրներուն: Հաւատացեալներու եւ մարդու իրաւունքներու լիակատար յարգումը այս պարունակին մէջ կրնայ ընկալուիլ այնպէս, որ նման եկեղեցւոյ վերաբերող խնդիրները կրնան արծարծուիլ իր հետեւորդներուն կողմէ. այստեղ որոշ չափով երկիմաստ բովանդակութիւն կայ: Իսկ մարդու իրաւունքները այս պայմաններուն մէջ ազատ կարծիքի, կամ լրատուամիջոցներու տեսախցիկներուն առջեւ ազատօրէն արտայայտուելու կրնայ վերաբերիլ: Կը կապուի օրինակ Միքայէլ սրբազանի կամ Սամուէլ Կարապետեանի հրապարակային յայտարարութիւններուն: Ի դէպ, Ռուսիոյ արտաքին գործոց նախարարութեան մամլոյ բանբերը նման յայտարարութիւն կատարած էր Սամուէլ Կարապետեանի ձերբակալման օրերուն:

Հիմա` Եւրոպական Միութեան յանձնակատարին ներքին քաղաքականութեան վերաբերող յայտարարութիւնը, որ համահունչ կը թուի ըլլալ Ֆրանսայի նախագահին կատարածին: Քալլաս կը յայտնէր, որ Հայաստանի յանձնառութիւնը ժողովրդավարութեան սկզբունքներուն կենսական նշանակութիւն ունի: Աւելի յստակացուցած էր իր միտքերը` ըսելով, որ այս արժէքները պէտք է պաշտպանուին յատկապէս համախառն (հիպրիտային) սպառնալիքներու, ապատեղեկատուութեան եւ երկրի ներքին գործերուն միջամտելու պայմաններուն մէջ: Եւրոպական Միութիւնը կը կանգնի Հայաստանի կողքին` ներդրում ունենալու եւ աջակցելու երկրի դիմադրողականութեան բարձրացման ընդհանուր արժէքներու ապահովման հարցին մէջ:

Այսքան պարզ: Որդեգրուած բառապաշարը համահունչ է իշխանութիւններուն հրապարակումներուն: Համախառն սպառնալիք, տեղեկատուական պատերազմ: Աւելի կը յստականայ թիրախը, երբ կը խօսուի արտաքին միջամտութեան մասին: Իրմէ առաջ Լաւրովին կը պատասխանէր իր հայ պաշտօնակիցը` ըսելով, որ Մոսկուան պէտք չէ միջամտէ Հայաստանի ներքին խնդիրներուն: Հիմա նոյնը կ՛ըսէ այս ձեւով Քալլասը: Ժողովրդավարական արժէքներու յանձնառու ըլլալուն համար եւրոպական աջակցութիւն ստանալն ալ նոյնքան համահունչ է Ֆրանսայի նախագահին յայտարարութիւններուն:

Այս բոլորը նախադրեալներ են, որ առնուազն յայտարարողական, գուցէ նաեւ հետզհետէ քաղաքական բախման կէտի կը վերածուի Հայաստանը` իբրեւ արտատարածքային (փրոքսի կէտ), այս պարագային Եւրոպայի եւ Ռուսիոյ միջեւ: Այս պայմաններուն մէջ ալ իշխանութիւններուն առած ամէն մէկ հերթական քայլ պիտի ողջունուի Եւրոպական Միութեան կամ անոր բաղկացուցիչ որոշ պետութիւններու կողմէ եւ իբրեւ մտահոգութիւն նկատողութեան պիտի յանձնուի Մոսկուայի կողմէ: Առ այժմ այս փոխհակազդեցութիւններու մակարդակին վրայ:

«Ա.»
«Ազդակ»