Ապու Տապիի հանդիպումէն բխած պաշտօնական հաղորդագրութիւնները ակնկալելիօրէն փակագիծեր պիտի չբանային: Անշուշտ կան քովնտի մեկնաբանութիւններ, ենթադրեալ կէտեր, որոնք կը շարունակեն լեցնել մամուլի սիւնակները կամ լրատուամիջոցներու տարբեր հարթակներու ելեկտրոնային տարածքները:

Պաշտօնապէս ըսուածը այն է, որ կողմերը լուրջ եւ բովանդակային քննարկումներ ունեցած են խաղաղութեան օրակարգի կարեւոր ուղղութիւններու` սահմանազատման, հաղորդակցութիւններու բացման եւ զարգացման, խաղաղութեան պայմանագիրի նախաստորագրման եւ այլ հարցերու շուրջ. ընդհանուր համաձայնութիւն ձեռք բերուած է շարունակելու հանդիպումներն ու բանակցութիւնները, ինչպէս տարբեր աշխատանքային խումբերու, այնպէս ալ աւելի բարձր մակարդակներու վրայ:

Այստեղ գոյացած համաձայնութեան միակ կէտը հանդիպումներու եւ բանակցութիւններու շարունակումն է եւ աշխատանքային տարբեր խումբերու ձեւաւորումը:

Նախ յատկանշական է, որ նախօրէին Միացեալ Նահանգներու արտաքին գործոց նախարարը ողջունած էր կողմերու հանդիպումը, խաղաղութեան համաձայնագիրի ստորագրութեան ընդառաջ: Ապու Տապիի հանդիպումէն ետք առաջին ողջոյնի յայտարարութիւնը կը պատկանէր Մոսկուային, որ նախագահի մամլոյ բանբերին ճամբով դրական նկատած էր հանդիպումը: Քիչ անց, Մոսկուայէն հնչած էր դարձեալ Ռուսիոյ պատրաստակամութիւնը կողմերուն միջեւ բանակցութիւնները արդիւնաւորելու առումով:

Երրորդ արձագանգը Եւրոպական Միութեանն էր. կողմերուն կոչ կ՛ընէր ըստ կարելւոյն շուտ սկսիլ խաղաղութեան համաձայնագիրի նախագիծի ստորագրումն ու վաւերացումը: Եւրոպական Միութիւնը պատրաստ է լրացուցիչ աջակցութիւն եւ փորձաքննութիւն տրամադրելու, եթէ կողմերը խնդրեն այդ մասին:

Այստեղ յատկանշականը գործընթացը արագացնելուն կը վերաբերի եւ պատրաստակամութեան գործնապէս աջակցելու. այլ խօսքով` ներգրաւուելու:

Կայ չորրորդը. Միացեալ Նահանգներու արտաքին գործոց նախարարութեան բանբերը կ՛ողջունէր խաղաղութեան առաջադրանքով թափուող ճիգերը, կ՛աւելցնէր, թէ կը հետեւին լրատուամիջոցներու հրապարակումներուն եւ թէ առ այժմ յաւելեալ ըսելիք չունին: Այս կը նշանակէ պարզապէս, որ չեն հերքեր «Քառնըկի»-ի հրապարակած առաջարկը:

Մեկնաբանութիւններու ամէնէն դիտարժանը Հայաստանի արտաքին գործոց փոխնախարարինն էր. եթէ սկզբունքները պահպանուին, ապա Երեւանը համաձայն է Սիւնիքին արտապատուիրակումի (աութ սորսինկ) կարգավիճակ տալուն: Այս յայտարարութիւնը անմիջապէս մտաբերել կու տար «Քառնըկի»-ի հրապարակումը: Նախիջեւան-Ազրպէյճան Սիւնիքի անցքը կը վերահսկէ ամերիկեան մասնաւոր անվտանգային ընկերութիւնը:

Արտապատուիրակումի մասին փոխնախարարին յայտարարութիւնը չհերքուեցաւ: Փոխարէնը պաշտօնապէս հաստատուեցաւ, որ յայտարարութիւնը աղճատուած է, վերյիշեցնելով ինքնիշխանութիւնը, տարածքային ամբողջականութիւնը եւ ազգային իրաւազօրութիւնը: Մերժած` որեւէ երրորդ կողմի վերահսկողութիւն եզրոյթը:

Ամերիկեան նախաողջունում եւ հանդիպումէն ետք յայտարարութիւն առ այն, որ կը հետեւին լրատուամիջոցներու հրապարակումներուն եւ այս պահուն առ այժմ յաւելեալ ըսելիք չունին. ռուսական պատրաստակամութիւն` ներդրում ունենալու ապաշրջափակման գործընթացին, Եւրոպայի կողմէ ներգրաւուելու եւ աջակցելու առաջարկ եւ ամերիկեան ոչ պաշտօնական առաջարկի շրջանառութիւն: Պէտք է սպասել Թեհրանի արձագանգին: Սիւնիքի ստանալիք կարգավիճակը նոյնքան ռազմավարական նշանակութիւն ունի Իրանի համար, որ մինչ այժմ կը շարունակէ կրկնել իր վճռակամութիւնը սահմաններու անփոփոխելիութեան առումով:

Չաճապարենք եզրակացութիւններու յանգելու: Ուրուագծում մը սակայն ինքզինք հեռուէն տեսանելի կը դարձնէ: Հաղորդուղիներ, միջանցք, խաղաղութեան խաչմերուկ եզրոյթներէն աւելի ամերիկեան հանգուցակէտի մը մասին կը յուշեն արձագանգներն ու մեկնաբանութիւնները: Մանաւանդ, Ուաշինկթընի առ այժմ յաւելեալ ըսելիք չունենալը:

«Ա.»
Ազդակ