Այսօր՝ հոկտեմբերի 3-ին ԱԺ «Հայաստան» խմբակցության պատգամավոր Արթուր Խաչատրյանը հանդես եկավ մամուլի ասուլիսով:

Նա ամփոփեց խորհրդարանական շաբաթը և պատասխանեց լրագրողների հարցերին:

Վերջին օրերին նկատելի է սննդամթերքի գների աճ, հատկապես կաթի, ձավարի, ձվի և ձեթի դեպքում։ Այս հարցին Ազգային ժողովում խորհրդարանական ճեպազրույցների ժամանակ անդրադարձավ «Հայաստան» խմբակցության պատգամավոր Արթուր Խաչատրյանը։

Պատգամավորն հետաքրքրվեց, թե Աշխատանքի և սոցիալական հարցերի նախարարությունը պատրաստե՞լ է որևէ քայլ սոցիալական խնդիրների մեղմման համար այս գների աճի պայմաններում, թե՞ գերադասում են զբաղվել արտաքին հանդիպումներով։

«Աշխատանքի և սոցիալական հարցերի նախարարն ինչ-որ քայլեր ձեռնարկելո՞ւ է այս թանկացումներով պայմանավորված սոցիալական բարդությունները մեղմելու համար, թե՞ դարձյալ մտածում է իր թուրք գործընկերուհու հետ հաջորդ հանդիպման մասին»,-ասաց նա։

Արթուր Խաչատրյանն անդրադարձավ Նիկոլ Փաշինյանի՝ «մեղմօրոր բողոքին՝ ՄԱԿ-ում, զայրույթին՝ ԵԽԽՎ-ում և ՔՊ-ի հապշտապ հայտարությանը»։

««Միջանցք բառը ոչ միայն Ալիևի բերանից է թռել, նաև Թրամփի։ Կողքը նստած էր, բա թող ասեր՝ ինչ միջանցք»,- ասաց Արթուր Խաչատրյանը։

Ըստ նրա, այս պայմաններում, երբ որ ամենակարևոր հարցերի շուրջ չկա համաձայնություն, հապշտապ գնալ ու նախաստորագրել խաղաղության պայմանագիրը, ու դա ներկայացնել որպես խաղաղություն՝ մառազմ է։

Ինչ վերաբերում է նախօրին ՔՊ խմբակցության «Հայաստանի և Ադրբեջանի միջև խաղաղության հաստատման վերաբերյալ» Ազգային ժողովի հայտարարության նախագծին, ընդդիմադիր պատգամավորը նշեց, որ այն մեկ նպատակ ուներ. հանկարծ Ալիևը չմտածի, որ մեղմօրոր բողոքը, պոռթկումը ՄԱԿ-ում, ԵԽԽՎ-ում, հանկարծ նշանակում է, որ Փաշինյանը կարող է Ալիևին ասել՝ դա լավ, հերիք եղավ»։

Անդրադառնալով Փաշինյանի հայտարարություններին՝ ներկուսակցական ժողովրդավարության մասին, Արթուր Խաչատրյանն ասաց. Մի մարդ, որ ասում է կառավարությունը ես եմ, հանկարծ խոսում է ներկուսակցական ժողովրդավարության մասին:

«Շատերս ենք տեսել, թե ինչ տեղի ունեցավ ՔՊ համաժողովի ժամանակ՝ Ստալինի, Խուրշչովի, Բրեժնևի, Գորբաչովի ոճով ծափահարությունները, և հիմա խոսում է ներկուսակցական ժողովրդավարության մասին։ Ակնհայտ է, որ Ալիևին զիջումներն ինքը լրացնում է ներսում բռնակալություն հաստատելու անթաքույց ջանքերով և այս ամենն ուղղված են լինելու ՀՀ-ում կուսակցությունները վերահսկելու, իսկ Դաշնակցությունը փակելու գործողություններով»,-ասաց նա։

Մանրամասները՝ տեսանյութում