(Հ.Մ.Ա.Կ.-ի 31-րդ Պատգամաւորական ժողովի առիթով)

Արամ Շահնազարեան

81 տարի շարունակ Հայ Մշակութային «Արարատ» Կազմակերպութիւնը եղել է ոչ միայն թեհրանահայ, այլ, ընդհանրապէս, իրանահայ համայնքի մշակութային ու մարզական կեանքի առանցքային դերակատարը՝ իր մշակութային, կրթական ու մարզական նախաձեռնութիւններով՝ նպաստելով մեր ազգային ինքնութիւնն ու նկարագիրը պահպանելու եւ իրարայաջորդ սերունդների հոգեմտաւոր ու ֆիզիկական զարգացումը եւ կրթութիւնն ապահովելու յոյժ կարեւոր գործին:

Այսօր մեկնարկում է «Արարատ»-ի 31-րդ Պատգամաւորական ժողովը, որը ոչ միայն ներքին հաշւետւական համագումար է, այլեւ՝ մեր համայնքի մարզամշակութային կեանքի կարեւոր իրադարձութիւն։

Ժողովը, ոչ միայն քննելու է Կազմակերպութեան Կենտրոնական վարչութեան վերջին երկու տարիների գործունէութիւնը, այլեւ դառնալու է նաեւ առաջիկայ շրջանի ռազմավարական ուղղութիւնների ձեւաւորման հարթակ։ Պատգամաւորները քննարկելու են համայնքի եւ, մասնաւորապէս, Հ.Մ.Ա.Կ.-ի առջեւ ծառացած մարզամշակութային ոլորտի մարտահրաւէրներն ու խնդիրները՝ սերնդափոխութեան, երիտասարդութեան ներգրաւման, տնտեսական եւ կազմակերպական կայունութեան հարցերը՝ Իրանի հասարակական կեանքի յարափոփոխ պայմաններում։

Ժողովը հաստատապէս նոր շեշտադրումներ կը կատարի՝ ինչպէս մշակութային եւ մարզական գործունէութեան, այնպէս էլ համայնքային ներուժի համախմբման ուղղութեամբ, որը չափազանց կարեւոր է առկայ սահմանափակ հնարաւորութիւնների ճիշտ հունաւորման եւ արդիւանւէտ իրացման գործում:

Ներհամայնքային խնդիրների կողքին եւ զուգահեռ, «Արարատ»-ը չի կարող աչքաթող անել նաեւ համահայկական բնոյթի մարտահրաւէրներն ու խնդիրները, որոնք ուղղակիօրէն ազդում են մեր ժողովրդի հոգեմտաւոր կեանքի բոլոր ասպարէզների վրայ:

Այսօր, երբ ամբողջ հայութիւնը՝ թէ՛ Հայաստանում, թէ՛ Սփիւռքում, կանգնած է արժէքային խորը ճգնաժամի եւ էութենական բնոյթի լրջագոյն մարտահրաւէրների առջեւ, առաւել յստակ եւ ընդգծւած է դառնում այնպիսի կազմակերպութիւնների, ինչպիսին է «Արարատ»-ը, դերը եւ նշանակութիւնը։ Երբ թիրախաւորւում են մեր ինքնութեան պահպանման յենասիւները, երբ փորձ է արւում խեղել եւ վերաձեւել մեր ազգային նկարագիրը, սփիւռքեան պայմաններում «Արարատ»-ի նման հաստատութիւնները դառնում են բերդաքաղաքներ՝ հայկական իրական ինքնութեանը հաւատարիմ մնալու, մեր ազգային եւ հոգեւոր արժէքներն ու արմատները պաշտպանելու եւ դրանք յաջորդ սերունդներին փոխանցելու գործում։

Վստահ ենք, որ այս Պատգամաւորական ժողովը, գիտակցելով իր պատմական պատասխանատւութիւնն ու առաքելութիւնը, այս ուղղութեամբ կընդունի յստակ որոշումներ՝ հաւատարիմ «Արարատ»-ի ազգային կոչմանն ու պատմական առաքելութեանը։

81 տարի շարունակ «Արարատ»-ը եղել է իրանահայ համայնքի համախմբման, մշակութային ինքնութեան եւ ազգային դաստիարակութեան անփոխարինելի յենարանը։ Չենք կասկածում, որ այդ ընթացքը կը շարունակւի նաեւ ապագայում, մասնաւորապէս՝ յառաջիկայ երկու տարում: Ուրեմն՝ բարի երթ մեր «Արարատ»-ին:

«Ալիք»