Հայաստանում իշխող վարչախմբի բոլոր կարգի հասարակա-տնտեսական յայտարարութիւններն ու գործողութիւններն, որոնք, այսպէս թէ այնպէս, միտւած են դրական տպաւորութիւն առաջացնելու հասարակայնութեան մօտ, արդէն վաղուց է, որ չակերտների մէջ են առնւում նոյն հասարակայնութեան ներքին թէ արտաքին լսարանի կողմից։

Եւ այսպէս՝ էլ ինչո՞ւ զարմանալ ու զայրանալ, ասենք, վարչախմբի կողմից վերահսկւած-բեմականացւած Վաղարշապատի քաղաքապետական «ընտրութիւնների» արդիւնքի առթիւ։ Նոյն տրամաբանութեամբ էլ՝ արդէն տարիներ է, որ ժողովրդավարութիւնը, խաղաղութիւնը, արդարադատութիւնն ու հանդուրժողականութիւնն եւ դեռ շատ ուրիշ դրական յատկանիշներն ու երեւոյթները հայաստանեան իրականութեան մէջ չակերտեալ ձեւաչափերով են նկարագրւում։ Նոյնիսկ ամենադոյզն ազգային երանգ ու խօսք, ծրագիր ու նպատակ պատկերացնելի չէ, արդէն 7 տարուց ի վեր, մեր հայրենի երկրի ողջ համակարգն օկուպացրած թուրքահպատակ խունտայի վարքագծում։

Ահաւասիկ՝ հարց է առաջանում. արդեօք նոյն վարչախմբին հայկական բնութագիր ու պատկանելութիւն վերապահելը արդարացւա՞ծ է, թէ՞ դա էլ է պէտք չակերտների մէջ առնել։

Փորձենք այդ հարցին պատասխանել անցնող 7 տարիների իրողական ապացոյցներով ու արձանագրւած փաստերով։

Եւ այսպէս՝ մի իշխանախումբ, որ

– Ի սկզբանէ պառակտել է ողջ ազգութիւնը (սեւ-սպիտակ, նախկին-ներկայ,հայաստանցի-ղարաբաղցի եւ …),

– Վարկաբեկել ապաեւ՝ թուլացրել-հալածել է երկրի անկախութեան, ինքնիշխանութեան եւ անվտանգութեան իսկական երաշխիք՝ Հայկական Բանակը,

– Իբր սխալ ու անգրագէտ (բայց փաստօրէն ծրագրաւորւած-հրամցւած) դիւանագիտութեան պատճառով հրահրել է պատերազմ՝ թշնամի երկրի կողմից,

– Դարձեալ ծրագրաւորւած կերպով պատերազմը պարտութեամբ ուղղորդել եւ հինգ հազար զոհի ու կրկնակիօրէն հաշմանդամների պատճառ է դարձել,

– Հետագային շրջափակւած Արցախին միայնակ է թողել ու ի վերջոյ 7000-ամեայ հայկական բնօրրանը ադրբեջանական յայտարարել,

– Եւ արդիւնքում էլ նոյն Արցախը էթնիկ զտման, ցեղասպանութեան ու բռնի տեղահանման բուն պատճառ-յանցակիցն է հանդիսացել,

….Մի իշխանախումբ, որ.

– Իր թիւ 1 դէմքով, յաչս աշխարհի, ուրանում է բովանդակ հայութեան արդար Պահանջատիրութեան հիմքում ընկած՝ Հայոց Ցեղասպանութիւնը,

– ԱՐԱՐԱՏ-ը համարում է թուրքական,

– Սուր է ճօճում ազգի հոգեւոր սրբութեան սրբոց՝ Հայոց Առ. Եկեղեցու դէմ,

– Նենգափոխում է ազգի պատմական յիշողութեան գրաւական՝ նոյն Հայոց հինաւուրց ու հայի ինքնութեան վկայագիր՝ հազարամեակների Պատմութիւնը,

…Եւ մի իշխանախումբ, որ.

– Պատրաստակամ է հայկական Սիւնիքով միջանցք տրամադրել, ադրբեջանաթուրքական դաշինքն առաւել ամրապնդելու համար,

– Բնականոն է համարում երեքհարիւրհազար ադրբեջանցի փախստականների իրենց բնակավայր՝ «Արեւմտեան Ադրբեջան» (Հայաստան) վերադարձը,

– Միաժամանակ՝ ոչ մի պահանջ չի ներկայացնում՝ 90-ականների հայկական ջարդերի արդիւնքում շուրջ 700 հազար հայ բռնագաղթեալների, ընդհուպ՝ նոյն 2023-ի աւելի քան 120000 արցախահայերի վերադարձի կապակցութեամբ,

Եւ վերջապէս իշխանախումբ, որի համար գոյութիւն չունի Բաքւի բանտերում բռնադատւող Արցախի ռազմաքաղաքական ղեկավարութիւն,

Ահա, այսպիսի՝ իշխանախմբի հայկական կոչւելու ոչ քաղաքական, ոչ իրաւական եւ առաւել եւս՝ բարոյական ոչ մի իրաւունք չպէտքէ վերապահել…։

Մինչ այս, մինչ այն, անսալով իր «հաշտարար» ու «խաղաղութեան ջատագով»-ի՝ հայատեաց Էրդողանի խորհրդին, Հայաստանի կառավարական համակարգը բռնազաւթած ռեժիմի պարագլուխը պատրաստւում է երկրի սահմանամերձ ու կենտրոնական քաղաքներում տասնեակի հասնող մզկիթներ կառուցել՝ երեւի մօտ ապագայում բնակութիւն հաստատող մուսուլմանների համար, յանու՜ ն այս վերջինների «մարդկային ու կրօնական» իրաւունքների ապահովման…

* * *

Ինչեւէ, կարմիր ու սեւ բերետաւորների հերթական «քաջագործութիւնների» արդիւնքում (յար եւ նման Գիւմրիի դէմ թուրքաբարոյ գրոհումների), ՔՊ-ական խունտան Վաղարշապատում դիմեց համաչափ «ռազմափորձի», որի աւելի ծաւալուն կրկնօրինակը մեծ հաւանականութեամբ իրականացւելու է 2026-ի խորհրդարանական «ընտրութիւններում»…։ Յուսանք, որ թուրքական դրածոյ իշխանախմբին ընդդիմացող քաղաքական ուժերն ու յատկապէս ազգադաւ – հայրենադաւ իշխանախմբից երես թեքած ժողովուրդը պարտն ու պատշաճը կանեն՝ բռնազաւթւած հայրենի երկիրը ազատագրելու համար հայանուն բռնաւորների ճիրաններից…։

Դերենիկ Մելիքեան